Майаҕа – хаҥкылыыр, хоккейдыыр саҥа корт аһылынна

Ааспыт бээтинсэ киэһэ Мэҥэ Хаҥалас улууһун урукку киинигэр – Майа сэлиэнньэтигэр кэрэ-бэлиэ түгэн буолла. Үгүс киһи кэтэспит кыһыҥҥы хоккейдыыр анал корта үөрүүлээхтик аһыллан, олохтоохтор, ыччаттар үөрүүлэрэ баһаам. Бу бэлиэ түгэн туһунан биһиги сайтпытыгар “Манчаары” шайбалаах хоккей хамаандатын салайааччыта Алексей Иннокентьевич Неустроев маннык билиһиннэрдэ:

 

 

 

-“Манчаары” хамаанда тэриллибитэ үһүс сыла. Састааппытыгар 25 киһилээхпит, аҥаара – бэтэрээннэр. Үксүн өрөбүл күн Дьокуускай куоракка киирэммит, “Эллэй Боотур” Муус дыбарыаһыгар эрчиллэбит. Тренербит – Денис Чудинов. Былырыын республика чемпионатыгар иккис бөлөххө Хаҥалас хоккеистарын кэнниттэн иккис миэстэни ылбыппыт. Үһүс бириистээх миэстэҕэ уус алданнар тахсыбыттара. Ону тэҥэ Томпо улууһугар Мэҥэ Алдаҥҥа тиийэн, аһаҕас халлаан анныгар тэриллибит күрэхтэһиигэ кыайыылааҕынан буолбуппут.

Икки сыллааҕыта Нерюнгри куоракка, “Мечел” тэрилтэ ыскылаатыттан СР Спорка министиэристибэтиттэн анал суруктаах тиийэн, корт конструкциятын улахан массыынаҕа тиэйэн аҕалан, Майаҕа барытын иһэрдэн, таҥан, уутун кутан туруорбуппут. Ону улуустааҕы дьиэ-уот хаһаайыстыбатын тэрилтэтэ көмөлөһөн, ыччаттар уонна спортсменнар бары субуотунньуктаан үлэҕэ киллэрбиппит. Икки сыл устата итиннэ хоккейдаан, хаҥкылаан кэллибит. Оҕолор, ыччаттар түмсэллэригэр сүрдээх үчүгэй усулуобуйа тэриллэр.

Онтон быйылгы сылга “Үүнэр көлүөнэ” тэрилтэ өйөбүлүнэн, улуус дьаһалтатын баһылыга Н.П. Старостин уонна Майа сэлиэнньэтин баһылыга Д.И. Тихонов көмөлөрүнэн, саҥа корт Татарстан киин куоратыттан аҕалылынна. Ону “Бачыым” диэн Павел Никифоров салайааччылаах тэрилтэ дьоно үлэлээннэр уонна ыччаттар эмиэ субуотунньуктааннар, Майаҕа, урукку аҕыс кылаастаах оскуола оннугар Советскай уулуссаҕа оннун булан туруорулунна. Анна бетоннанна. Корт кээмэйэ: устата 60, туората 30 миэтэрэ буолан, Континентальнай хоккей лигатын (КХЛ) ирдэбилигэр толору эппиэттиир.

Сэтинньи 22 күнүгэр саҥа хоккейдыыр корту үөрүүлээхтик аһыы кэрэ-бэлиэ түгэнэ буолла. Үөрүүлээх чааска олохтоохтор, ыччаттар тоҕуоруһа муһуннулар. Манна улуус дьаһалтатын баһылыгын солбуйааччы Владимир Птицын, “Бачыым” тэрилтэ, Майа сэлиэнньэтин салалталара кыттыыны ыллылар. Биһиги, кэлбит дьоҥҥо хоккей оонньуутун албастарын көрдөрдүбүт уонна “Манчаары” хамаандабыт икки састаапка арахсан, табаарыстыы көрсүһүү быһыытынан хоккейдаатыбыт.

“Манчаары” хамаандаҕа чуолаан бэлиэтиэм этэ эдэр оонньооччу Арсен Кириллини, кини биһиги, мэҥэлэр биир бастыҥ ыччаппыт, ону таһынан дэгиттэр спортсмен Дмитрий Игнатьевы, кини биһиги хамаандабыт хапытаана. Балыктаахтан төрүттээх Николай Барабанов республика чемпионатыгар икки төгүл “Бастыҥ вратарынан” ааттаммыта. Бэтэрээннэрбититтэн Еремей Куприяновы, Дмитрий Григорьевы, Павел Петрову, Сергей Григорьевы, Константин Федоровы, Леонид Никитини уо.д.а. бэлиэтиибит. Оттон саамай үүннэн-тэһииннээн илдьэ сылдьааччыбыт, федерациябыт толорооччу дириэктэрэ Анатолий Кычкин буолар. Кини “Эллэй Боотурга” сырыыбытын, хаһан-ханна мустарбытын барытын быһаарааччы, илдьэр-аҕалар, кэпсэтиини ыытар тутаах киһибит.

Сүрдээх элбэх ыччаттар, устудьуоннар биһиги кортпутугар кэлэннэр, суруттараннар, хаҥкылыыллар, эттэрин-хааннарын чэбдигирдэллэр. Түгэнинэн туһанан, хоккейдыан баҕалаах олохтоох ыччаттары ыҥырабыт. Хоккей – тыа сирин ыччата сөбүлээн дьарыктанар көрүҥэ буоларыгар баҕарабыт.

Петр ПАВЛОВ.

Хаартыскаҕа: «Манчаары» хоккей хамаанда.

Добавить комментарий

Ваш адрес email не будет опубликован. Обязательные поля помечены *