Мэҥэ сиригэр истиҥ көрсүһүүлэр

Өрөспүүбүлүкэбит үрдүнэн ахсынньы 2-12 күннэригэр ааҕар нэһилиэнньэҕэ чэпчэтиилээх сурутуу күнүнэн биллэллэр. Ол чэрчитинэн ахсынньы 5 күнүгэр «Далбар Хотун» сурунаал айар кэллэктиибэ Мэҥэ-Хаҥалас улууһун Төҥүлү, Майа сэлиэнньэлэригэр ыалдьыттаата. Төҥүлүгэ бибилэтиэкэҕэ олус истиҥник көрүстүлэр, манна чугас сытар нэһилиэктэртэн кытары кэлэн үөртүлэр. Ааҕааччыларбыт сурунаал оҥоһуутугар, ис хоһоонугар санааларын эттилэр, сурунаалга суруттулар. Эрэллээх ааҕааччыбыт Анна Егоровна Баишева маннык диэн тыл эттэ:

– «Далбар Хотуҥҥа» 1997 сылтан күн бүгүҥҥэ диэри сурутабын. Хас биирдии нүөмэри уура сытыарабын, күннээҕи олохпор-дьаһахпар туһанар бэртээхэй босуобуйа оҥостобун. Сурунаалга тахсыбыт матырыйаал сонуна хаһан да сойбот, өссө дөрүн-дөрүн хаттаан ааҕабын. Биһиги нэһилиэкпитигэр араас тэрээһин бөҕөтө ыытыллар, онно тиэмэ көрдүүрбэр бу сурунаалы көрөбүн, санаа ылабын. Тыа, куорат дьахтарын дьылҕатын, олоҕун-дьаһаҕын, үлэтин-хамнаһын олус үчүгэйдик сырдаталлар. Хас да көлүөнэни хабаллара олус интэриэһинэй, оннооҕор ааспыт үйэ далбардарын историятын суруйаллар.

Майаҕа Елизавета Семеновна Корнилова салайааччылаах киин бибилэтиэкэҕэ сааланы толору ааҕааччы көрүстэ. Манна үс көлүөнэ ааҕааччылар мустан олус сэргэх кэпсэтии таҕыста. Сурунаалга хамаҕатык суруттардылар. Суруппут дьон сүүйүүлээх лотреяҕа кыттан үөрүүлэрэ икки бүк үрдээтэ.

Мичийэ Тоокой икки көрсүһүүгэ тренинг, практикум ыытан дьону сэргэхситтэ, сүргэлэрин биллэ көтөхтө. Төҥүлү, Майа нэһилиэгин олохтоохторугар махталбытын биллэрэбит. Өссө да инникитин «Далбар Хотуну» сурутуҥ, ааҕыҥ, истиҥ дьүөгэ оҥостуҥ!

 

Добавить комментарий

Ваш адрес email не будет опубликован. Обязательные поля помечены *