Коркин турнира: Тютрин, Рассадин уонна Скрябин – финалга!

ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр үгэс быһыытынан ыытыллар көҥүл тустууга норуоттар икки ардыларынааҕы XII турнир бастакы күнэ түмүктэннэ. Эрдэ иһитиннэрбиппит курдук, “Триумф” Спорка бэлэмнэнии киинигэр тэлгэммит көбүөргэ бүгүн биэс ыйааһын кыттыылаахтара күөн көрүстүлэр. Онуоха, финалга тахсар иһин киирсиилэргэ кыайыыны ситиһэн, саха тустууга кыһатын үс иитиллээччитэ быһаарыылаах хапсыһыыга таҕыста.

 

Ол курдук, күн иккис аҥаарыгар биир көбүөрүнэн финалга тахсар иһин хапсыһыылар ыытылыннылар. Бастакынан көбүөргэ тахсыбыт үс кыайыылаах Егор Потапов бурят Жаргал Дамдиновка сатаан утарсыбыта. Ыалдьыппыт “накат” диэн албаһы сатабыллаахтык туһанан, очукуонан ыраас кыайыыны (11:1) ситистэ. Онон Дамдинов бастакы финалиһынан буолла.

Оттон, оҕолорго олимпийскай чемпионунан буола сылдьыбыт Алдар Балжинимаев уонна Арыйаан Тютрин көбүөргэ таҕыстылар. Кинилэр бу хаһыс да көрсүһүүлэрэ, сырыы ахсын тустуулара наһаа тыҥааһыннаах буолааччы. Манна этэргэ дылы, ким өй-санаа өттүнэн үчүгэйдик, кытаанахтык хатарыллыбыт – ол кыайар. Сыыстарбат буоллахпына, 2016 сыллаахха Дьокуускайга буолбут Россия чемпионатыгар боруонса мэтээли былдьаһыыга бэрт сыралаах киирсиигэ биһиги уолбут кыайыыны ситиспитэ.

Тютриннаах Балжинимаев киирсиилэрэ бу да сырыыга хабыр соҕус буолла. Тэҥ тустууга бастакы түһүмэххэ утарсаччытыгар сэрэтии бэрдэрэн, биһиги бөҕөспүт 1:0 ахсаанынан инники түстэ. Иккис түһүмэх өссө сытыырхайда. Хотторон иһэрин билэн, бурят бөҕөһө тарбахтаатын диэн, Тютрины төбөтүнэн охсубутугар сэрэтии ылла уонна утарсааччытыгар эбии баал ааҕылынна. Ити курдук, хабырдык барбыт хапсыһыыга Арыйаан 4:0 ахсаанынан хотто. Манна, биһиги бөҕөспүт утарсааччытын куруубайдааһыныгар кыһаллыбакка, бэйэтин кыана туттубутун хайгыахха сөп. Оттон, ыга кыыһырбыт Балжинимаев тустуута табыллыбакка, ыһыллан хаалла.

65 киилэҕэ маҥнай, Саха сирин хамаандатын хапытаана Виктор Рассадин – хаһыс да сылын Турцияттан кыттар Чингисхан Эрдоганы (Опан Саты) кытта киирсиитигэр хапсыһыы хара ааныттан үөс-батааска биэрбэккэ, үрүҥ хараҕын өрө көрдөрбөккө, санаатын күүһүнэн самнаран, бэрт кылгас болдьоххо араастаан эргитэн, кулахачытан ахсааны 14:3 оҥорон, очукуонан ыраас кыайыыны ситистэ. Манан кини, аҕыйах сыллааҕыта Кызылга “Азия киинэ” Бүтүн Россиятааҕы турнир финалыгар хотторбутун боруостаата диэххэ сөп.

Бу хапсыһыыны сорохтор, опыттаах Опан соруйан хоттордо, атаҕын олох көмүскэммэтэ дииллэр. Оттон мин онно сөбүлэспэппин. Улахан ааттаах-суоллаах тувинец бүгүҥҥү күҥҥэ Рассадины хайдах даҕаны кыайар кыаҕа суоҕун билэн, сатаан утарсыбата.

Бу ыйааһын иккис пааратыгар аны Ньургун Скрябиммыт бурят Булат Батоевы кытта киирсиитигэр ахсаанынан баһыйа тутан иһэн, бэйэтин сөбүлээн туттар албаһыгар – “Милз ырычаагар” түбэһиннэрэн, ыраас кыайыыны ситистэ. Итинэн, маныаха диэри иһийэн олорбут “Триумфка” толору мустубут саха тустууну таптааччыларын сүрдээҕин үөртэ. Ньургун, маладьыас!

Дьэ, онон сарсыҥҥы финалга үс бөҕөспүт таҕыста: Арыйаан Тютрин, Виктор Рассадин уонна Ньургун Скрябин.

Сарсыҥҥы финаллар:

57 кг финал: Жаргал Дамдинов (Бурятия) – Арыйаан Тютрин (Саха сирэ).

“Уоскутар” бөлөххө Федор Постников – Алексей Копылов (иккиэн – Саха сирэ). Бу паара кыайыылааҕа азербайджанец Парвиз Ибрагимовы кытта тустуоҕа. Онно хоппут киһи боруонса мэтээл иһин Егор Потаповтыын көрсүөҕэ.

Иккис боруонса иһин Дмитрий Илларионов (Саха сирэ) – Гуламжон Абдуллаев (Узбекистан) киирсиитин кыайыылааҕа монгол Нямдаваа Сухбаатары кытта көрсүөҕэ. Онно хоппут киһи боруонса мэтээл иһин Алдар Балжинимаевтыын тустуоҕа.

65 кг финал: Виктор Рассадин (Саха сирэ) – Ньургун Скрябин (Беларусь).

Бу ыйааһыҥҥа “уоскутар” бөлөххө маҥнай Егор Захаров – Николай Иванов көрсүөхтэрэ. Кинилэртэн хайалара кыайбыта үһүс бириистээх миэстэ иһин Чингисхан Эрдоганныын күөн көрсүөҕэ.

Оттон иккис бөлөххө Алексей Данилов (Саха сирэ) – Джиро Исоны (Япония) кытта киирсиэҕэ. Кыайбыта бурят Даша Шарастепановы кытта тустуоҕа. Ити киирсии кыайыылааҕа боруонса мэтээл иһин Булат Батоевтыын (Бурятия) көрсүөҕэ.

74 кг финал: Никита Сучков – Надирбек Хизриев (иккиэн – Красноярскайтан).

Бу ыйааһыҥҥа саамай кэтэспит киһибит – Герман Устинов биллибэт биричиинэнэн кыттыбата. Оттон кинини солбуйуох айылаах киһибит билиҥҥитэ суоҕа хомолтолоох.

86 уонна 97 кг ыйааһыннарга кыттааччылар аҕыйах буоланнар, күрэхтэһии эргиир систиэмэтинэн ыытылынна. Ол аата, кыттааччылар бары сирэй көрүстүлэр. Маныаха, мин көрдөхпүнэ, молдован Петр Янулов уонна красноярец Игорь Овсянников номнуо турнир кыайыылаахтарынан буоллулар диэххэ сөп. Кинилэр үстүүтэ-түөртүүтэ тустан, наар кыайыыны ситистилэр.

Онон, сарсын, атын хаалбыт биэс ыйааһыҥҥа (61, 70, 79, 92, 125 кг) күрэхтэһии саҕаланар уонна киэһэ, турниры үөрүүлээхтик аһыы кэнниттэн, бүгүҥҥү ыйааһыннар финаллара буолуохтара. Бука бары Тустууга! Бука бары “Триумфка”!

Петр ПАВЛОВ.

Эрэл ОХЛОПКОВ хаартыскаҕа түһэриитэ.         

Добавить комментарий

Ваш адрес email не будет опубликован. Обязательные поля помечены *