Кыайыы хоһоонноро

Н.М. Заболоцкай 110 сааһын туолар үбүлүөйүгэр аналлаах «Үчүгэй сиригэр Чысхаан ааҕыылара» диэн Өрөспүүбүлүкэтээҕи тэрээһиҥҥэ «Өймөкөөн ньургуһуннара» айар үлэ күрэҕэр бастыҥ аатын ылбыт Боронук орто оскуолатын 10 кылааһын үөрэнээччилэрин хоһоонноро.

Эһэм суруга

Хайа, доҕоор, хайдаххыный?

Бу кырдьаҕас эһэҥ суруйабын.

Бу суругу ааҕыаҥ, миигин көрдүүр,

Саныыр, таптыыр киһи буолуоҥ.

Төрөөбүтүм кыракый дэриэбинэҕэ,

Дьулуспутум билиигэ, үөрэххэ.

«Үөрэх баар – бараммат баай» диэн аргыстаах

Дьулуруйбутум инникигэ эрэллээх.

Сэрии… Иэдээннээх сэрии ону быспыта…

Сэриигэ барар буолбутум,

Саа диэн сэби туппутум.

Кырыыстаах фашиһы утары

Ийэ Дойдум иһин кыа хааммын тохпутум.

Умсубуттара эдэркээн доҕотторум

Сэрии хааннаах толоонугар,

Иэстэспитим ону мин

Кыыллыйбыт фашистары имири эһэн.

Хааллым бу ыраах дойдуга

Хара буор кырсынан бүрүллэн.

Хас киһи инники эрэлэ

Сыыска-буорга тэпсиллибитэй?

Хас эдэркээн киһи

Дьиэтигэр төннүбэтэҕэй?

Мин оҕом! Мин сиэним! Иһит!

Олорботох олохпун эн салҕаа!

Билбэтэх билиибин үөрэтэн,

Туһалаа дойдугар, норуоккар!

Егор Юмшанов

*******

Хайгыыбын эр санаалаах хоһууттары

Сэрэтиитэ суох сэриинэн

Саба түстүлэр хара дьайдаахтар…

Оо, оҕону оҕо диэбэттэр,

Оҕонньору оҕонньор диэбэттэр…

Аһымматтар ээ, кими да!

Өһүөннээх фашист буойуттара

Өһөхтөөх өлүү түгэҕин абааһыларыныы

Киһи-аймах ийэ кутун

Саһа сылдьан сиэтилэр:

Лыаҕы эккирэтэн оонньуу сылдьар

Кыракый кыысчаан олоҕун,

Сиэтэлэспит уоллаах кыыс

Үөрүүнэн туолбут сүрэхтэрин!

Хотойдорго холоонноох,

Хорсун-хоодуот санаалаах,

Эр хааннаах буойуттар туруннулар,

Уот Солбонуку айаҕыттан

Төрөөбүт ийэ буор сирдэрин көмүскүү.

Тэргэттэр ытар тыастара

Ыраахтан иһиллэр ньириһийэн,

Эйэлээх олох иһин

Кыргыһаллар дьоруойдар.

Кылгас тохтобул кэмигэр

Окуопа иһигэр сытаннар,

Саныыллар чугас дьоннорун,

Суруйаллар ахтылҕан тыыннанан.

Онтон эмиэ сэрии… хааннаах кыргыс…

Хоһуун санаалаах саллааттар

Хонууга охтубуттара.

Кинилэри солбуйа кэлбитэ

Дойдубут эдэр ыччата.

Хаан-хааҥҥа! Тыын-тыыҥҥа!

Хара буор сирэйдээтилэр хааннаах фашиһы.

Кыайыы! Төһөлөөх кэтэстибит этэй? Кыайыы-ыы!

Хайгыыбын эр санаалаах хоһуун дьону!

Махтанабын эйэлээх олох иһин,

Олохторун толук уурбут Буойуттарга!

Афанасий Потапов

«Дьааҥы аартыга» 

Добавить комментарий

Ваш адрес email не будет опубликован. Обязательные поля помечены *