МАКАР ХАРА 105 СЫЛЫГАР

Олунньу 8 күнүгэр «Арчы Дьиэтэ» духуобунай култуура киинигэр Улуу Кыайыы 75 сылын көрсө Аҕа дойду Улуу сэриитин кыттыылааҕа, буойун поэт М.И. Кузьмин—Макар Хара төрөөбүтэ 105 сылыгар аналлаах «Иэйэр кутум – ийэ тылым» диэн литературнай-музыкальнай тэрээһин дьоро киэһэтэ бэрт сэргэхтик уонна кэрэхсэбиллээхтик буолан ааста.

Биэчэри «Арчы Дьиэтин» дириэктэрэ В.И. Бочонина салайан ыытта.  Манна Макар Хара төрөппүт кыыһа З.М. Кузьмина, П.А. Ойуунускай аатынан литературнай музей научнай үлэһиттэрин сэбиэдиссэйэ Н.Е. Винокуров—Урсун, «Чолбон» сурунаал редактора И.И. Осипов—Уйбаан Ойуур, Саха тылын быһаарыылаах улахан тылдьытын ааптара А.Г. Нелунов, Уолбаттан кэлбит анал делегация уо.д.а. көхтөөхтүк кытыннылар. Кинилэр буойун поэт Макар Хара аатын киэн тутта ааттаатылар, олорбут олоҕун араас умнуллубат түгэннэрин истиҥник санаан-ахтаан аастылар, араас түгэҥҥэ түспүт хаартыскаларын көрдөрдүлэр, саҥа тахсыбыт кинигэлэрин туһунан кэпсээтилэр уонна таптыыр поэттарын аата ааттана турарыгар эрэнэллэрин биллэрдилэр.

Үтүө киэһэ Макар Хара хоһооннорун ааҕыы уонна ырыаларын ыллааһын кэнсиэринэн түмүктэннэ.

 

                   Иван ОСИПОВ.

Ааптар хаартыскаҕа түһэриилэрэ

Добавить комментарий

Ваш адрес email не будет опубликован. Обязательные поля помечены *