Кыайыы күнүн чиэһигэр спортивнай күрэхтэр

Өрөбүл күннэргэ Өлөөҥҥө Аҕа дойду Улуу сэрииитигэр Кыайыы 74 сылыгар анаммыт кэккэ күрэхтэһиилэр тэриллэн ыытылыннылар.

Ол курдук, Кыайыы күнүгэр анаммыт Аҕа дойду сэриитин бэтэрээннэрэ Лукинов С.В. уонна Никифоров Г.Ф. бириистэригэр үгэс буолбут кросстар ыытылыннылар. Кыргыттар 2 км. сүүрүүлэригэр Караваева МарияКэнчээри» д/с) 9 м 00 сөк. кэлэн холкутук бастаата, киниттэн 11 сөк. хаалан 2 миэстэни Петрова Стелла (Өлөөн орто оскуолата, 11 кыл.) ылла, 3 миэстэҕэ 9 мүн 22 сөк. кердербут Петрова Инна (Өлөөн орто оскуолата, 7 кыл.) тигистэ.

Эр дьон 5 км. сүүрүүлэрэ эрийсиилээх соҕус буолла. Ол эрэн биэтэккэ бастакынан 19 мүн. 20 сөк. көрдөрүүлээх кэлэн Семенов Боря (Өлөөн орто оскуолата, 11 кыл) кыайыылааҕынан буолла. 2-3 миэстэлэри кинини тилэх баттаһа кэлбит Федоров Альберт (РЭС) – 19 мүн. 22 сөк. уонна Петров Михаил (ӨлөөнСитим) – 19 мүн. 27 сөк. ыллылар.

Үлэ кэлэктииптэрин ортотугар ыытыллыбыт эстафетаҕа 6 хамаанда кытынна. «Кыайыы Кубогын» хаһаайынынан бы сырыыга Баһаарынай чаас уонна «Чипичакан» оҕо уһуйаанын холбоһук хамаандата буолла. Кинилэр этаптарын 6 мүн. 09 сөк. түмүктээтилэр. ДьУоКХ хамаандата 6 мүн. 12 сөк. кэлэн 2 миэстэни ылары ситистилэр, онтон РЭС хамаандатын сүүрүктэрэ 6 мүн. 18 сөк. кэлэн 3 миэстэни эрэллээхтик ыллылар.

Ыам ыйын 09 күнүгэр ДЮСШ спортивнай саалатыгар Аҕа дойду сэриитин кыттыылааҕа Софронов П.С. бирииьигэр буулдьанан ытыыга кыраҕы харахтаах чулуу ытааччылар күрэхтэстилэр. Бу спорт уустук көрүҥэр эр дьоҥҥо Эйик бэрэстэбиитэллэрэ күннээтилэр — 1 миэстэни Соломонов Спиридон, 3 миэстэни Боеков Игнатий ыллылар. 2 миэстэни Харыйалаах бэрэстэбиитэлэ Павлов Ильфред ылла. Кэрэ аҥардар ортолоругар 1 миэстэни Васильева Ариана (Өлөөн орто оскуолата), 2 миэстэни Христофорова Ульяна (Харыйалаах) уонна 3 миэстэни Степанова Василина (Өлөөн орто оскуолата) ыланнар кыайыы өрөгөйүн биллилэр.

Ыам ыйын 10 күнүгэр «Илкит» ЭКК бильярднай саалатыгар эр дьоҥҥо уонна бэтэрээннэргэ бильярдка «Кыайыы Кубога» буолан ааста. Сыралаах киирсиилэр түмүктэригэр 1 миэстэни Гоголев Геннадий, 2 миэстэни Никифоров Александр, 3 миэстэни Скороходкин Дмитрий (бары Өлөөн) ылары ситистилэр.

55 аҕа саастаах бэтэрээннэр ортолоругар 1 миэстэни Николаев Аркадий, 2 миэстэни Спиридонов Иван, 3 миэстэни Николаев Василий (бары Өлөөн) ыланнар балайда бэлэмнээхтэрин көрдөрдүлэр.

Ыам ыйын 12 күнүгэр «Илкит» ЭКК-ҥэ мини-футболга үлэ кэлэктииптэрин икки ардыларыгар 2 күннээх «Кыайыы Кубога» күрэх ыытыллан түмүктэннэ. 6 хамаанда киирсибититтэн финалга МЧС уонна Өлөөн орто оскуолатын хамаандалара күөн көрүстүлэр. Тэҥ, ыалдьааччылар өттүлэриттэн ыһыылаах-хаһыылаах, тыҥааһыннаах киирсиигэ 9-6 ахсаанынан кыайан, Кубок хаһаайынынан МЧС хамаандата буолла. 3 миэстэни «Администрация» холбоһуктаах хамаандата ылла. Күрэх түмүгүнэн чулуу оонньооччуларга анал бириистэри туттардылар: «Лучший вратарь» номинация — Михайлов Антон (МЧС), «Лучший защитник» — Лукинов Слава ( Өлөөн орто оскуолата), «Лучший бомбардир» — Семенов Владислав (Администрация).

Эмиэ бу күн ДЮСШ спортивнай саалатыгар остуол тенниһигэр спорт бэтэрээннэрэ Игнатьев Е.В. уонна Типянова Н.Н. бириистэригэр оройуон чемпионата ыытылынна.

Дьахталлар ортолоругар күрэхтэһии сүрдээх хатыһыылаахтык ааста эрээри оройуон күүстээх оонньооччулара бу да сырыыга иннилэрин кимҥэ да биэрбэтилэр. Ол курдук 1 м – Александрова Лена, 2 м – Трофимова Алена, 3 м – Малгатаева Дора (бары Өлөөн) ыллылар.

Эр дьоҥҥо финалга Скороходкин Дмитрий (Өлөөн) Федоров Владимиры (Өлөөн) кыл мүччү 3-2 ахсаанынан хотон уочараттаах кыайыытын сурунна. 3 миэстэни эрэллээхтик, үчүгэй оонньууну көрдөрөн, Өлөөн орто оскуолатын 9 кылааһын үөрэнээччитэ Семенов Алгыс ылла.

Д.Скороходкин, газета «Сардаҥа» 

Добавить комментарий

Ваш адрес email не будет опубликован. Обязательные поля помечены *