Кыайыылаахтар “Орлёнок” лааҕырга сынньанан кэллилэр

В.П. Ларионов аатынан Майа орто оскуолатын үөрэнээччилэрин хомуур хамаандата атырдьах ыйыгар Дьокуускай куоракка ыытыллыбыт Бүтүн Россиятааҕы бэрэсидьиэн спортивнай оонньууларыгар кыайыылаах үрдүк аатын сүгэн, «Орлёнок» лааҕырга 20 путевканан наҕараадаламмыттара. Салайааччылар, физкультура учууталлара: Дмитрий Брызгалов уонна Игнат Прохоров.

 

 

Оонньуу түөрт түһүмэхтэн турар: оскуола иһинээҕи, муниципальнай, улуус уонна регион таһымнаах. Күрэхтэһии чэрчитинэн хамаандалар баскетбол, остуол тиэнниһэ, дуобат, чэпчэки атлетика көрүҥнэргэ күөн көрүстүлэр. Кыайыылаах хамаанда балаҕан ыйын 9-29 күннэригэр дойдубут бастыҥ лааҕырыгар сылдьан, күрэхтэһэн, араас тэрээһиннэргэ кыттан, Хара муора кытылыгар сөтүөлээн астынан-дуоһуйан кэллилэр.

Регионнааҕы этапка ыытыллыбыт көрүҥнэр таһынан, спортсменнар баҕа өттүлэринэн  лаптаҕа, гандболга, городошнай спорка күүстэрин холоннулар.

Үөрэнээччилэр киэҥ сиргэ сылдьан сайдан, элбэҕи билэн-көрөн кэлиилэригэр күүс-көмө буолбут ытыктабыллаах салайааччыларбытыгар: СР үөрэх уонна наука миниистиригэр Владимир Анатольевич Егоровка, миниистир солбуйааччыта Владимир Иванович Тихоновка, иитии уонна эбии үөрэхтээһин отделын салайааччыта Ольга Анатольевна Яшинаҕа, Физическэй култуура уонна спорт сайдыытын Киинин дириэктэригэр Афанасий Имматулович Андреевка, старшай методист Юрий Васильевич Романовка, Мэҥэ Хаҥалас  улууһун үөрэҕин салалтатын начаалынньыга Ирина Васильевна Черкашинаҕа, иитии уонна эбии үөрэхтээһин отделын сүрүн исписэлииһигэр Николай Николаевич Бугаевка оскуола салалтатын, төрөппүттэр, үөрэнээччилэр ааттарыттан махталбытын тиэрдэбит.

Изабелла РОМАНОВА.

Добавить комментарий

Ваш адрес email не будет опубликован. Обязательные поля помечены *