Нам улууһун илин эҥэр нэһилиэктэрэ отчуоту биһирээтилэр

 Нам улууһун илин эҥэр нэһилиэктэригэр— Фрунзеҕа, Көбөкөҥҥө, Арбыҥҥа СӨ Бырабыыталыстыбатын отчуотун сыана политикатыгар Судаарыстыбаннай кэмитиэт бэрэссэдээтэлэ Антонина Винокурова салайааччылаах бөлөх олунньу 12 күнүгэр оҥордо.


Бу отчуоттуур мунньахтарга улуус баһылыга Юрий Слепцов уонна дьаһалта салааларын, улуус тэрилтэлэрин салайааччылара кыттыыны ыллылар. Бары нэһилиэккэ отчуот видеонан көрдөрүлүннэ. Антонина Борисовна ону уу сахалыы ситэрэн-хоторон, быһааран биэрбитин мунньахтааччылар биһирээтилэр.

Фрунзе нэһилиэгэр  буолбут мунньахха олохтоохтортон 21 киһи сырытта. Кэпсэтиилэртэн иһиттэххэ, олохтоохтору нэһилиэктэри холбуур туһунан сурах, өрүс уолан чычаарыыта, үөрэх, доруобуйа харыстабылын тэрилтэлэригэр оптимизацияны, модернизацияны ыытыы, ФАП дьиэтин тутуу быһаарылла илигэ, саҥа тутулла турар АКЦ дьиэтин ситэриигэ үп көрүллүүтэ быһаарылла илигэ, кыра бырыһыаннаах ипотеканан тутуллар дьиэлэр сыаналарын үрдэтии, АКЦ-ны көрүүгэ-истиигэ үбүлээһини көрүү, үүт сыанатын, субсидиятын үрдэтии, сылгыны иитиигэ субсидияны көрүү боппуруостара, просекалары оҥорон баран кэрдибит мастары хомукбакка сытыараллара, Көбөкөн балыыһатыгар куойка аҕыйаҕа, хаан анаалыһын туттарыыга эрэйдэнэллэрэ уо.д.а. долгутар.

Тыл эппиттэр сүнньүнэн нэһилиэктэри холбооботу, АКЦ дьиэтин тутууну эбии үбүлээн ситтэрэри, Фап дьиэтин тутары, өрүс сүнньүн көннөрүүгэ, дириҥэтитиигэ үлэни ыытары, ипотекаҕа тутуллар дьиэлэр сыаналарын үрдэтиини хонтуруоллууру, Анатолий Чомчойев этэр кыра кыамталаах атомнай электростанциятын тутуутун үөрэтэн көрөрү, үүт тутуллар сыанатын, субсидиятын тэрээһиннээх хаһаайыстыбаларга, кэтэх сүөһүлээхтэргэ үрдэтэри, сылгы иитиитигэр көрүллэр субсидияны тохтоппоту, субсидияны ыанар ынах төбөтүгэр биэрэри, просекалары оҥорооччулары хонтуруоллууру туруорустулар.

СӨ Бырабыыталыстыбатын үлэтин мунньахтааччылар бары «биһириибит» диэн куоластаатылар.

Көбөкөн. Манна буолбут мунньахха олохтоохтортон 37 киһи кэллэ. Кэпсэтиигэ 9 киһи кытынна. Улууска да, республикаҕа да сыһыаннаах боппуруостары тула ыйытыылар, кэпсэтиилэр буоллулар.

Е.Е. Орлов (үлэ ветерана) этиитин «Айылҕа баайын хостуур тэрилтэлэр салайааччыларын хамнастара төһөнүй? Спортивнай сааланы ититиигэ тоҕо үп көрүллүбэтий?» – диэн ыйытыынан саҕалаата. Отчуот дьоҥҥо өйдөнөр гына оҥоһуллубутун бэлиэтээтэ. «Тараҕана» эбэҕэ мелиоративнай үлэлэр 70-ус сыллартан ыытыллалларын, ууга турбут мастар хатаннар, өртөөһүн ыытыллыбакка сир-уот буорту буолан сылгы да тохтообот буолбутун санатта. Итиэннэ сири, ходуһалары оҥорууга күүскэ ылсан үлэлиири, боксаҕа ССРС, РСФСР спордун маастара В.В. Васильев аатын үйэтитиигэ болҕомтону уурары, Көбөкөҥҥө культураҕа да, спорка да талааннаах ыччат баарынан филиаллары аһыыны туруоруста.

П.П. Неустроев (депутат) бултанар сирдэр аукциоҥҥа таһаарылыннахтарына түөлбэлээн олорор олохтоохтор бултуур-алтыыр бырааптарын күөмчүлүүр куттал баарын, онон нэһилиэк дьоно бултуулларыгар, балыктыылларыгар ордук усулуобуйаны тэрийиигэ үлэ барыахтааҕын, урут оҥоһуллубут кадастр докумуоннара сыыһа оҥоһуллубутугар гражданнар буруйдара суоҕунан кадастрдааһын үлэтин босхо ыыттарыыны, ипотекаҕа бэриллэр дьиэлэр сыаналара үрдээһинин бэрэбиэркэлэтиини туруоруста.

Н.И. Бурнашева нэһилиэккэ элбэх дьиэҕэ сир анныттан уу тахсан дьиэлэрин акылаата, муосталара сыл ахсын сытыйарын, эмэҕирбитин кэпсээтэ уонна: «Дьиэлэр өрөмүөннэригэр материалынан көмө оҥоһуллуо дуо?» – диэн ыйытта. «Чааһынай ыалларга субсидияны үүккэ, эбэтэр төбөҕө биэриэххэ наада», – диэтэ. Е.Е. Бочкарева М.Г. Гоголев (үлэ ветерана, I гр. инбэлиит) бөһүөлэктэн тэйиччи олорор буолан, киинтэн итиити ситимин тардыы кыаллыбатынан дьиэтигэр ТЭН-и холбууру көрдөһөрүн тиэртэ. Просеканы оҥорооччулар «Тараҕана» ойуурун солооннор хаттаан ууланар кутталы үөскэппиттэрин туһунан эттэ. «Субсидия үрдээтэҕинэ үүтү туттураыа этибит», – диэтэ.

И.С. Федотова оскуоланы туттараары нэһилиэнньэ марафон ыытан үп киллэрбитин, бырайыак бэлэмин, оскуола мөлтөх туруктааҕын, үлэлииргэ, үөрэнэргэ усулуобуйа суоҕун санатан туран, саҥа оскуоланы туттарыыны туруоруста. И.И. Пестрев өртөөһүн барбат буолан ходуһалар алдьаммыттарын, кыараабыттарын, баһаар үксэ онтон буоларын этэн туран, өртөөһүнү көҥүллүүрү, сыл ахсын ыыттарары туруоруста.

Көбөкөннөр Бырабыыталыстыба үлэтин биир киһи туттунуулаах биһирээтилэр.

Арбын. Бу нэһилиэккэ отчуоту истэ, дьүүллэһэ 40 киһи кэллэ. Арбыннары долгутар боппуруостар элбэхтэр. Олортон биирдэрэ — урукку баһылыктара Н.А. Соловьев уонна М.А. Исаков туохха, тоҕо сууттаммыттара, хаалла сыталлара. Манна: «Олохтоох дьаһалта, республика салалтата орооһор боломуочуйалара суох. Нэһилиэнньэ туруорсуутунан коррупцияны утары охсуһуу күүскэ бара турар. Буруйдаахтарын, буруйа суохтарын суут быһаарыа. Күүтэбит», – диэн эппиэт бэрилиннэ.

Н.В. Жирков (б/х сал.) республика таһыттан чэпчэки сыаналаах үүт, эт киириитэ элбээн, республика хаһаайыстыбалара оҥорбут бородууксуйаларын батарыыларыгар мэһэйи үөскэтэрин, убаһаларын, ынахтарын этин күн бүгүҥҥэ диэри кыайан батарбакка олорорун туһунан эттэ. В.С. Суздалова (учуутал) оскуолаҕа учууталлар тиийбэттэригэр, материальнай-техническэй хааччыллыы мөлтөҕөр, кадрдар тохтоон үлэлээбэттэригэр, бу барыта үөрэтии хаачыстыбатыгар охсоругар тохтоото. Итиэннэ земскэй учуутал квотатын элбэтэри, учууталлар квалификацияларын үрдэтэр үөрэхтээһини тэрийэри, материальнай -техническэй хааччыйыыны тупсарыыны туруоруста.

М.Г. Аргунова (фельдшер) ФАП дьиэтэ олус эргэтин, үлэлиир усулуобуйа суоҕун санатан туран, ФАП саҥа дьиэтин тутууну туруоруста. И.П. Бугаева (б/х) 5%-наах кредити «Алмаасэргиэнбаантан» ылаары эккирэтиитэ сыл буолбут да ыла илигин кэпсээтэ. Элбэх сүөһүлээх дьоҥҥо ходуһаны төбөнөн көрөн биэрэри туруоруста. А.С. Сивцев элбэх функциялаах тренажердарынан хааччыйыыны, нэһилиэнньэ балыктыырыгар учаастак быһары, кэҥэтиини, Алдан, Лена төрдүгэр балыктыырга бобуулаах сири тэйитэн биэрэри, Я.Д. Иванова АКК саҥа дьиэтин туттарыыны, үүт харчытын үрдэтиини туруорустулар.

Е.Е. Софронов (пенсионер) тимир суол кэллэ да сыана тоҕо үрдүүрүн, неби переработкалыыр собуот тутуллуутугар үп тоҕо көрүллүбэтин, алмаастан, көмүстэн, нефтэн, гаастан миллиардынан үп киирэр да пенсия тоҕо үрдээбэтин ыйытта. Тыа сирин, хаһаайыстыбатын үлэһиттэрэ республикаҕа ааҕыллар орто хамнастан быдан кыраны ылалларын эттэ. Л.И. Гоголев («Намкоммунтеплоэнерго» маастара) Алдан төрдүн «Тумара» үрэхтэн түһэр таас бүөлээн эрэринэн, ону өрүс сүнньүн дириҥэтэ, көннөрө таарыйа хостотон, таһан Арбын-Көбөкөн суолугар куттарары, онно СӨ Бырабыыталыстыбата көмө оҥорорун туруоруста.

Арбын олохтоохторо улуус  атын нэһилиэктэригэр СӨ Бырабыыталыстыбатын сыллааҕы үлэтин «биһирииргэ» диэн сыаналаабыттарыгар кыттыстылар. Ким да атын сыананы биэрбэтэ.
















Ааптар: И. Иванов

Сообщение Нам улууһун илин эҥэр нэһилиэктэрэ отчуоту биһирээтилэр появились сначала на Ulus.Media — все главные новости из районов Якутии.

Комментарии закрыты.