Мэҥэ Хаҥалас дуобатчыттара Голландияттан ситиһиилээх кэллилэр

Мэҥэ Хаҥалас дуобатчыттара Голландия Роттердам куоратыгар ыытыллыбыт норуоттар икки ардыларынааҕы турнирга ситиһиилээхтик кыттан кэллилэр. 100 харахтаах дуобакка 16 дойдуттан 128 кыттааччы күрэхтэстэ. 


А.В.Чугунов аатынан Мэлдьэхси орто оскуолатын  4 кылааһын үөрэнээччитэ Айтал Винокуров, 6 кылааһын үөрэнээччитэ Прокопий Говоров уонна тириэньэр Василий Куприянов дойду чиэһин көмүскээтилэр.

Голландияҕа ыытыллар турнирдарга сааһынан уонна эрэсэрээтинэн тутулуга суох 9 түһүмэххэ бары бииргэ күрэхтэстилэр. Күрэхтэһии түмүгүнэн  эр дьоҥҥо, дьахталларага, оҕолорго, бэтэрээннэргэ, ону таһынан улахан, орто, кыра рейтиннээхтэргэ 3 бастыҥы наҕараадалаатылар. Эр дьоҥҥо Сенегал гроссмейстера М.Диайе бастаата, Александр Гетманскай (Арассыыйа) иккиһи, Хеусденс Рон (Голландия) үсүһү ыллылар. Дьахталларга Виктория Мотричко (Украина),  Cuj Jie (Кытай)  иккис, Алена Большакова (Арассыыйа) үһүс буоллулар.

Уолаттарга Прокопий Говоров 11 очукуолаах бастаата, оттон кыра рейтиннээхтэргэ 7 очукуолаах Айтал Винокуров иккис миэстэни ылла. Орто рейтиннээхтэргэ тириэньэр  Василий Куприянов 10 очукуолаах үһүс миэстэни ылары ситистэ.

Күрэхтэһии таһыма үрдүгүн биһиги кэммит уһулуччулаах дуобатчыта, Аан дойду хас да төгүллээх чөмпүйүөнэ Александр Георгиев тохсус миэстэни ылбыта, турнирга норуоттар икки ардыларынааҕы таһымнаах 11 гроссмейстер, 28 успуорт маастара күөн көрсүбүтэ туоһулуур.

Ааптар: «Эркээйи» хаһыат

Сообщение Мэҥэ Хаҥалас дуобатчыттара Голландияттан ситиһиилээх кэллилэр появились сначала на Ulus.Media — все главные новости из районов Якутии.

Комментарии закрыты.