Мукучуга нэһилиэк күнүн түмсүүлээхтик тэрийдилэр

Бу күннэргэ Мукучу нэһилиэгин күнэ ыытылынна. Бүттүүн бырааһынньыкка түөлбэлэр, И.Е.Левин аатынан Танара оскуолата, “Дьулуур” сайыҥҥы Эбии үөрэх кыһатын лааҕыра, биирдиилээн дьон олус көхтөөхтүк кытыннылар. Бэйэлэрэ үүннэрбит, оҥорон таһаарбыт астарын – үөллэрин атыылаатылар, быыстапкаҕа туруордулар.


Ордук көхтөөхтүк Мукучу нэһилиэгин “Сарыал” түөлбэ (сал. Саввинова А.А.), “Чэчир” түөлбэ (сал. Софронеева Р.А.) олохтоохторо кытыннылар.

“Дайан” сынньалаҥ киинин үлэһиттэрэ хара ааныттан көрү-нары көҕүлүттэн тутан, араас көрдөөх куонкурустары тэрийдилэр. Ол курдук “Бадараан шоу” – эрэһиинэ саппыкы күрэҕэр А.А.Левчикова бастаата.

“Мин көлөм – көлөөскө” күрэххэ суһал көмө массыынатын курдук киэргэтиилээх “оччугуй эмчит” бастаата, ийэтэ Л.Лазарева.

“Итии шашлык” күрэххэ Ю.Н.Павлов кыайда.

Оҕо спортивнай оскуолата көрдөөх эстафетаны ыытта. Олохтоох бибилэтиэкэ (сал. Им И.Н.) хаартыска, олохтоох ааптардар кинигэлэрин быыстапкатын тэрийдэ.

Уһун сайын кэнниттэн нэһилиэк дьоно үөрэ-көтө көрсөн, атыылаһан, астынан тарҕастылар. Күммүт да туран биэрдэ. Күһүҥҥү киһи күлбүтүнэн!

Ааптар: Ксения Новикова

Сообщение Мукучуга нэһилиэк күнүн түмсүүлээхтик тэрийдилэр появились сначала на Ulus.Media — все главные новости из районов Якутии.

Комментарии закрыты.