НАТАЛЬЯ ХАРЛАМПЬЕВА: КУОЛАСТААҺЫҤҤА КЫТТАР ХАЙААН ДА НААДА

От ыйын 1 күнүгэр буолуохтаах РФ Конституциятыгар уларытыылары киллэрэр туһунан куоластааһын тула дьон бэйэтин санаатын үллэстэр.

Наталья Харлампьева, саха норуодунай поэта:

— Арассыыйа Федерациятын Конституциятыгар уларытыылары киллэриигэ мин тус санаам маннык – Госдуума, Федерация Сэбиэтэ көрөн, куоластааһыҥҥа киллэрбит докумуонун бу күннэргэ чинчийэн, үөрэтэн, от ыйын 1 күнүгэр буолар куоластааһыҥҥа хайаан да кыттар наада. Өтөрүнэн маннык дьыала буола илик, онон оҕолорбут, ыччаппыт олохторун түстүүр сокуон ылыныллыытыгар кыттыахтаахпыт. Мин суруйааччы буоларым быһыытынан, Арассыыйа норуоттарын ураты (самобытнай) култуураларын өйөөһүн туһунан балаһыанньа баарын сэргиибин. Оттон үгүс дьону уолуппут судаарыстыбаны холбуур тыл быһыытынан нуучча тылын билинэр балаһыанньаны, Арассыыйаҕа олорор омуктар тылларын күөмчүлүүр дии санаабаппын. Дьиҥэ, күн бүгүн биһиги, суруйааччылар, киэҥ эйгэҕэ тахсарбытыгар нуучча тыла суох сатаммаппыт. Нууччалыы тылбаастан саҕалаан атын омук тылларыгар эрэ тахсар кыахтаахпыт. Санааҥ көрүҥ, «Дьулуруйар Ньургун Боотур» 1975 сыллаахха оҥоһуллубут тылбааһа суоҕа буолар, бүгүн олоҥхобут аан дойду шедеврэ аатырара саарбах. Владимир Державин тылбааһыгар олоҕуран французтуу, английскайдыы тылбаастаммыта, аар-саарга аатырбыта. Нуучча тыла – биһиэхэ аан дойду таһымыгар тахсарга бигэ далаһабыт буолар. Искусство, литература сайдыытыгар бэйэ эрэ этноһыгар бүгүү сайдыыны атахтыан сөп. Биллэн турар, атын да уларытыылар олоҕу айгыратарга буолбатах, тупсарарга анаммыттар. Ити «МРОТ» диэн таах ааттанар эрэ хамнас алын кээмэйэ тиийинэн олоруу алын кээмэйиттэн кырата суох буолуохтааҕа олоххо киирдэҕинэ, кыра хамнастаах дьон абыраныа этилэр. Түмүкпэр, дьаҥтан-дьаһахтан тэйэн, бу куоластааһыҥҥа көхтөөхтүк кыттаргытыгар ыҥырабын.

Ангелина Васильева, «Саха сирэ» хаһыат

Добавить комментарий

Ваш адрес email не будет опубликован. Обязательные поля помечены *