Кыайыы ырыалара.  «Катюша» бастакы тылбааһа

Аҕа дойду улуу сэриитин биир символынан буолбут, номоххо киирбит  «Катюша» диэн ырыаны киһи барыта билэр. Дьон үксэ бу ырыаны норуот айбыта буолуо диэн сабаҕалыыр эрээри, ырыа автордара биллэллэр. Улуу Кыайыы 75 сылыгар 82 «сааһын туолбут» «Катюша» ырыа тылын  поэт Михаил Исаковскай  1938 с. суруйбут. Икки куплеты суруйан баран салгыы айар музата киирбэккэ поэт хоһоонун туора уурбут. Исаковскай биирдэ композитор Матвей Блантеры көрсөн баран ситэриллибэтэх хоһоонун киниэхэ биэрбит. Композитор хоһоону тута сөбүлээн музыкатын айбыт уонна поэты хоһоону ситэр диэн көрдөспүт. Дьэ ити курдук норуот тапталлаах ырыата үөскээбит. Аҕа дойду улуу сэриитин кэмигэр «Катюша» ис хоһооно элбэхтик уларыйбыт эрээри билигин үксүн поэт Исаковскай тылларынан ылланар. Ыраах заставаҕа сулууспалыыр тапталлааҕын күүтэр Катюша кыыс туһунан  ырыа сценаҕа ылланаат тута дьон сүрэҕин туппут. Бу ырыаны аан бастаан толорбут дьоннорунан Лидия Русланова, Вера Красовицкая уонна  Валентина Батищева буолаллар. Кинилэртэн хайалара аан бастаан «Катюшаны» киэҥ көрөөччүгэ таһаарбытын туһунан билигин да мөккүһэллэр. Ол эрэн 1939 с. пластинкаҕа бу ырыаны Валентина Батищева киллэрбитэ биллэр.

Сахаларга «Катюша» тылбааһын оҥорбут киһинэн суруналыыс Михаил Капустин буолар. М. Капустин тылбааһа «Эдэр бассабыык» хаһыакка 1940 с. тахсыбыт. Ол аата ырыа ылламмыта үһүс сылыгар. Ырыа талааннаах тылбаасчыта, суруналыыс Михаил Дмитриевич Капустин кэлин «Кыым» хаһыакка отдел сэбиэдиссэйинэн үлэлээбитэ биллэр.

Надежда Аргунова

Добавить комментарий

Ваш адрес email не будет опубликован. Обязательные поля помечены *