Мэҥэ Хаҥаласка үөрэхтээһин суолунан автопробег буолла

Быйыл Мэҥэ Хаҥалас улууһугар үөрэхтээһин саҕаламмыта 145 сыла бэлиэтэнэр. Бэлиэ тэрээһиннэр чэрчилэринэн, үөрэх үлэһиттэрин боропсойууһун бэрэссэдээтэлэ Степан Андреев уонна үөрэх управлениетын исписэлииһэ Николай Бугаев тэрийиилэринэн учууталлар автопробегка сырыттылар.


Бөлөххө учууталлар, педагогическай үлэ бэтэрээннэрэ Хараттан Афанасий Илларионов, Иннокентий Березкин, Бөкөттөн Иван Филиппов, Дмитрий Сыромятников, Чүүйэттэн Яков Ларионов, Майаттан Михаил Шарин, Аллараа Бэстээхтэн Максим Бурнашев, Балыктаахтан Андрей Винокуров, Төхтүртэн Лука Никифоров, Лоомтукаттан Константин Сосин кытыннылар.

Биллэрин курдук, 1874 с. Ороссолуодаҕа Илин Хаҥаласка бастакы норуодунай училищены Герасим Соловьев бэйэтин харчытынан дьиэ туттаран астарбыт, онтон ыла улууспутугар үөрэхтээһин саҕаламмыт. Онон автопробег тэрээһинэ Ороссолуода оскуолатыттан саҕаланна.

Оскуола дириэктэрэ Николай Никифоров агрооскуоланан быйылгы үлэлэрин-хамнастарын сырдатта. Базаларын бэрт үчүгэйдик оҥостубуттар. Быйыл үүнүү соччото суоҕунан оҕуруот аһа мөлтөһүөр буолбут. Билигин хостооһун, быһыы, суортааһын үлэтэ ыытыллар. Оскуолаҕа 2014 с. аһыллыбыт улуус үөрэхтээһинин устуоруйатын сырдатар виртуальнай мусуойга сылдьан элбэҕи биллибит-көрдүбүт.

Салгыы I Тыыллымаҕа тиийдибит. Оскуолаҕа судаарыстыбаннай-политическай диэйэтэл Семен Борисов уонна академик Владимир Ларионов олохторун сырдатар мусуойга сырыттыбыт. Педагогическай үлэ бэтэрээнэ Евдокия Егорова көрүстэ, мусуойу көрдөрдө. Степан Андреевич тэрээһин кыттыылаахтарыгар успуорка анаммыт биктэриинэни ыытта, оскуола дириэктэрэ Федор Белолюбскай оскуола олоҕун сырдатта. Бу күн Аһыкайга Манньыаттаахтар олохторугар уонна II Тыыллымаҕа тахса сылдьар былааммыт күн-дьыл мөлтөҕүттэн кыаллыбата.

Автопробег Моорук оскуолатыгар сырыынан түмүктэннэ. Оскуолаҕа үөрэнээччилэргэ анаан Дмитрий Сыромятников баай ис хоһоонноох кэллиэксийэтин аҕалан кэпсээтэ. Мэҥэ Хаҥаласка сыһыаннаах араас сыллардааҕы значоктар, анал бэлиэлэр тиэмэлэринэн аттарыллан сааһыламмыттар. Моорук оскуолатыгар үлэлии сылдьыбыт, педагогическай үлэ бэтэрээнэ Лука Никифоров, биир дойдулаахтара Константин Сосин бэйэлэрин санааларын үллэһиннилэр, ааспыт сыллары ахтан-санаан аастылар. Автопробег кыттыылаахтара үөрэнээччилэргэ үөрэхтээһин сайдыытын суолунан туох соруктаах сылдьыбыттарын бэлиэтээн кэпсээтилэр.

Өрөспүүбүлүкэҕэ чугаһынан суох литературнай мусуойга сылдьан Аполлон Апросимов сэһэнин иһиттибит. 60-тан тахса сыл педыстаастаах ытык кырдьаҕас билигин да үлэлиир баҕата баһаам. Онон мусуойу салгыы сайыннарар, үбүлэниитин сөптөөхтүк быһаарар, ыспат-тохпот кэскиллээх соругу ылынар уолдьаспыт. Күндү кылаакка тэҥнээх баай-дуол инникитин даҕаны суолтата өссө үрдээн, иһитиннэрэр-биллэрэр кыаҕа өссө да арыллан иһиэх этэ дии саныыбын.

Ааптар: Марфа ПТИЦЫНА.

Сообщение Мэҥэ Хаҥаласка үөрэхтээһин суолунан автопробег буолла появились сначала на Ulus.Media — все главные новости из районов Якутии.

Комментарии закрыты.