Кыстатыам ыала «Ветеранское подворье» өрөспүүбүлүкэтээҕи күрэххэ кыайда

«Ветеранское подворье»  диэн өрөспүүбүлүкэтээҕи кэтэхтэн күрэх түмүгүнэн Эдьигээн оройуонун Кыстатыам нэһилиэгин олохтооҕо Надежда Сергеева бастыҥ тиэргэннээх хаһаайка буолан кыайыылаах аатын ылла. Биллэрин курдук бу куонкурус СӨ сэрии уонна үлэ бэтэрээннэрин сэбиэтин тэрийиитинэн сылын аайы ыытыллар.


«Ветеранское подворье» диэн үтүө үгэскэ кубулуйбут өрөспүүбүлүкэтээҕи кэтэхтэн күрэх түмүгэ бу күннэргэ билиннэ. Манна дьахталлар 50 үөһэ, эр дьон 55 үөһээ саастаах, тыа сиригэр олорор, кэтэх хаһаайыстыбалаах дьон кытталлар. Ол эрэн регистрациялаах фермердар хабыллыбаттар. Күрэххэ тиэргэн кэрэ көстүүтэ, дьиэ кыылларын иитии, үүнээйи арааһа баара, оҕуруот аһын олордуу, тыа хаһаайыстыбатын быыстапка-дьаарбанкатыгар, оройуон, нэһилиэк уопсастыбаннай олоҕор кыттыы сыаналанар. Кыттааччылар зоналарынан 4 бөлөххө арахсан күрэхтэстилэр. Ол курдук, төрдүс бөлөххө Анаабыр, Өлөөн, Аллайыаха, Абый, Булуҥ, Эдьигээн, Усуйаана, Аллараа Халыма улуустарын ортолоругар Эдьигээн оройуонун Кыстатыам нэһилиэгин олохтооҕо Надежда Сергеева бастыҥ тиэргэннээх хаһаайканан ааттанан кыайыылааҕынан таҕыста.

«Нулгин» ЭКК салайааччыта Сергеева Надежда Николаевна кэргэнинээн Львов Василий Николаевичтыын уруккуттан да кэрэ көстүүлээх тиэргэннэрин биир дойдулаахтара сөҕө-махтайа көрөллөр. Бу ыал дьиэтэ уурбут-туппут курдук үрэх үрдүгэр Кыстатыамҥа киириигэ турар. Сайынын бэрт тупсаҕай көстүүлээх тиэргэҥҥэ хаһаайка сибэкки, мас, оҕуруот аһын арааһын олордор. Надежда Николаевна бэйэтэ санаатын хоту толкуйдаан, улахан тапталынан тиэргэнин киэргэтэ, уура-тута сылдьарын сөбүлүүр.

Кини үүнээйилэрэ ураты, кэрэ көстүүлээх иһиттэргэ силигилииллэр. Хаһаайка күрүөтүн-хаһаатын, үүнээйилэрин иһиттэрин кырааскалаан, уруһуй эбэн, саҥа тыыннаан киһи сэргии көрөр. Тиэргэҥҥэ олорор дьиэни таһынан араас тутуулар бааллар. Ол баанньык, сайыҥҥы кухня, икки тэпилииссэ, душ, икки гараж кырааскаланан, оһуорданан тиэргэн эмиэ биир кэрэ көстүүлэринэн буолаллар. Маны сэргэ Надежда Николаевна туспа кыра дьиэҕэ дьиэ кэргэнин Сергеевтар музейдарын тэрийбитэ. Кини элбэх оҕолоох Сергеевтар дьиэ кэргэттэригэр төрөөбүт буолан төрөппүттэрин, бииргэ төрөөбүттэрин малларын-салларын, хаартыскаларын чугас дьонун олоҕун-дьаһаҕын, ситиһиилэрин сырдатар, үйэтитэр сыаллаах кыра музей-дьиэ тэринэргэ санаммыта. Онон ыалдьыттар бу музейы көрөн-истэн ааһаллар.

«Мин бэйэм дьиэбин киэргэтэрбин, тиэргэммин оҥосторбун олус сөбүлүүбүн. Онно миэхэ кэргэним күүс-көмө буолар. Киһи сырдык-ыраас, кэрэ көстүүлээх дьиэҕэ, тэлгэһэҕэ олороруттан, сылдьарыттан сынньанар, чэпчиир, санаата ыраас, дьоллоох буолар дии саныыбын. Оччоҕо киһи бу сиргэ ситиһиилээх, таһаарыылаах үлэлээх, чугас дьонугар сылаас сыһыаннаах буолар. Мин тэлгэһэбэр «Ырай муннуга» диэн баар, онно биһиги дьиэ кэргэнинэн, ыалдьыттар кэллэхтэринэ чэйдиибит, истиҥник олорон сэһэргэһэбит, сынньанабыт. Ону сэргэ оҕуруот олордор сирдээхпин, хортуоппуй үүннэрэр учаастактаахпын. Аҕыйах да буоллар бүтүннүү хатыҥ үүнэн турар чараҥнаахпын, онно хаптаҕас, уохта үүнэллэр. Өссө биир киэн туттуум жимолость, бузина, рябина, бэс мас, сардаана сибэкки тэлгэһэбэр силигилии үүнэллэрэ буолар. Дойдубун, дьоммун таптыыр буоламмын тулалыыр эйгэбин кэрэ оҥоро сатыыбын», — диэн санаатын үллэстэр «Ветеранское подворье» күрэх кыайыылааҕа.

Ааптар: Мария Аполлонова

Сообщение Кыстатыам ыала «Ветеранское подворье» өрөспүүбүлүкэтээҕи күрэххэ кыайда появились сначала на Ulus.Media — все главные новости из районов Якутии.

Комментарии закрыты.