Муомаҕа устудьуоннар кэнсиэртээтилэр

Ороһуоспа күнүгэр Төбүлэхтэн уонна Буор Сыһыыттан төрүттээх араас үөрэх кыһатыгар үөрэнэр устудьуоннар эҕэрдэ кэнсиэр көрдөрдүлэр.


Төбүлэххэ кэнсиэри Дьокуускайдааҕы экономическай-потребительскэй кооперация техникумун устудьуона Валерия Стручкова иилээн-саҕалаан ыытта. Кини Чуумпу Кытыл олохтоохторун үүммүт Саҥа 2020 сылынан, Ороһуоспанан итиитик эҕэрдэлээтэ. Тэрээһин флешмобунан саҕаланна, оҕолор оскуолатааҕы кэмнэриттэн көрдөөх «ЕГЭ», «Бэрэски» сценкалары көрдөрдүлэр. Оскуола кэнниттэн устудьуоннар көрдөөх-нардаах, билиигэ баҕалаах кэмнэрин кэрэһэлиир ырыалары ыллаатылар. Өрөспүүбүлүкэтээҕи лицей-интернат 10 кылааһын үөрэнээччилэрэ Александра Попова «Здравствуй, Якутск», Уйгууна Никулина «Ийэбэр» ырыаны гитаранан, Өлүөхүмэтээҕи техникум 3 кууруһун устудьуона Виталий Старков «Баҕа санаа» ырыалары ыллаатылар. Аныгылыы  үнкүүнү ХИФУ педагогическай институтун 1 кууруһун устудьуона Айыллаана Соркомова, сахалыы үнкүүнү Дьокуускайдааҕы тыа хаһаайыстыбатын техникумун 1 кууруһун устудьуона Мария Григорьева  үнкүүлээтилэр. Кинилэри ХИФУ физико-техническэй факультетын 4 кууруһун устудьуона Алена Кириллина салайар, түмэ тардар. Флешмобка, уопсай ырыаларга, сценкаларга Ирина Соркомова ‒ Намнааҕы педколледж 1 кууруһун, Айан Быковскай ‒ Аллараа Бэстээхтээҕи тимир суол техникумун 2 кууруһун, Александр Кудрин ‒ Дьокуускайдааҕы автодорожнай техникум 1 кууруһун, Анна Нучеканова  ‒ ХИФУ юридическай колледжын 2 кууруһун устудьуоннара кытыннылар. Оҕолор үгэскэ кубулуйбут, сынньалаҥнарын кэмигэр  маннык сэргэх эҕэрдэ кэнсиэри көрдөрөллөрө хайҕаллаах.

Олохтоохтор оҕолор үөрэхтэригэр үрдүктэн-үрдүк ситиһиилэри, үлэһит буолан төрөөбүт дойдуларыгар туһалыы сырыттыннар диэн алҕыыллар.

Буор Сыһыыга ыччаттар онна устудьуоннар тэрийиилэринэн Ороһуоспа күн сынньалаҥ киэһэтэ ыытылынна. Оҕолор бары да ырыаһыттар, үҥкүүһүттэр эбит. Уопсайа 10-12 киһи кытынна. Устудьуоннар араас үҥкүүнү көрдөрдүлэр, ол иһигэр эвенскэй, турецкай, индийскэй, оһуохай үҥкүү бааллар. Үҥкүүһүт кыргыттар Туйаара Слепцова, Марина  Алексеева, Ольга Алексеева, Света Черова, Вика Слепцова, Ольга Слепцова уо. д. а., уолаттар Михаил Слепцов, Николай Буртахов, Игнат Никулин, Роман Слепцов уо. д. а. олус имигэстик үҥкүүлүүллэрэ көрөөччүлэри сөхтөрдө. Ырыаһыттар Маргарита Атласова, Константин Иванов, Данил Атласов, Сергей Корякин, И. Никулин, М. Слепцов, Нь. Уваровскай триолара, кыргыттар, уолаттар ансаамбыллара, көрдөөх сценкалар олохтоохтор сүргэлэрин көтөхтүлэр. Кэнсиэри Михаил Слепцов, Николай Буртахов салайан ыыттылар.

Бырааһынньык өрөбүллэригэр түөлбэлэринэн сынньалаҥ киэһэлэрин, сүүйүүлээх лотереялары тэрийбиттэрэ кэрэхсэбиллээх буолла. Төбүлэх уонна Буор Сыһыы олохтоохторо Саҥа дьылы өрө көтөҕүллүүлээхтик көрүстүлэр.

Олохтоохтор, ыччаттарыгар махтал тылын тиэрдэн  туран, үөрэххэ, үлэҕэ ситиһиилэри баҕараллар.

Ааптардар: Л. Стручкова, А. Васильева.

Сообщение Муомаҕа устудьуоннар кэнсиэртээтилэр появились сначала на Ulus.Media — все главные новости из районов Якутии.

Комментарии закрыты.