Коркин турнира: Сарсыҥҥы күҥҥэ финалга кимнээх таҕыстылар?

ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы XII турнир иккис күнүгэр 57, 65, 74, 86, 97 кгыйааһыннаахтарга “уоскутар” бөлөх тустуулара уонна 61, 70, 79, 92, 125 киилэлэргэ барыллааһын итиэннэ финалга тахсар иһин хапсыһыылар ыытылыннылар.

 

 

 

Ол курдук, 57 үһүс миэстэни ким былдьаһарын быһаарсар киирсиилэргэ Алексей Копылов – Федор Постниковы кыайан баран, салгыы күрэхтэһиигэ азербайджанец Парвиз Ибрагимовка хоттордо. Онон бу ыйааһыҥҥа бастакы боруонса мэтээл иһин биһиги Егор Потаповпыт уонна Д.П. Коркин былырыыҥҥы турнирын иккис призера Парвиз Ибрагимов тустуохтара.

Оттон иккис бөлөххө биһиги Дмитрий Илларионовпыт узбек Гуломжон Абдуллаевка сабырыйтарда. Онон иккис боруонса иһин бурят Алдар Балжинимаев уонна Гуломжон Абдуллаев киирсиэхтэрэ.

65 киилэҕэ эмиэ “уоскутар” бөлөххө Егор Захаров бэйэтин киһитэ Ньургустаан Иванову хотто. Онон бүгүн киэһэ боруонса мэтээл иһин Чингисхан Эрдоганныын (Турция) тустуоҕа.

Иккис бөлөххө Алексей Данилов тэҥ киирсиигэ дьоппуон Джиро Исоҕа баһыйтарда. Манна иккис боруонса иһин Бурятия бөҕөстөрө Даша Шарастепанов уонна Булат Батоев тустар буоллулар.

74 киилэҕэ үһүс бириистээх миэстэ иһин киирсиэхтэрэ: казах Азамат Шагапулы – кубинец Геандрис Гарзон уонна азербайджанец Хаджимурад Гаджиев – Давид Тлашадзе.

Бүгүҥҥү финаллары санаттаха маннык:

57 кг: Арыйаан Тютрин (Саха сирэ) – Жаргал Дамдинов (Бурятия)

65 кг: Виктор Рассадин (Саха сирэ) – Ньургун Скрябин (Беларусь)

74 кг: Никита Сучков – Надирбег Хизриев (иккиэн – Красноярскайтан).

Сарсыҥҥы финалларга көрсүөхтэрэ:

Аны кылгастык бүгүн эбиэккэ диэри ыытыллыбыт тустуу туһунан билиһиннэрдэххэ, сарсыҥҥы күҥҥэ финалга биир да бөҕөспүт тахсыбата.

61 киилэҕэ финалга Кадзуя Коянаги (Япония) — Александр Богомоев (Бурятия).

Азия чемпионатын призера Коянаги – тувинец Чымбаны ыраастык, биһиги бөҕөстөрбүт Петр Павловы уонна Дмитрий Аксеновы очукуонан кыайталаата.

Оттон Россия үс төгүллээх чемпиона Александр Богомоевы утары бастакы эргииргэ Владимир Егоров (Македония) туста тахсыбата. Салгыы күрэхтэһиигэ Богомоев утуу-субуу Эдуард Григорьевы 3:1, Яков Павловы 5:0 ахсааннарынан уонна финалга тахсыыга Владислав Кривошапкины кыайталаата. Онон бу ыйааһыҥҥа биһиэттэрэ үһүс миэстэ эрэ иһин тустар буоллулар.

70 киилэҕэ финал: Евгений Жербаев (Бурятия) – Арбак Сат (Красноярскай).

Манна биһиги бөҕөстөрбүтүттэн Ньургустаан Брощев уонна Тимур Николаев – Жербаевка хотторон, үһүс миэстэ иһин тустуохтара.

Оттон Сатка хотторбут – Юрий Протодьяконовпыт уонна Револий Самсоновпыт “уоскутар” бөлөххө киирсиэхтэрэ.

79 киилэҕэ финал: Абубакр Абакаров (Азербайджан) – Тажудин Акаев (Россия).

Бу ыйааһыҥҥа, финалга тахсар иһин тустууга Акаевка бэрт кыранан сабырыйтарбыт Амма ыччата Алексей Ефимов сарсын боруонса мэтээл иһин киирсиэҕэ.

92 киилэҕэ финал: Анзор Уришев (Красноярскай) – Гурам Черткоев (Россия).

Манна соҕотох кыттааччыбыт, республика чемпиона Ньургун Сергин бастаан аан дойду чемпионатын призера венгр Иштван Веребы кыайан баран, Россия уонна Европа чемпиона, спорт үтүөлээх маастара Анзор Уришевка хотторон кэбистэ. Онон кини сарсын боруонса мэтээл иһин белорус Иван Янковскайдыын тустуоҕа.

125 киилэҕэ финал: Даниель Лигети (Венгрия) – Павел Кривцов (Россия).

Бу ыйааһыҥҥа биһигиттэн эдэр уолаттар Эдуард Максимов уонна Никита Хабаров күүстэрин холонон көрдүлэр да, Максимов – Россия чемпионатын призера бурят Балдан Цыжиповка, оттон Хабаров армянин Ашот Рушаняҥҥа хоттордулар.

Онон түмүктээн эттэххэ, бүгүн, киэһэ 17:00 чаастан турниры үөрүүлээхтик аһыы буолуоҕа, ол кэнниттэн тута 57, 65, 74, 86, 97 кг ыйааһыннарга бастакы уонна үһүс миэстэлэри былдьаһыы ыытыллыаҕа. Бука бары Тустууга! Бука бары “Триумфка”!

Петр ПАВЛОВ.      

Добавить комментарий

Ваш адрес email не будет опубликован. Обязательные поля помечены *