Нам улууһа мааска тигиитигэр күүскэ ылыста

Нам улууһун киинигэр, Ленскэй нэһилиэккэ,  «Иис Куо» ателье кулун тутар 20 күнүттэн мааска тигэн саҕалаата.


Ателье салайааччыта Роза Новгородова:

– Ааспыт нэдиэлэттэн мааска тигэн саҕалаатыбыт. Роспотребнадзортан көҥүллээхпит. Бээстэн, сатинтан, сиитэстэн тигэбит. Сакааһы тэрилтэлэртэн, биирдиилээн дьонтон ылабыт. Бүгүҥҥү күҥҥэ Ленскэй нэһилиэк 50, Хамаҕатта 250 устууканы, РЭС, «Эрэл» ТХПК, Үөдэй дьаһалтата сакаастаатылар. Күҥҥэ ортотунан 500 устууканы тигэбит. Үлэбит кээмэйэ күн аайы элбээн иһэринэн, эбии иистэнньэҥнэри ыллыбыт, онон барыта тохсуо буолан иистэнэбит.

Кэтээн көрүүбүтүнэн, дьон мааскаҕа олус наадыйар эбит. Дьокуускайтан, ыаллыы улуустартан кытта сакаастаһаллар. Инникитин, бородууксуйабыт элбээтэҕинэ, маҕаһыыннарга туттарар санаалаахпыт. Матырыйаалынан хааччынан олоробут. Ол гынан баран, хара дьүһүннээх таҥаспыт бүттэ. Уопсайынан, ханна да суох, Дьокуускайга эмиэ бүппүт. Оттон дьон үксэ хара дьүһүннээҕи көрдүүр. Ону учуоттаан хараҥа өҥнөөх матырыйаалларынан  тигэ сатыыбыт.

Биһиги Бизнес-инкубатор иккис этээһигэр 13-с хоско баарбыт. Бэнидиэнньиктэн өрөбүлгэ диэри сарсыарда 9 чаастан киэһэ 7 чааска диэри үлэлиибит.

Бу курдук иистэнньэҥ кыргыттар массыыналарын тыаһа биир кэм тигинээн олорор. Ателье салайааччыта Роза Новгородовалыын кэпсэтэр кэммэр, хас үс-биэс мүнүүтэ аайы мааска ыйытааччы дьон тохтоло суох сыбыытаһан киирэ турдулар. Онон сылыктаатахха чахчы да, мааскаҕа наадыйааччы элбэх эбит. Ателье сыаната да удамыр дии санаатым. Холобура, уон устууканы кууһунан ылар буоллаххына, биирэ 50 солк. Оттон биирдиилээн – 70 солк.

Улуус дьахталларын сэбиэтэ  “Многоразовые маски – нуждающимся” диэн аһымал акция биллэрдэ.

Ирина Находкина, улуустааҕы дьахтар сэбиэтин председателэ:

— Нам улууһун  дьахталлара сүбэлэһэн, ханнык матырыйаалтан, хайдах ньэмиэтинэн кырыйан оҥорору сүбэлэспиппит.  Дьиэҕэ олорор кэммитигэр бу акцияҕа кыттыһан, мааска тигэн кырдьаҕастар дьиэлэригэр,  элбэх оҕолоох ыалларга  волонтердарынан түҥэттэрэн, сэмэй кылааппытын киллэриэҕиҥ диэн ыҥырыы таһаарбыппыт.

Бу күннэргэ акция чэрчитинэн элбэхтик туттуллар мааскалары тигии саҕаланна. Аан бастаан Граф Биэрэгинээҕи “Ромашка” оҕо саада бу хамсааһыҥҥа ылсыбыта кэрэхсэбиллээх. Үөдэйгэ “Кэскил” түөлбэ  дьахталлара 12 ветераҥҥа мааска тигэн түҥэттилэр. Ленскэй нэһилиэккэ  С.И. Обутова  председателлээх “Добро в руках” общественнай түмсүү мааска матырыйаалын босхо биэрдэ. “Дьүөгэлэр”, “Матери России”  түмсүүлэр эмиэ бу дьыалаттан туора турбакка көхтөөхтөрүн көрдөрдүлэр.  Е.С. Викторова салайааччылаах “Ткани” маҕаһыын спонсордаан, Нам улууһунааҕы саастарын ситэ илик оҕолору реабилитациялыыр киин иитиллээччилэригэр, учуокка турар ыалларга  мааска тигэ сылдьаллар. Партизан нэһилиэгэр  оҕо саадын үлэһиттэрэ 50 маасканы тигэн, 70-тан үөһээ саастаах дьоҥҥо түҥэтиэхтэрэ.

Билигин  Роспотребнадзор ирдэбилин тутуһан тигэ сылдьабыт.  Бу нэдиэлэҕэ волонтердар көмөлөрүнэн түҥэтиэхпит. Хас биирдиибит 10-нуу мааска тигэргэ быһаарынныбыт. Атын да нэһилиэктэр көхтөөх кыттыыны ылыахтара диэн эрэнэбит”.



Ааптар: “Эҥсиэли” хаһыат

Сообщение Нам улууһа мааска тигиитигэр күүскэ ылыста появились сначала на Ulus.Media — все главные новости из районов Якутии.

Комментарии закрыты.