Коркин турнира: Билиҥҥитэ биир кыһыл, биир үрүҥ көмүс мэтээллээхпит

ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы турнир иккис күнүгэр – биэс ыйааһыҥҥа кыайыылаахтар уонна иккис-үһүс миэстэлээхтэр ааттара билиннэ. Санатан эттэххэ, бүтэһиктээх ааҕыынан быйылгы турнирга 26 дойдуттан 156 бөҕөс күөн көрүстэ. Ол иһигэр Россия сэттэ регионуттан – 92 бөҕөс.  

 

 

Дьэ, бастакы финаллар кэннилэриттэн тугу этиэххэ сөбүй? Бэҕэһээ баччаларга үс бөҕөспүт: Арыйаан Тютрин, Виктор Рассадин, Ньургун Скрябин үчүгэй тустууну көрдөрөн финалга тахсыбыттарыгар күө-дьаа буолбут дьон бүгүн хайдах эрэ кэрэ-куру буоллубут. Күрэхтэһии быдан инниттэн саамай эрэммит киһибит – Россия чемпионатын үс төгүллээх призера, норуоттар икки ардыларынааҕы кылаастаах спорт маастара Арыйаан Тютрин финалга бурят Жаргал Дамдиновка хотторон кэбиһэн, көрөөччүлэри хомотто.

Дьиҥэ, Арыйаан ити бурятка былырыын Казахстаҥҥа, Кунаев аатынан турнирга хотторон турардаах. Онон Дамдинов сэрэхтээх утарсааччы буолара биллэр этэ. Ол да буоллар, биһиги бэйэбит уолбут харса суох кимээһиннээх тустуутугар эрэммиппит. Тустуу биһиги санаабыппыт курдук буолбата. Сатахха, бурят эчэйиилээх буолан, эбиитин “кубик” быраҕыллан – хапсыһыы хаста эмэтэ тохтотуллан, саҕаланан испит ситимэ быста-быста салҕанна. Көрдөххө, биһиги бөҕөспүт икки төгүл атахха киирэн баран, бэйэтэ утары албаска түбэһэн, очукуо бөҕөнү сүүйтэрдэ. Онон түмүккэ 9:4 ахсаанынан хотторон кэбистэ.

Итинэн, биир улаханнык эрэммит киһибит иккис миэстэнэн дуоһуйда.

Оттон иккис ыйааһын финалыгар бэйэбит уолаттарбыт Ньургун Скрябин уонна Виктор Рассадин көрүстүлэр. Бастакы түһүмэххэ Ньургун Скрябин сэниэлээх эрдэҕинэ атахха киирэн охторон, “накат” диэн албаһы оҥорон, 6:0 ахсаанынан чорбос гына түспүтэ. Ол эрээри, иккис түһүмэххэ киирэн сылайан хаалан, били сүүйбүт баалларын төттөрү биэрэн, түмүккэ 12:8 хотторон кэбистэ.

Итинэн, хамаандабыт хапытаана Виктор Рассадин – улуу тренер Д.П. Коркин аатынан турнир соҕотох биэс төгүллээх (!) кыайыылааҕынан буолла. Манна даҕатан эттэххэ, бу турнирга бастаабыттар – 5, иккистээбиттэр – 3, үһүстээбиттэр – 1-дии тыһ. доллар харчынан бириэмийэлэннилэр. Маны тэҥэ кыайыылааҕы бэлэмнээбит тренер 1 тыһ. долларынан бэлиэтэннэ.

Онон бастакы финаллар кэннилэриттэн олохтоохтор икки мэтээллээхпит: биир кыһыл көмүс, биир үрүҥ көмүс. Өссө эбии икки боруонса мэтээл кэлиэн сөп этэ даҕаны, Егор Потапов (57 кг) – азербайджанец Парвиз Ибрагимовка, Егор Захаров (65 кг) – турок Чингисхан Эрдогаҥҥа бэрт кыранан сабырыйтаран, бочуоттаах бэһис миэстэлэри ыллылар. Онон быйылгы турнирга биир эрэ киһибит бастаата – Виктор Рассадин.

Сарсын арай, Дмитрий Аксенов, Эдуард Григорьев, Тимур Николаев, Револий Самсонов, Алексей Ефимов, Ньургун Сергин ситиһиилээхтик туһуннахтарына – боруонса мэтээлинэн наҕараадаланар кыахтаахтар.

Күрэхтэһии бүгүҥҥү түмүгэ:

57 кг: 1. Жаргал Дамдинов (Россия, Бурятия), 2. Арыйаан Тютрин (Россия, Саха сирэ), 3. Парвиз Ибрагимов (Азербайджан), Алдар Балжинимаев (Россия, Бурятия), 5. Егор Потапов (Россия, Саха сирэ), Гуламжон Абдуллаев (Узбекистан).

65 кг: 1. Виктор Рассадин (Россия, Саха сирэ), 2. Ньургун Скрябин (Беларусь), 3. Чингисхан Эрдоган (Турция), Булат Батоев, 5. Даша Шарастепанов (иккиэн — Россия, Бурятия), Егор Захаров (Россия, Саха сирэ).

74 кг: 1. Надирбек Хизриев, 2. Никита Сучков (иккиэн – Россия, Красноярскай), 3. Геандрис Гарзон (Куба), Хаджимурад Гаджиев (Азербайджан), 5. Давид Тлашадзе (Грузия), Азамат Шагапулы (Казахстан).

86 кг: 1. Петр Янулов (Молдова), 2. Александр Гостиев (Азербайджан), 3. Кшиштоф Садовик (Польша).

97 кг: 1. Игорь Овсянников (Россия, Красноярскай), 2. Максуд Вейсалов (Узбекистан), 3. Георгий Димитров (Болгария).

Сарсыҥҥы финаллар:

61 кг: Кадзуя Коянаги (Япония) – Александр Богомоев (Россия, Бурятия)

70 кг: Евгений Жербаев (Россия, Бурятия) – Арбак Сат (Россия, Красноярскай)

79 кг: Абубакр Абакаров (Азербайджан) – Тажудин Акаев (Россия)

92 кг: Анзор Уришев (Россия, Красноярскай) – Гурам Черткоев (Россия).

125 кг: Павел Кривцов (Россия) – Даниель Лигети (Венгрия).

Бырагыраама быһыытынан сарсын, алтынньы 13 күнүгэр күрэхтэһии күнүс 11:00 чаастан – 61, 70, 79, 92, 125 кг ыйааһыннарга “уоскутар” бөлөх тустууларынан саҕаланар. Онтон эбиэттэн киэһээ 14:00 чаастан бүтэһик быһаарыылаах хапсыһыылар ыытыллыахтара.

Петр ПАВЛОВ.

Эрэл ОХЛОПКОВ хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *