Куорат комплекснай спартакиадатыгар ханнык уокурук бастыай?

Дьокуускай куорат уокуруктарын уонна куорат кытыытынааҕа нэһилиэнньэлээх пууннарын икки ардыларыгар 2009 сылтан саҕалаан үгэс быһыытынан сыллата ыытыллар комлекснай спартакиада түмүктүүр түһүмэххэ тахсан эрэр. Аны, бырагыраама быһыытынан буулдьанан ытыы уонна бильярд көрүҥнэригэр күрэхтэһиилэр хааллылар.

 

 

Санатан эттэххэ, комплекснай спартакиада – спорт тоҕус көрүҥэр сылы быһа ыытыллар. Ол курдук, уокуруктар икки ардыларыгар дьиэ кэргэн күрэхтэһиитигэр – Сайсары, волейболга эр дьоҥҥо – Губинскай, дьахталларга – Центральнай, баскетболга эр дьоҥҥо – Центральнай, мини-футболга – Гагаринскай, саахымакка уонна дуобакка – Октябрьскай, остуол тенниһигэр – Губинскай уокуруктар хамаандалара бастаабыттара.

Оттон куорат кытыытынааҕы бөһүөлэктэргэ: дьиэ кэргэн күрэхтэһиитигэр – Пригороднай, волейболга эр дьоҥҥо уонна дьахталларга – Хатас, баскетболга – Табаҕа, мини-футболга – Тулагы, саахымакка – Марха, дуобакка – Тулагы, остуол тенниһигэр – Хатас хамаандалара инники таҕыстылар.

Дьокуускай куорат физическэй култуураҕа уонна спорка управлениетын отделын начаалынньыга Саргылана Николаевна Игнатьева:

Уокуруктар уонна куорат кытыытынааҕа нэһилиэнньэлээх пууннар икки ардыларыгар комлекснай спартакиада спорт тоҕус көрүҥэр сыл устата ыытыллар. Билиҥҥи туругунан сэттэ көрүҥҥэ күрэхтэһиилэр түмүктэннилэр. Аны буулдьанан ытыы уонна бильярд күрэхтэһиилэрэ хааллылар. Сэттэ көрүҥ түмүгүнэн барыллааһын ааҕыынан уокуруктар икки ардыларыгар Губинскай, Сайсары уонна Октябрьскай уокуруктар инникилээн иһэллэр. Оттон иккис бөлөххө Марха, Хатас, Тулагы хамаандалара үс бириистээх миэстэни үллэстэр балаһыанньалаахтар.

Спартакиада сылтан сыл ахсын тыҥааһына күүһүрэн иһэрин бэлиэтиэххэ сөп. Бу тэрээһини ыытыыга биһиэхэ Дьокуускай куорат спортивнай оскуолалара, кинилэр тренердэрэ уонна преподавателлэрэ күүс-көмө, өйөбүл буолаллар. Спартакиада күрэхтэһиилэрэ сүрүннээн спортивнай оскуолалар саалаларыгар ыытыллаллар. Ити курдук, уокуруктар уонна пригородтар салайааччылара бу үлэҕэ эмиэ көхтөөхтүк кытталлар.

Кырдьык, комплекснай спартакиада – бу, элбэх киһини хабар маассабай күрэхтэһии. Борустуой үлэһит дьон чөл олоххо тардыһыытын  көстүүтэ диэххэ сөп. Күрэхтэһиилэр наһаа сытыытык, биир очукуону аахсыылаах, хайдах эрэ Олимпийскай оонньууга курдук тыҥааһыннаахтык ыытыллаллар. Дьон оннук көхтөөҕүттэн киһи астынар. Хас көрүҥ аайы кыайыылаахтар өйдөбүнньүк мэтээллэринэн, грамоталарынан наҕараадаланаллар. Оттон сыл түмүгүнэн кыайыылаах хамаандалар, инвентарь ыларга харчынан бириистэри тутуохтара.

Спартакиада чэрчитинэн, буулдьанан ытыыга күрэхтэһии сэтинньи 9 күнүгэр Дьокуускай куорат 4 №-дээх спортивнай оскуолатын тииригэр ыытыллар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *