«Кэбээйи түөлбэтин номохторо» сонун кинигэни сүрэхтээтилэр

«Хас улуус, нэһилиэк аайы былыргы сэһэннэри, үһүйээннэри өйдөрүгэр тута сылдьар уонна ону дьоҥҥо-сэргэҕэ тиэрдэр сээркээн сэһэнньиттэр баар буолаллар» диэн тыллартан саҕаланар аан тыллаах «Кэбээйи түөлбэтин номохторо» кинигэни улуустааҕы кыраайы үөрэтэр музей дьиэтигэр сүрэхтээтилэр. Бу ураты кэрэхсэнэр кэпсээннэрдээх, сэппэн-сэһэннэрдээх кинигэ ааптарынан убаастанар учуутал, кыраайы үөрэтиигэ бэлиэ кылаатын киллэрбит уонна билигин да ыллыктаах тылынан, сүбэтинэн туһаны аҕала олорор Григорий Антонович Сметанин буолар. 


Кэбээйи олохтооҕо Григорий Антонович Сметанин номохторо, кэпсээннэрэ хаһыаттарга, кинигэлэргэ үгүстүк бэчээттэммиттэрэ. Маны барытын РФ суруйааччыларын сойууһун чилиэнэ Иосиф Григорьевич Кобяков түмэ тардан, биир кинигэ гына сааһылаан бэлэмнээн таһаартарда.

«Мин бу кинигэни түмэр санаам убайым Иван Петрович Кобяков эппититтэн күөдьүйбүтэ», – диир Иосиф Григорьевич. Григорий Антонович үгүс элбэх номохтору өйүгэр илдьэ сылдьарын уонна ол сэһэнэ-сэппэнэ олохтооҕун, былыргыны итинник ыраас лиискэ ырылыччы ууран биэрэр киһи олох эриэккэс буоларын туһунан кэпсэтииттэн саҕаланан, бу кинигэ күн сирин көрөн Кэбээйи олохтоохторугар күндү бэлэх буолла.

Кинигэ сүрэхтэниитигэр түмсүбүт Григорий Антонович бииргэ үлэлии сылдьыбыт үөлээннээхтэрэ – кырдьаҕас учууталлар Дария Софроновна Кокорева, Анна Петровна Эверстова, Руслан Герасимович Попов ааптар туһунан итии-истиҥ тыллары эппиттэрин таһынан, өссө биир кинигэни бэчээттэтэргэ бэлэмнэнэригэр накаас биэрдилэр.

Кырдьаҕас учууталы, кинигэ ааптарын Григорий Антоновиһы олоҕун биир бэлиэ түгэнинэн эҕэрдэлээтилэр Кэбээйи орто оскуолатын кэлэктиибэ, профкома, олохтоох дьаһалта, үөрэппит оҕолорун ааттарыттан Григорий Константинович Егоров, «Күбэйэ» эбээлэр түмсүүлэрин салайааччыта Мария Семеновна Максимова, дьахтар сэбиэтин бэрэссэдээтэлэ Варвара Петровна Протопопова, үөлээннээҕэ Анастасия Федоровна Левина уонна да элбэх бииртэн-биир кини сэһэннэрин сэҥээрээччилэр, кэпсээннэрин кэтэһээччилэр.

Кинигэ «Дани-Алмас» хампаанньа ХЭТ 100 экземплярынан бэчээттэннэ. Манна Кэбээйи сирин-уотун, биирдиилээн аҕа уустарын, дьон-сэргэ тустарынан үһүйээннэр, ахтыылар киирбиттэрин таһынан Григорий Антонович бэйэтин туһунан ахтыылар эмиэ бааллар. «Кэбээйи түөлбэтин номохторо» ааҕааччы киэҥ араҥатыгар ананна.

Ааптар: Татьяна Максимова-Лазарева

Сообщение «Кэбээйи түөлбэтин номохторо» сонун кинигэни сүрэхтээтилэр появились сначала на Ulus.Media — все главные новости из районов Якутии.

Комментарии закрыты.