Лоскуйдартан оһуордар

Кыбытыктаах тигии баай фантазия «хонуута» эрэ буолбакка, иистэнньэҥ маастарыстыбатын туоһулуур ньыма биир көрүҥэ. Муус устар ый бүтүүтэ А.Е. Кулаковскай аатынан норуоттар доҕордоһууларын дьиэтигэр XI төгүлүн ыытыллар «Лоскутная мозаика Якутии» быыстапкаҕа 20 улуустан тарбаҕар талааннаах 95 бастыҥ маастардар үлэлэрэ дьон дьүүлүгэр тахсыбыта. Кыайыылаахтар Иваново куоракка XII төгүлүн ыытыллар бүтүн Россиятааҕы «Лоскутная мозаика России» быыстапкаҕа кыттар чиэскэ тиксибиттэрэ. «Лоскутная мозаика России» дойду үрдүнэн киэҥ далааһыннаахтык ыытыллар, биллэр-көстөр быыстапка буолар. Быйылгы сыллааҕы «Лоскутная мозаика Якутии» быыстапка кыайыылаахтарынан:

Тааттаттан Мария Петровна Федотова гран-при;

Томпоттон Оксана Тимофеевна Степанова бастакы степеннээх диплом;

Өлүөхүмэттэн Яна, Ия Робертовна Чемпосовалар иккис степеннээх диплом;

Уус Алдантан Татьяна Гаврильевна Дегтярева үһүс степеннээх диплом буолбуттар.

Азияна Филипповна Харлампьева, «Симэх» норуот искусствотын киинин специалиһа, норуот маастара:

Кыбытыктаах тигиинэн кэнники кэмҥэ үчүгэйдик ылсан үлэлээн эрэллэриттэн киһи үөрэр. Үгэскэ кубулуйбут үс уонна көнө муннуктан тахсан араас хартыыналары оҥорор буоллулар. Кэнники кэмҥэ аҥардас сукунанан эрэ буолбакка, органзаны, габардины кытары туһанар буоллулар. Урут ат симэҕин киэргэтэн тигэр эбит буоллахтарына, билигин панноҕа үчүгэйдик үлэлээн эрэллэр. Бу быыстапкаҕа баҕалаах барыта кыттар эрээри, киирбит үлэлэри сүүмэрдиибит. Холобур, тигиитэ мөлтөх, кирдээх буоллаҕына ылбаппыт. Хас биирдии үлэ олус дириҥ суолталаах. Кыбытыктаах тигии тиэхиникэнэн маллаах иһит, суумка арааһын, сыттык, оннооҕор оонньуур кытары тигэр буолбуттарын киһи сөҕө көрөр.

Дегтярева Татьяна Гаврильевна (Уус Алдан)

Таҥас сыыһынан ойо быһан тигии. Бу олус уустук тиэхиникэ. Маннык тиэхиникэнэн ньэмин үчүгэйдик билэр киһи тигэр.

 

 

Федотова Мария Петровна, «Алгыстаах күөх Тааттам» (Таатта)

Бу үлэҕэ маастар өҥү олус таба туһаммыт, быысапканы дьүөрэлээбит. Олус үчүгэй үлэ.

 

 

 

Ия, Яна Робертовна Чемпосовалар, «Туундара кырасаабыссата» (Өлүөхүмэ)

Хоту дойду хоһуун кыыһа национальнай таҥаһын таҥнан турарын санатар.

 

 

«Мүрү оһуора» түмсүү, сал. Бочкарева Е.М. (Уус Алдан)

Түмсүүлэргэ араас характердаах, буочардаах киһи баар буолар. Онтон бу ураһаны 10-ча киһи тикпит диэн көрбөккүн, биир киһи оҥорбутун курдук тигиллибит ураһа. Бу аата кинилэр үрдүк маастарыстыбаларын, салайааччы сатабылын туоһулуур.

 

 

Степанова Оксана Тимофеевна (Томпо)

Хас биирдии киллэһигин сыныйан тикпит, аккуратнай үлэ. Аан дойду таһымыгар таһаарыахха сөптөөх үлэ.

 

 

«Уран» түмсүү, сал. Миронова Е.Т. «Килэҥки» (Чурапчы)

Интэриэһинэй толкуйдаах үлэ. Нэһилиэнньэ тугунан «тыынан-аһаан» олорорун ойуулаабыттар. Улуус гиэрбэтин өҥүгэр дьүөрэлээн оҥоһуллубут.

 

 

 

Полятинская Кристина Петровна (Кэбээйи)

Эдэр оҕо үлэтэ диэтэххэ олус үчүгэй. Кэннибитигэр кэнчээри ыччаттаах буоламмыт саҥаттан-саҥа маастардар тахсан иһиэхтэрэ диэн эрэнэбит.

 

 

«Удьуор утум» түмсүү, «Байанай алгыһа» (Бүлүү)

Хас биирдии дэтээл кыбытыы, биир да аппликация суох. Тигиитэ олус ыраас, маастарыстыбаларын үчүгэйдик көрдөрбүттэр.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Добавить комментарий

Ваш адрес email не будет опубликован. Обязательные поля помечены *