Намнааҕы оҕону  реабилитациялыыр киин спортивнай саала туруорсар

Намнааҕы сокуоннай саастарын ситэ илик оҕолору реабилитациялыыр киин попечительскэй сэбиэтин отчуотун кэмигэр, директор Л.М. Маркова үлэһиттэр бэйэлэрэ көҕүлээн спортсаала акылаатын түһэрбиттэрин,  улуус үрдүнэн ыҥырыы таһааран, салгыы тутарга этии киллэрбиттэрин эттэ.


Тэрилтэ 2002 сыллаахха аһыллыбыта. Ол саҕана көрүүтэ-харайыыта суох сылдьар оҕо ахсаана дойду үрдүнэн үрдүү турар ыарахан кэмэ этэ. 16 саастаах аахпат да, суруйбат да оҕолор кэлэллэрэ. Иитээччилэр буукубаттан саҕалаан, ааҕарга, суоттуурга үөрэтэллэрэ. Ардыгар арыгыга ылларбыт оҕолор киирэллэрэ. Киэһэ итирэн кэлэн, ааннары тоҕо сынньар да түбэлтэлэрэ баара.

2008 сылтан социальнай-реабилитационнай киин быһыытынан үлэлииллэр. Дьиэлэрэ олус эргэрбит. Муостатын  2  сыл устата  өрөмүөннээбиттэр:  бетоннаппыттар, ламинатынан бүрүйбүттэр. Кырыыһатын металлочерепицэнэн саайбыттар. Күһүн аайы истиэнэтин сыбыыллар,  кырааскалыыллар эбит да,  син-биир алдьана, сыбаҕа таммалыы турар.  Тэрилтэ масыыната алдьаннаҕына, күн аайы оҕолору  оскуолаҕа, оҕо саадыгар, балыыһаҕа тиэйиигэ үгүс  эрэйи көрсөллөр эбит.

Эйэлээх, иллээх, сүрдээх үлэһит коллектив  дьиэлэрэ төһө да эргэ буоллар,  куруук сылаас, сырдык буоларыгар кыһанар. Манна ыарахан балаһыанньаҕа түбэспит дьиэ кэргэн оҕолоро быстах кэмҥэ дьиэ сылааһын, минньигэс аһын билэллэр, бары өттүнэн сайдаллар.

Киин оҕолору уонна төрөппүттэри кытта эмиэ үлэлиир. Ол курдук,  ийэлэри отон, оҕуруот аһын хомууругар массыынанан тиэйэн илдьэн,  дьиэ кэргэн  кыһыҥҥы аһын булунарыгар улахан көмөнү оҥороллор. Клим Федоров тэрийэр  курстарыгар сылдьан, 50-тан тахса ийэ көнөр суолга үктэммит.

Ону сэргэ төрөппүт үлэ миэстэтин буларыгар өйөбүл буолаллар. Социальнай педагогтар сүбэлэринэн,  ийэлэри  санитарнай сиэстэрэ, завхоз идэлэригэр интернет  ситимин нөҥүө үөрэттэрбиттэр.  Былырыын 12 ийэни арыгыттан эмтэппиттэр, 4 ийэ докумуонун  оҥорторбуттар, 11 ийэ оҕо пособиетын ыларыгар көмөлөспүттэр, харчынан көмө биэрбиттэр, 4 ыалга күннээҕи кыһалҕаларын быһаарбыттар.

2008 сыллаахха ыарахан балаһыанньаҕа түбэспит 89 дьиэ кэргэн баар буоллаҕына, 2017 с. –  56,   2018 с. – 42, 2019 с. – 25 дьиэ кэргэн баар эбит. Урут сылга 200-тэн тахса оҕо кииҥҥэ киирэн тахсар буоллаҕына, билигин 100 буолбут. Мантан көстөрүнэн, ыарахан туруктаах дьиэ кэргэн ахсаана аччыыр,  оҕо приютка  киириитэ эмиэ аччыыр. Кэнники сылларга миэстэ тахсар буолан, куораттан кытта ыытар буолбуттар.

Киин дьиэ кэргэн чөл олохтоох буолуутугар күүскэ үлэлэһэр. 2008  сыллаахха улуус үрдүнэн  24, о.и. Нам селотугар — 12,  аҥаардас 8 «Гранд»  маҕаһыына баара, 2019 сылга — 3 эрэ хаалбыт (икки – Намҥа, биир –  I Хомустаахха). Төһөнөн арыгы маҕаһыынын ахсаана аччыыр даҕаны, оччонон ыарахан туруктаах дьиэ кэргэн ахсаана эмиэ аччыыр эбит.

Үлэһиттэр бэйэлэрэ көҕүлээн, спортсаала акылаатын түһэрбиттэр.  Мунньахха  улуус үрдүнэн ыҥырыы таһааран, салгыы тутарга этии киирбитин, мустубут дьон сэргии иһиттибит.

Иитээччилэр оҕолору приюттан таҕыстахтарына, бэйэлэрин бэйэлэрэ көрүнэ үөрэнниннэр диэн, дьиэни хомуйарга, астыырга, араас оҥоһуктары оҥорорго үөрэтэллэр. Д.И. Потапов салайар «Намчаан»  цирковой студията республикаҕа биллэр-көстөр үлэлээх. Оҕолор күннэтэ аһатар, таҥыннарар, үөрэтэр иитээччилэрин  ийэ-аҕа оҥостоллор, кинилэргэ сүрэхтэринэн ыллараллар.

Попечителлэр сэбиэттэрин С. Эверестова салайбыт, быйыл Л. Попова  саҥа талыллыбыт.

Ленскэй нэһилиэк, Хатыҥ Арыы нэһилиэгин дьаһалтата массыыналарынан оскуолаҕа таһан, евангелист-христианнар бэлэҕинэн, тэрээһиннэринэн сэргэхситэллэр, Вероника Верховцева куруук илии тутуурдаах кэлэн ыалдьыттыыр, араас эриэккэс астары оҥорууга оҕолорго, ийэлэргэ маастар-кылаастары ыытар, «Эҥсиэли» хаһыат киин олоҕун-дьаһаҕын сырдатар.

«Собираем детей в школу», «Подарим детям радость» диэн акцияларга оскуола табаардарынан, таҥаһынан-сабынан, үбүнэн куруук күүс-көмө буолар дьонноохтор: «Светлана» маҕ. (ИП С. Макарова), «Глория» маҕ. (ИП  Л. Иванова),  «Лакшми» маҕ.  (ИП Д. Кривогорницына),  «Электра» маҕ. (ИП И. Винокуров),  евангелистскай-христианскай церковь (А. Иванов), «Юность» оҕо тэрилтэтэ (сал.  В. Жирков), Нам 2-с №-х оскуолата (дир. Н. Никонова), «Сандаара», «Сулусчаан», «Чэчир» оҕо саадтара,   Нам улууһунааҕы гимназия, Намнааҕы үөрэх үлэһиттэрин профсоюһа, Ленскэй нэһилиэк дьахталларын комитета (предс. С. Обутова), Намнааҕы протоиерий П. Слепцов, «Сардаана» кафе.

Саҥа Дьыллааҕы бырааһынньыкка СР үпкэ министерствота  бэлэх оҥорбут, «Ника» маҕаһыын (ИП А. Сокольников),  «Теплогаз» маҕаһыын (ИП  В. Осипов), «Барыс» такси (ИП  Е. Бурнашева) оҕолору массыынанан таһыыга, Сергей уонна Вероника Верховцевтар, минньигэс астарынан, тордунан,  «Фудмания» кафе (ИП Е. Дмитриева), «Сунами» кафе (ИП Е. Жирков) пиццанан, сушинан, фри хортуоппуйунан  күндүлээбиттэр. Маны сэргэ Егор Жирков психологическай кабинеты үбүнэн, таҥаһынан-сабынан өйөөбүт, «Сардаҥа» кинотеатр (дир. П. Обутов) ыйга иккитэ босхо киинэ билиэтинэн хааччыйбыт.

Хатыҥ Арыы нэһилиэгин дьаһалтатын сүрүннүүр специалиһа Н.Д.Сивцева  эҕэрдэлээтэ уонна  сэмэй бэлэхтэрин туттарда.

Киин үлэһиттэрэ улуус амарах сүрэхтээх дьонун өйү сайыннарар оонньуулары атыылаһыыга, кукольнай театрга куукулалары тигиигэ, былырыын акылаата түһэриллибит спортсааланы салгыы тутууга көмөлөһөргө ыҥырдылар.

Киин салайааччыта Л.М. Маркова сүбэ-ама, көмө буолар дьонугар: Л.П. Поповаҕа, Е.Э.  Бурнашеваҕа,  М.С. Тарабукинаҕа, Т.Е. Охлопковка, А.Г. Корякинаҕа, Н.Д. Сивцеваҕа,  И.Д. Ноговицыҥҥа, Г.Г. Марковка,  А.Н. Ивановка, С.И.  Обутоваҕа,  И.В.  Охлопковаҕа,  В.Е. Верховцеваҕа махтал суруктары  туттарда уонна оҕолор оҥорбут оҥоһуктарын бэлэх уунна.

Бу   тэрээһиҥҥэ сылдьан, кыһалҕаҕа ыларбыт оҕолору олус аһына, долгуйа көрдүбүт,  дьиэлэрэ-уоттара эргэтэ, толору усулуобуйата суоҕа киһини харааһыннарда.

«Норуот күүһэ — көмүөл күүһэ» дииллэринии, бары сүбэнэн марафон тэрийэн, үп-ас хомуйан, онуоха олохтоох салалта, кыахтаах урбаанньыттарбыт көмөлөһөннөр, спортсаала тутуутун көҕүлүөххэ диэн этии киирбитин сэргии иһиттибит.



Ааптар:  А. Корякина

Сообщение Намнааҕы оҕону  реабилитациялыыр киин спортивнай саала туруорсар появились сначала на Ulus.Media — все главные новости из районов Якутии.

Комментарии закрыты.