Коркин турнирыгар кыттааччылар сайаапкаларын көрдөххө…

Биһиги биллиилээх, киэн туттар тренербит, республикаҕа ХХ үйэ бастыҥ Киһитинэн талыллыбыт Дмитрий Петрович Коркин кэриэһигэр көҥүл тустууга норуоттар икки ардыларынааҕы XII турнирга, тэрийээччилэр биллэрбиттэринэн, бу күҥҥэ 25 дойду кыттарга бэлэмин биллэрбит. Оттон ыҥырыы 50-чэ дойдуга ыытыллыбыт. Онон күн-түүн кыттааччы ахсаана өссө элбиэн, эбиллиэн сөп эбит.

 

Бүгүҥҥү туругунан Азербайджан, Армения, Афганистан, Беларусь, Болгария, Венгрия, Грузия, Индия, Канада, Казахстан, Кытай, Кыргызстан, Турция, Литва, Латвия, Молдова, Монголия, Польша, Румыния, Узбекистан, Корея, Филиппины, Япония хамаандалара – Д.П. Коркин аатынан турнирга кыттарга баҕалаахтарын биллэрбиттэр. Кинилэртэн ханнык күүстээх, эбэтэр биллиилээх бөҕөстөр сайаапкаҕа киирбиттэрин бу суруйуубар билиһиннэриэхпин баҕарабын.

Азербайджантан аан дойду экс-чемпиона, олимпийскай призер Хаджи Алиев, аан дойду эдэрдэргэ былырыыҥҥы чемпиона, Европа дойдуларын оонньууларын боруонса призера Хаджимурад Гаджиев уонна Европа эдэрдэргэ күрэхтэһиитин быйылгы кыайыылааҕа Абубакар Абакаров кэлэллэрэ күүтүллэр.

Беларусьтан аан дойду былырыыҥҥы чемпионатын үрүҥ көмүс призер Иван Янковскайы уонна биир дойдулаахпыт Ньургун Скрябины бэлиэтиэххэ сөп.

Венгрияттан аан дойду уонна Европа чемпионаттарын призердара Иштван Вереб уонна Даниель Лигети диэн уопуттаах бөҕөстөр тустууларын көрүөхпүт.

Грузияттан Европа чемпионатын призердара Давид Тлашадзе уонна Константин Хабалашвили кэлиэхтэрэ.

Соторутааҕыта Нур-Султаҥҥа буолан ааспыт аан дойду чемпионатыгар Индия тустууктара сөхтөрдүлэр. Син ол кэриэтэ, Коркин турнирыгар кинилэр күүстээх састаабы ыытар соруктаахтар. Ол курдук, sakha-pechat.ru сайтка эрдэ этэн аһарбыппыт быһыытынан, икки төгүллээх олимпийскай призер, аан дойду чемпиона Сушил Кумары тэҥэ сайаапкаҕа аан дойду чемпионатын призердара Рахул Аваре уонна Амит Кумар киирбиттэр.

Молдоваттан Максим Сакулцан, Стефан Тону уонна Евгений Недялко курдук күүстээх бөҕөстөр кэлиэхтэрэ.

Монголияттан үс бөҕөс сайаапката баарыттан, ыарахан ыйааһыҥҥа Азия чемпионатын хас да төгүллээх призера Золбоо Нацагсурены чорботуохха сөп.

Японияттан үс тустууктаах хамаанданы олимпийскай чемпион, билигин тренеринэн үлэлиир Тацухиро Йонемицу салайан аҕалыаҕа.

Оттон Россия регионнарыттан Красноярскай, Санкт-Петербург, Калининград, Крым сайаапкаларын ыыппыттар. Ону тэҥэ биһиэхэ биллэринэн, Хотугу Осетияттан  олимпийскай чемпион Сослан Рамонов, Бурятияттан Европа дойдуларын оонньууларын кыайыылааҕа Александр Богомоев курдук күүстээх тустууктар кэлиэхтээхтэр. Манна даҕатан эттэххэ, билиҥҥитэ Хотугу Осетия уонна Бурятия ханнык састаабынан кыттар сайаапкаларын ыыта иликтэр. Билигин да бириэмэ баар. Бу курдук, атын да хамаандалар састааптара билиннэҕинэ, сайтпытыгар биллэрэн иһиэхпит.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *