Кыргыдай баһылыгын бирииһигэр волейбол

Бүлүү. Кыргыдай нэһилиэгин баһылыга Семен Григорьев көҕүлээн тэрийэр волейболга күрэхтэһиитигэр быйыл 13 хамаанда Дьокуускай куораттан, Үөһээ Бүлүү улууһуттан, ону сэргэ Бүлүү улууһуттан:Кыргыдай, Дьөккөн, Бороҕон, Лөкөчөөн уонна Бүлүү куораттан тэрилтэлэр хамаандалара икки күн устата «Эрчим» спортивнай комплекска волейболга эр дьоннорго аһаҕас турнир буолла.

 

 

Кыргыдайдар волейбол курдук өрө күүрүүлээх, ыһыылаах-хаһыылаах, спорт маассабай көрүҥүн нэһилиэнньэ ортотугар көҕүлээннэр иккис сылларын маннык күрэхтэһиини тэрийдилэр.

Кыргыдай нэһилиэгин баһылыга Семен Спиридонович Григорьев:

Былырыын Кыргыдайга тэрийбиппитигэр хамаанданан кыттыы аҕыйаҕа, онон улуустааҕы спорт комитетын өйөөһүнүнэн быйылгы турниры Бүлүүгэ оҥордубут. Күрэхтэһиибитигэр Дьокуускайтан биир дойдулаахтарбыт хамаанда тэринэн кэллилэр. Ыаллыы улууспутуттан кэлэннэр, күрэхтэһиибитин лаппа киэргэттилэр. Мин финальнай оонньууну кэлэммин көрдүм. Күрэхтэһиигэ көрөөччү элбэх эбит. Кыайыы иһин киирсиилэр сытыы буолан биэрдилэр, — диэн санаатын үллэһиннэ.

Үһүс миэстэ иһин Үөһээ Бүлүү уонна Бүлүү хамаандата кииристэ. Бэрт кыранан кыайыы өрөгөйүн үөһээ бүлүүлэр быһа охсон ыллылар.

Бастакы миэстэни Дьокуускайтан кэлбит «Спартак»хамаанданы кытта Бүлүү сүүмэрдэммит хамаандата кыайыы иһин хатыһыылаахтык, элбэх кыраһыабай туруоруулардаах, сытыы быһыылардаах киирсии түмүгэр, Дьокуускайтан кэлбит биир дойдулаахтарбыт хамаандата кыайаннар, барыбытын үөртүлэр.

Күрэхтэһии түмүгүнэн кыайыылаахтарга мэтээллэри, сыаналаах бириистэри Кыргыдай нэһилиэгин дьаһалтата туттарда.

Күрэхтэһии кэмигэр хамаанда иһин кыайыыга дьулуурдаахтык оонньообут спортсменнарга нэһилиэк баһылыга Семен Григорьев олохтоох «Кыргыдай» СХПК туруорбут арыынан бирииһин уонна бэйэтэ туруорбут харчынан бириистэрин туттартаата.

Түмүккэ, республика физкультураҕа уонна спорка министирэ Иннокентий Григорьев бырабыыталыстыба отчуотун кэмигэр нэһилиэнньэ спордунан дьарыктаныытын маассабаһын 50 бырыһыаҥҥа таһаарар соругу эппитин, биһиги бүлүүлэр, кыргыдайдар курдук, волейбол, баскетбол, футбол, сүүрүү курдук спорт маассабай көрүҥнэринэн ити соругу толорор кыахтаахпытын кыргыдайдар итэҕэтиилээхтик көрдөрдүлэр.

Андрей ЯКОВЛЕВ.

Бүлүү.

Добавить комментарий

Ваш адрес email не будет опубликован. Обязательные поля помечены *