Мукучулар Иван Егоров-Танаринскайы иһирэхтик аҕыннылар

Мукучу нэһилиэгэр Төрөөбүт тыл, сурук-бичик күнүгэр Сайылык сириттэн аан бастакынан суруйар эйгэҕэ киирбит, РСФСР суруналыыстарын, ССРС суруйааччыларын Союһун чилиэнэ Иван Иннокентьевич Егоров-Танаринскай төрөөбүтэ 80 сылынан “Эн хаарга сардаана үүннэрдиҥ…” диэн ахтыы киэһэтэ буолла.


Иван Иннокентьевич Егоров-Танаринскай оҕо суруйааччытын быһыытынан “Сүгэһэрдээх куоҕас”, “Таю күнү аҕалыа” кэпсээннэри, “Саҥа дьыл түүнүгэр” остуоруйа-поэманы о.д.а. айымньылары, тэттик хоһооннору, ырыалары суруйбута. Оҕолорго анаммыт хоһооннорун саха тылын, литературатын учуутала Светлана Николаевна Самсонова салайааччылаах “Куорсун” литературнай түмсүү оҕолоро аахтылар.

Дойдуга бэриниилээх буолуу сылынан “Мин дойдум, Мукучу” ырыа буолбут хоһоонун Роман Степанов мелодиятыгар “Күбэйэ” вокальнай ансаамбыл ыллаата.

Албан аат уонна кэриэстэбил сылыгар сыһыары тутан сэрии туһунан саамай биллэр, дириҥ айымньыта – “Малгиннар ийэлэрэ” очерк, “Хобороос” драма буолар. Бу айымньыларга олоҕуран “Ытык ийэ” үҥкүүнү Оҕо искусство оскуолатын учуутала Екатерина Ивановна Иванова туруоруутугар 10 кылаас үөрэнээччилэрэ /салайааччы Сусанна Нифонтовна Ксенофонтова/ толордулар. “Чуумпуга” хоһоону Иван Егорович Левин аатынан Танара орто оскуолатын 11 кылааһын үөрэнээччитэ Афоня Григорьев итэҕэтиилээхтик аахта.

Иван Егорович Левин аатынан Танара орто оскуолатын 8 кылааһын үөрэнээччилэрэ Сангар шахтатын алдьархайын туһунан суруллубут “Сүрэх сылааһа” хоһоонун аахтылар.

Бу киэһэни кини олоҕун, айар үлэтин аҕыс түһүмэҕинэн арааран иилээн-саҕалаан ыытта Россия суруналыыстарын союһун чилиэнэ, үрдүк категориялаах педагог-библиотекарь Ксения Егоровна Новикова.

Иван Егоров-Танаринскай драматург быһыытынан үлэлэрэ олус элбэхтэр. Олортон “Хомолто” тэттик испэктээккэ “Дэриэбинэчээн” норуот тыйаатырын артыыстара: Марк Егоров – Сүөдэри, Вера Прокопьева – Катяны, Петр Дохунаев – Сеняны табыллан оонньоотулар. Билиҥҥи бутуурдаах олоххо оҕо уонна төрөппүт икки ардыгар истиҥ сыһыаны олохтуурга, алҕастары туоратарга анаммыт испэктээги көрөөччү да ылынна.

Иван Иннокентьевич ырыа буолбут хоһоонноро күн бүгүҥҥэ диэри саха эстрадатыгар ыллана сылдьалларыттан биһиги, биир дойдулаахтара, олус үөрэбит, долгуйабыт. Ол курдук “Куйааска кууһума” диэн көрдөөх хоһоонун Дмитрий Иванов мелодиятыгар дэгэрэҥ ырыа гынан саха эстрадатын сулуһа, Олоҥхо тыйаатырын артыыһа Александр Дьячковскай – Саарын олус бэркэ толорор. Мэҥэ Хаҥалас мелодиһа Николай Сорокин “Ырыам уонна сибэкким” диэн ырыатын Саха сирин иэйиилээх куоластаах ырыаһыта Сардана Осипова олус табыллан ыллыыр. Бу ырыа ааспыт сыл “Үрдэл” национальнай бириэмийэ бастакы тууругар, Айгылаан толоруутугар олус тэтимнээхтик аныгылыы уратытык киирбитэ. Саамай тарҕаммыт ырыата саха эстрадатын чаҕылхай ырыаһыта, ырыа айааччы Алексей Егоров мелодиятыгар “Эн хаарга Сардаана үүннэрдиҥ” буолар. Ырыа быһыытынан 1985 сылтан биллэр. Бу ырыанан Кэбээйи улууһун күөрэгэйэ Айталина Макарова дьоро киэһэни түмүктээтэ. Уус-уран тыл маастара Иван Иннокентьевич Егоров туох баар айымньыларын барытын биир кинигэҕэ түмэр үлэ түмүктээх буоларыгар бука бары баҕарабыт, – диэн санаатын үллэстэр “Дайан” СК уус-уран салайааччыта Вера Прокопьева.

«Дабаан» хаһыат

Сообщение Мукучулар Иван Егоров-Танаринскайы иһирэхтик аҕыннылар появились сначала на Ulus.Media — все главные новости из районов Якутии.

Комментарии закрыты.