Мас-рестлиҥҥэ аан дойду Кубогын кыайыылаахтара суруналыыстары кытта көрүстүлэр

Польша Пабьянице куоратыгар мас-рестлиҥҥэ аан дойду Кубогын бүтэһик быһаарыылаах түһүмэҕэ ыытыллан түмүктэннэ. Онно, биир дойдулаахпыт Николай Константинов сүрүн тренердээх Россия сүүмэрдэммит хамаандата үрдүк көрдөрүүнү ситистэ. Хамаанда састаабыгар Наталья Черноградская (55 кг), Василий Андросов (60 кг), Сергей Константинов (70 кг), Иннокентий Федоров (90 кг) – кыһыл көмүс, Эрчим Баппаҕай (125 кг) – үрүҥ көмүс, Екатерина Белолюбская (65 кг), Айсен Атастыров (80 кг) – боруонса мэтээллэринэн наҕараадаланнылар.

Күрэхтэһиигэ 22 дойдуттан 133 спортсмен кыттыыны ылла. Хамаанданан түмүккэ Россия бастакы, Кыргызстан иккис, Венгрия үһүс миэстэлэргэ таҕыстылар.

Санатан эттэххэ, мас-рестлиҥҥэ аан дойду Кубога – үс күрэхтэһииттэн турар. Ол быһыытынан күрэхтэһиилэр быйыл сайын бэс ыйыгар Бакуга (Азербайджан), атырдьах ыйыгар Алмалыкка (Узбекистан) уонна сэтинньигэ Пабьяницеҕа (Польша) буоллулар.

Онон үс күрэхтэһии түмүгүнэн 2019 сыл мас-рестлиҥҥэ аан дойду Кубогын хаһаайыттарынан буоллулар: дьахталларга 55 кг – Наталья Черноградская, 65 кг – Екатерина Белолюбская (иккиэн — Россия, Саха сирэ), 75 кг – Яна Васкова (Словакия), 85 кг – Назия Майлибашева, 85-тэн үөһэ кг – Дилдора Рахманова (иккиэн — Кыргызстантан), эр дьоҥҥо 60 кг – Василий Андросов, 70 кг – Сергей Константинов, 80 кг – Айсен Атастыров, 90 кг – Иннокентий Федоров (бары — Россия, Саха сирэ), 105 кг – Атайбек уулу Келдыбек (Кыргызстан), 125 кг – Роман Калинин, 125-тэн үөһэ кг – Виктор Колибабчук (иккиэн – Россия). Ити курдук, аан дойду Кубогын мэтээлэ барыта 14 дойду спортсменнарыгар тигистэ.

Бүгүн, сэтинньи 27 күнүгэр СР Спорка уонна физическэй култуураҕа министиэристибэтигэр кыайыылаах хамаанда тренердэрэ уонна кыттааччылара суруналыыстары кытта көрүстүлэр. Мас-рестлиҥҥэ өрүү күүс-көмө, өйөбүл буолар тэрилтэлэри бэлиэтээтилэр.

Көрсүһүүнү СР мас-рестлиҥҥэ федерациятын президенэ Геннадий Васильев бэйэтэ салайан ыытта. Кыайыылаах мадьынылары СР Спорка, физическэй култуураҕа миниистирин солбуйааччы Александр Бугаев, СР физическэй култуураҕа уонна маассабай спорка управлениетын начаалынньыга Альберт Мохов эҕэрдэлээтилэр. Кинилэр иһитиннэрбиттэринэн, Польшаҕа буолбут күрэхтэһии кэмигэр аан дойдутааҕы мас-рестлинг федерациятын мунньаҕа ыытыллыбыт. Онно эһиилги сыллааҕы үлэ-хамнас боппуруостарын, күрэхтэһиилэр былааннарын дьүүллэспиттэр. Көрсүһүүгэ эппиттэринэн, аны эр дьоҥҥо 65, 75 кг ыйааһыннар киирэн биэриэхтэрэ, онон масчыттар 12 оннугар 14 ыйааһыҥҥа (эр дьоҥҥо 9, дьахталларга 5) күрэхтэһиэхтэрэ. Корея уонна Чили аан дойдутааҕы мас-рестлинг федерациятыгар ылыллан, билигин барыта 47 дойду спорт бу көрүҥүн бэйэтигэр сайыннарар диэн иһитиннэрдилэр.

Россия хамаандатын кылаабынай тренерэ Николай Константинов: “Бу күрэхтэһиигэ хамаанда чилиэттэрэ бары бэйэлэрин олорор сирдэригэр тус дьарыктанан тиийэн кытыннылар. Анал үөрэтэр-эрчийэр түмсүү кыайан тэриллибэтэ. Кэнники сылларга омук спортсменнара биллэрдик сайыннылар. Кинилэр ордук, хамаанда бэриллээтин кытта түллэ түһэн баран, ньылбы тардан ылар ньыманы үчүгэйдик баһылаабыттар. Оттон биһиэннэрэ итиннэ хойутууллар. Аны туран, күүс-уох, эт-хаан өттүнэн быдан сайдыылаахтар. Ону биһиги Польшаҕа 80 кг ыйааһыҥҥа биһиги мадьыныларбытын Е.Пиконины, А.Атастыровы 2:0 ахсаанынан кыайбыт армянин Оганес Давтян холобуруттан көрөбүт. Итиэннэ биир итэҕэспит диэн, сүүмэрдэммит хамаанда анал экипировката суоҕа буолла”, — диэн бэйэтин санаатын үллэһиннэ.

Оттон Г.А. Васильев, федерация иһинэн анал бөлөх тэриллэн, мас-рестлины республикаҕа салгыы сайыннарар инниттэн улуустары кэрийэн тэнитэр үлэни ыытарга, федерациялара суох улуустарга федерациялары тэрийэргэ былаан баарын билиһиннэрдэ.

Итини тэҥэ, суруналыыс Владислав Коротов токоолоһуутунан, маннык хоруйдары иһиттибит: эһиилги аан дойду чемпионата сайын Туймаада ыһыаҕын кэмигэр ыытыллар диэн эрдэ этиллибит иһитиннэрии бырайыак быһыытынан киирбитин санаттылар. Ону тэҥэ А.Н. Бугаев иһитиннэрбитинэн, “Азия оҕолоро” норуоттар икки ардыларынааҕы спортивнай оонньуулары Монголия аккаастаабытынан, билигин түөрт дойду (Катар, Узбекистан, ОАЭ, Туркменистан) бэйэлэригэр тэрийэн ыытарга бэлэмнэрин биллэрбиттэр. Ол гынан баран, бу боппуруос билигин даҕаны аһаҕас. Саха сирин хамаандата, ол иһигэр хапсаҕайдьыт, мас тардыһааччы оҕолор былаан быһыытынан бэлэмнэниини бара сылдьаллар.

Дьэ, ити курдук, бүгүҥҥү көрсүһүүгэ киэҥ эйгэни хабан ыытылынна.

Петр ПАВЛОВ.

Ааптар хаартыскаҕа түһэриилэрэ.       

 

Добавить комментарий

Ваш адрес email не будет опубликован. Обязательные поля помечены *