ЛЕОНИД ПОПОВ СҮҮС СЫЛЫГАР

Атырдьах ыйын 14 күнүгэр П.А. Ойуунускай аатынан литературнай музейга киэҥ ааҕааччы кутун-сүрүн туппут, истиҥ иэйиитин ырыа гынан көтүппүт саха норуодунай бэйиэтэ Леонид Попов төрөөбүтэ 100 сылыгар аналлаах «Илиибэр Эн илииҥ баар курдук…» диэн ахтыы киэһэтигэр элбэх киһи мустан, бэрт сэргэхтик уонна кэрэхсэбиллээхтик буолан ааста.

Ахтыы киэһэтин П.А.Ойуунускай аатынан литературнай бириэмийэ лауреата, суруйааччы Н.Е. Винокуров—Урусун аста уонна салайан ыытта. Кини Леонид Андреевич саха сэбиэскэй поэзиятыгар дьоһуннаах миэстэни ыларын бэлиэтээтэ, айар айымньыларын туһунан истиҥ, үтүө тыллары эттэ уонна норуодунай бэйиэт хас да ыарытын ыллаабытын мустубут дьон күргүөмүнэн ылластылар.

”Илиибэр Эн илииҥ баар курдук…” диэн Л.А. Попов олоҕун сырдатар, норуокка сөбүлэппит айымньыларын өлбөт-сүппэт тыынныыр сыаллаах ыытыллыбыт ахтыы киэһэтэ табылынна. Манна П.А. Ойуунускай аатынан литературнай музей дириэктэрэ, норуодунай суруйааччы Н.А. Лугинов, Саха култууратын уонна духуобунаһын миниистирэ Ю.С. Куприянов, «Саха сирин суруйааччылара» ассоциация бэрэссэдээтэлэ О.Г. Сидоров, Саха сирин Суруйааччыларын сойууһун бэрэссэдээтэлэ, норуодунай бэйиэт Н.И. Харлампьева, Саха Өрөспүүбүлүкэтин Суруйааччыларын сойууһун бэрэссэдээтэлэ, норуодунай бэйиэт И.В. Мигалкин, Леонид Попов сиэннэрэ: Изабелла Попова, Жанна Егорова, Сунтаар улууһуттан кэлбит делегация уо.д.а.  көхтөөхтүк кытыннылар. Кинилэр норуодунай бэйиэт Леонид Попов аатын киэн тутта ааттаатылар, олорбут олоҕуттан араас умнуллубат түгэннэри сылаастык санаан, ахтан аастылар уонна хоһооннорун аахтылар. Хас саха киһитин барытын долгутар ырыаларын Опера уонна балет тыйаатырын солиһа Зинаида Колодезникова уонна Саха Өрөспүүбүлүкэтин үтүөлээх артыыһа Анна Дьячковская көмүс куоластарынан ыллаан иһитиннэрэн үөртүлэр.

 

Иван ОСИПОВ.

Ааптар хаартыскаҕа түһэриилэрэ

Добавить комментарий

Ваш адрес email не будет опубликован. Обязательные поля помечены *