Майаҕа эдэр боксуордар муһуннулар

Бу күннэргэ Майаҕа Манчаары аатынан успуорт комплекса Мэҥэ Хаҥалас буоксаҕа федерациятын көҕүлээһининэн улуустан төрүттээх, ССРС успуордун маастара,  СӨ үтүөлээх тириэньэрэ, элбэх спортсмены иитэн таһаарбыт  Сергей Степанович Ларионов кэриэһигэр буокса көрүҥэр эрэгийиэннэр икки ардыларынааҕы турнир ыытыллар. Күрэхтэһии балаҕан ыйын 24 күнүттэн 4 хонук устата тыҥааһыннаахтык ааһар былааннаах.


Железногорск (Иркутскай уобалас), Чита (Забайкальскай кыраай), Нижнеангарск (Бурятия өрөспүүбүлүкэтэ), Нерюнгри уонна Дьокуускай куораттартан, Уус Алдан, Хаҥалас, Чурапчы, Таатта, Нам, Бүлүү, Горнай, Ньурба уонна Мэҥэ Хаҥалас улуустарыттан 170-ча эдэр спортсмен кэлэн риингэҕэ төһө күүстээхтэрин көрдөрүөхтэрэ.

Улуустааҕы успуорт уонна физкултуура управлениетын начаалынньыга Константин Захаров уопсастыбаннас көҕүлээһининэн тэриллибит улахан тэрээһиҥҥэ спортсменнары аһынан-үөлүнэн хааччыйыыга «Дириҥ», «Хорообут», «Хоту» кэпэрэтииптэр, бириистэри туруорууга успуорт бэтэрээннэрэ, управлениелар кыттыбыттарын этэн туран, махтанна.

Турнир үөрүүлээх аһыллыытыгар улуус баһылыгын социальнай боппуруостарга солбуйааччы Николай Цыпандин,СӨ буоксаҕа федерациятын толорооччу дириэктэрэ Алексей Индеев, бастакы категориялаах судьуйа Ариан Монастырев, Сергей Степанович  кыра кыыһа Наталья Ларионова, успуорт бэтэрээнэ, буоксаҕа ССРС успуордун маастара, Сергей Степанович иитиллээччитэ  Дмитрий Шарин эдэр боксуордарга эҕэрдэлэрин тиэртилэр. Арассыыйа успуордун маастарын нормативын толорбутунан Евгений Мартыновка уонна кини тириэньэригэр Василий Шестаковка өрөспүүбүлүкэ буоксаҕа федерациятын аатыттан Махтал суругу уонна өйдөбүнньүк бэлэхтэри туттардылар.

Бастакытын ыытыллыбыт С.С.Ларионов кэриэһигэр турнир икки сылга биирдэ тэриллэн үгэскэ кубулуйуо. Ыраахтан-чугастан кэлбит эдэр спортсменнар бу турниртан эбиллэн, сайдан барыахтара.  

Ааптар: Виктория БЕЛОЛЮБСКАЯ.

Сообщение Майаҕа эдэр боксуордар муһуннулар появились сначала на Ulus.Media — все главные новости из районов Якутии.

Комментарии закрыты.