Назарбаев политиката өрүү интэриэһиргэтэрэ

Саҥа дьыл бырааһынньыгын кэнниттэн Казахстаҥҥа буолбут миитин, аймалҕан үгүспүтүн долгуппут буолуохтаах. Бары даҕаны бу өрөспүүбүлүкэни бырааттыы судаарыстыбалартан биир бастыҥ олохтоох-дьаһахтаах, туруктаах экономикалаах дойдунан ааҕарбыт.

 

Ороскуот – 3 млрд доллар

Аҕыйах күн иһигэр Алма-аты куорат маҕаһыыннарын, кафеларын, телевидение офиһыгар, аэропорка тиийэ урусхаллааһын, 200-тэн тахса киһи, оннооҕор кырачаан оҕолор суорума суолланыылара, эчэйиилэрэ судаарыстыба инники олоҕун сатарытара саарбаҕа суох. Казахстан президенэ Касым-Жомарт Токаев бэлиэтээбитинэн, ороскуот 3 млрд долларга тэҥнэһэр. Биллэрин курдук, олохтоох былаас гааз сыанатын үрдэтэрин туһунан иһитиннэрбитин кэнниттэн миитиннэр саҕаламмыттара. Итинэн туһанан, бэрээдэги билиммэт урдустар, саалаах-сэбиргэллээх кэлии дьон (террористар) туттуммахтаан, ыһан-тоҕон, алдьатан-кээһэтэн хааллылар. Үөһэ этэн аһарбытым курдук, эйэлээх олохтоохтор сырдык тыыннарыгар кытта турдулар.

Экспердэр бу аймалҕан төрүөтүн араастаан сыаналыыллар. Политологтар миитин биир саамай бөдөҥ төрүөтүнэн нэһилиэнньэ былаас социальнай-экономическай политикатын сөбүлээбэтин, астымматын ааттыыллар. Социальнай дэлби тэбиинэн сыаналыыллар. Политика эмиэ кыттыспыт буолуоҕун сорохтор ахталлар. Сорох экспердэр ити быһыыны-майгыны Украина майданын кытта тэҥнииллэр.

Олоххо-дьаһахха тыын суолталаах объектары алдьатыыттан-кээһэтииттэн, миитиҥҥэ саалаах-саадахтаах дьон кыттыспыттарыттан көрдөххө, эрдэттэн бэлэмнэниллибит, тэрээһиннээх айдаан буолуон сөп курдук.  Тустаах аймалҕан атыттарга түмүк оҥостоллоругар уруок буолара саарбаҕа суох.

Санатар эбит буоллахха, 1986 сыллаахха ахсынньыга Алма-Аты куоракка эмиэ бөдөҥ миитин, аймалҕан буолан турар. Ити айдаан түмүгэр 8,5 тыһыынча киһи тутуллан хааллыбыта.

 

Олус хомолтолоох

Бу бырааттыы судаарыстыба олоҕо, ыытар политиката, экономиката миигин уруккуттан интэриэһиргэтэрэ Хас биирдии киһиэхэ бэйэтин иһигэр киллэрэр политиктаах буолар. Миигин Казахстан бастакы Президенэ Нурсултан Назарбаев личность, елбасы (лидер) быһыытынан уонна кини ыытар политиката өрүү интэриэһиргэтэрэ.

Аймалҕантан көрдөххө, нэһилиэнньэ дойдуларын билигин да Назарбаев салайан олорор курдук саныыр эбит.

Төһө даҕаны билигин кинини ситэ сыаналаабатахтарын иһин (пааматынньыгын суулларыахтарыгар диэри), Назарбаев бу судаарыстыба үүнүүтүгэр-сайдыытыгар сүдү оруоллаах. Итини хайа да бэйэлээх туора соппот буолуохтаах. Өбүгэлэрбит туохха барытыгар аһара барымаҥ, ортотун тутуһуҥ диэн сөпкө да этэллэр. Нурсултан Абишевич кэмигэр, дьонуттан-сэргэтиттэн абааһы көрүллүүгэ тиийбэккэ эрэ, политикаттан, былаастан дьоһуннук туораан биэрбитэ, сүбэһит быһыытынан сылдьыбыта буоллар, букатын атын хартыына буолара саарбаҕа суох. Уопсайынан икки атахтаахха ортотун көрбөт, тутуспат, бэйэ хонтуруолуттан тахсар аһара туттунуу баар суол. Итиччэ дойдутун, дьонун-сэргэтин туһугар утуйар уутун умнан туран үлэлээн-хамсаан баран, былаастан итинник туорааһын олус хомолтолоох.

Ити буолбут быһыынан-майгынан сибээстээн, 2019 сыллаахха ыам ыйыгар Астана куорат Нур-Султан ааты саҥа сүгээтин кытта, онно айаҥҥа туруммуппун өйдөөн-санаан кэллим. Манна айаҥҥа турунуум биир төрүөтүнэн Нурсултан Назарбаевы политик быһыытынан интэриэһиргиирим буолбута.

Казахстан Президенин быыбардарын туһунан хаһыаттарга хаста да суруйан турардаахпын. Ааҕааччыларым баҕар өйдүүргүт буолуо, кини үрдүк дуоһунаһыттан тохтообутугар, «Ил Түмэн» хаһыакка «Назарбаев былаастан барда дуо?» диэн ыстатыйаны таһаарбыппын. Дьэ ити суруйуум тахсаатын кытта, илэ харахпынан көрө, эт кулгаахпынан истэ, бу дойду олоҕун-дьаһаҕын кытта билсэ, пандемия эрэ иннинэ айаҥҥа туруммутум.

 

Сайдыы авиахампаанньаттан эмиэ көстөр

Авиабилиэт чэпчэки буолан, Нур-Султаҥҥа Москванан көппүппүт. Дьиҥэ, Новосибирскайтан бу турдаҕа дии. Итинтэн сөмөлүөтүнэн чаастан эрэ ордук көтөҕүн. Оттон Москваттан 3 чаастан ордук көтөн тиийэҕин.

Москваттан Нур-Султан куоракка «Эйр Астана» авиахампаанньанан көппүппүт. Олох үчүгэй үлэлээх хампаанньа буоларын, көтөр аалга киирээт, сэрэйэҕин. Ол курдук, кириэһилэлэрэ олус сымнаҕастар. Хас биирдии олбоххо сыттык. Мониторга ханан көтөн иһэрин барыта көстө турар. Аны наушнигынан ырыа, музыка арааһын истиэххэ, киинэ да көрүөххэ сөптөөх. Бортүлэһиттэр пассажирга олус эйэҕэс сыһыаннаахтара. Хас биирдии пассажирга айаҥҥа туттуллар бэлэх (тиис суунар щетка, паста, сылаас наскы, утуйарга кэтэр ачыкы, атах таҥаһын кэтэргэ ньуоска) түҥэтэллэр. Өссө эбиитин шоколад наборун туттаран, үөртүлэр-көтүттүлэр. Астара эмиэ олус үчүгэй. Итинник далбарга уйдаран, Нур-Султаҥҥа көтөн тиийбиппитин билбэккэ да хаалбыппыт. Күндү ааҕааччым, мөлтөх үлэлээх авиахампаанньанан көттөххө, бириэмэ баран испэтин бэйэҥ билэр буолуохтааххын.

Дойду туһунан бастакы өйдөбүл сөмөлүөттэн уонна таможняттан саҕаланар диэн этэллэрэ саамай сөптөөх. Казахстан туһунан маҥнайгы өйдөбүлбүт олус үчүгэй буолбута.

 

Дьикти түгэн — сэргэлээх отельга

Авиапортан «Яндекс» таксины сакаастаан, эрдэттэн куйаар ситиминэн броннаабыт «Сункар» отельбытыгар айаннаатыбыт. Нур-Султаҥҥа гостиница, хостел арааһа олус элбэҕин бэлиэтиибин. Риксостан саҕалаан, Хилтоҥҥа тиийэ отеллэр бааллар. Боростуой гостиницалар туһунан этэ да барыллыбат.

Этэргэ дылы, күн эгэлгэ отелэ олус элбэх. Сыаналара удамыр да буолбакка, олус чэпчэкилэр. Хосторо истиэптэрин курдук киэҥэ-куоҥа.

Авиапортан сарсыарда эрдэ халлаан суһуктуйа сырдаан эрдэҕинэ, «Сункар» отельбытыгар айаннаан тиийбиппитигэр дьикти түгэҥҥэ түбэстибит. Арай гостиницабыт тэлгэһэтин саамай көстүүлээх сиригэр аар баҕах сэргэбит турар эбит. Соһуйуу бөҕөтүн соһуйбуппут, сөҕүү бөҕөтүн сөхпүппүт, үөрбүппүт-көппүппүт. Эрдэ итини хантан билиэхпитий? Туох да мээнэҕэ буолбат диэн итини этэн эрдэхтэрэ.

Утуйан туран баран, маҕаһыынтан тахсан, үрүҥ ас атыылаһан, сэргэбитин айах туттубут. Бу сэргэ үгүстэр сэрэйбиккит курдук, 2017 сыллаахха бэс ыйын 19 күнүгэр VI норуоттар икки ардыларыынаҕы «Тенгрианство и эпическое наследие народов Евразии: истоки и современность» диэн научнай-практическай конференция кэмигэр «Киэргэ» фирма дириэктэрэ Александр Павлов, Казахстантан Амангельды Ахметов уонна биһиги түспүт «Сункар» гостиница көмөлөрүнэн туруоруллубут. Ааҕааччым сэргэни космоһы, куйаары кытта ситимнээҕин билэр буолуохтааххын. Итинтэн Казахстаҥҥа мээнэ тиийбэтэхпитим сэрэйдибит. Александр Кириллович хас да тас дойдуга саха сэргэтин туруорда. Итиннэ сырыттахпытына, кини Литваҕа Каунас куоракка туруора сылдьарын туһунан үтүө сурах тиийэн кэлбитэ.

 

Нур-Султан буолбутун сөбүлүүллэр дуо?

Биллэрин курдук, 2019 сыл кулун тутар 19 күнүгэр Казахстан Президенэ Нурсултан Назарбаев үрдүк дуоһунаһыттан тохтуурун туһунан иһитиннэрбитэ. Кини оннугар дойду Президенин быыбарыгар диэри үрдүк дуоһунаска хаалбыт парламент үрдүкү палаататын спикерэ Касым-Жомарт Токаев бастакы Ыйааҕынан дойду киин куоратын Астананы Нур-Султан диэн ааттаабыта.

Интернеттэн дойдуларын киин куоратын аата уларыйбытын сөбүлээбэттэр баалларын көрөрүм. Араас саастаах дьоҥҥо «Астана Нур-Султан ааты сүкпүтүгэр туох санаалааххын?» диэн ыйытык оҥорбутум. Хомойуох иһин, ыччат да, орто саастаахтар да, ытык кырдьаҕастар да ити уларыйыыны сөбүлээбэттэрин туһунан эппиттэрэ. «Сөбүлүүбүн» диэн хоруйу биир да киһиттэн истибэтэҕим.

Кинилэр: «Нурсултан Назарбаев аатынан норуоттар икки ардыларынааҕы авиапорт, университет, киниэхэ анаан хас да пааматынньык бааллар, Астананы Нур-Султан диэн уларыппыттарын сөбүлээбэппит», – диэн быһаччы хоруйдары биэрбиттэрэ. Онон куйаар ситимин сонуна кырдьык буолан тахсыбыта.

Ол эрээри Президеннэрэ үрдүк дуоһунаһыттан тохтуурун туһунан сонуну, бары кэриэтэ дьаархана, куттана, сэрэхэдийэ истибиттэрин туһунан үгүстэр эппиттэрэ. Буолумуна, Назарбаевтара дойдуну салайар кэмигэр халыҥ хаххалаах, суон дурдалаах курдук олордохторо…

 

Бастакы Президент музейыгар

Казахстан бастакы Президенин Нурсултан Назарбаев музейыгар хайаан да сылдьардыы сананан барбытым. Ол сыалбын ситиспитим. Олус интэриэһинэй музей этэ. Назарбаев дойду Президенэ буолаат, ылыммыт Ыйаахтара, уураахтара, дьаһаллара, дастабырыанньаларыгар тиийэ баара. Музей биир хоһо спорка анаммыт. Онно күөх экраҥҥа Нурсултан Абишевич ыччаты спорка угуйар, ыҥырар этиитэ көстөр. Бэйэтэ спордунан утумнаахтык дьарыктанар эбит. Ол иһин да итиччэ үгүөрү сааска диэри чиргэл доруобуйалаах кэллэҕэ. Араас биллэр-көстөр спортсменнар, дойду сүүмэрдэммит хамаандалара биэрбит бэлэхтэрэ экспонат быһыытынан тураллар.

Президент аан бастаан үлэлээбит кабинетын, күнүс эбиэттиир, мунньахтыыр саалаларын көрдүбүт. Музей саамай үөһээ этээһигэр араас судаарыстыбалар Президеннэрэ Нурсултан Абишевичка биэрбит бэлэхтэрэ экспонат буолан тураллар.

 

Политическай гроссмейстер

Нурсултан Назарбаевы политическай гроссмейстер диэн мээнэҕэ ааттаабаттара. Бэйэтин мындыр, дириҥ өйүнэн-санаатынан, дьулуурунан, дьүккүөрүнэн дойдутун тутулуга суох сайдыылаах судаарыстыба быһыытынан ааттаппыт аан дойдуга биир үрдүк аптарытыаттаах политик буолар. Кини үс бөдөҥ судаарыстыба: Россия, АХШ, Кытай Президеннэрин ытыктабылынан, билиниилэринэн туһаныан туһанара. Назарбаевка Дональд Трамп, Си Цзиньпин бэйэлэринэн төлөпүөннүүллэрин туһунан элбэхтик суруйаллар. Оттон урукку да өттүгэр хаста да суруйбутум курдук, Нурсултан Абишевич күн сириттэн күрэммит Сингапур лидерин Ли Кван Юну чугас доҕордуу этилэр.

Өйдүүргүт буолуо, ыһыллыы-тоҕуллуу 90-с сылларыгар Казахстаны батыһааччы, үтүктээччи элбэҕэ.

Маны таһынан Казахстан төһө даҕаны бөдөҥ 20 судаарыстыба иһигэр киирбэтэр, кинини саммиттар үлэлэригэр өрүү кытыннара ыҥыраллара, бу дойду аптарытыаттааҕын, Нурсултан Назарбаевы ытыктыылларын туоһулуур.

Кытай Народнай Өрөспүүбүлүкэтэ киниэхэ үрдүк дуоһунаһыттан тохтообутун кэнниттэн тас дойдулар гражданнарыгар биэрэр саамай үрдүкү наҕараадаларын, «Доҕордоһуу» уордьанын туттарбыта.

Назарбаев бочуоттаах сынньалаҥҥа барбатаҕа, Нурсултан Абишевич Куттала суох буолуу Сэбиэтин салайааччытынан хаалыыта, бэйэтин политическай дьайыытын хаалларбатаҕын бэлиэтэ этэ. Ол курдук,  2018 сыллаахха Казахстаҥҥа Куттала суох буолуу Сэбиэтэ дойду былааһын үрдүкү уорганынан буоларын туһунан саҥа сокуон ылыллыбыта. Онон Назарбаев дойдуну салайсар биир лидер быһыытынан син-биир хаалбыта. Итини таһынан «Нур-Отан» диэн тустаах судаарыстыба баһылыыр-көһүлүүр партиятын лидерынан буолар.

Дойду киин куората кини сирэйэ дииллэр. Нур-Султан куораттан да көрдөххө, судаарыстыба олус диэн сайдыбыта көстөрө. Сүүрбэ сыл анараа өттүгэр истиэпкэ саҥа аныгылыы куорат тутуллан дьэндэйиэҕин туһунан оннооҕор Назарбаев чугас эргимтэтэ да итэҕэйбэтэ. Билигин сайдыылаах инфраструктуралаах куорат араас саммиттар, норуоттар икки ардыларынааҕы быыстапкалар ыытыллар мегаполистарыгар кубулуйбут.

Олохтоохтор Нурсултан Абишевич доруобуйатын туруга олох үчүгэйин туһунан эппиттэрэ.

Кини дойдутугар өссө бөдөҥ уларыйыылар буолуохтарын баҕарара «Взгляд в будущее: модернизация общественного сознания» диэн ыстатыйатыттан көстөрө. Аан дойдуга саҥа кэм сатыылаабытынан, Казахстаҥҥа үһүс модернизацияны (политическай реформа уонна экономика модернизацията) ыытыан баҕалааҕа ити суруйууттан биллэрэ.

Казахстан уонунан тыһыынча эдэр специалистара аан дойду бастыҥ үөрэхтэрин кыһаларыгар үөрэммиттэр. Небинэн баай дойду экономикатын туһунан этэ да барыллыбат. Нурсултан Абишевич  дойдуну салайар кэмигэр пенсия уонна хамнас 6-7 төгүл үрдээбит. Ис баалабай бородууксуйа (ВВП) Сингапурдааҕар, Малайзиятааҕар 2-3 бүк улааппыт. Казахстаны аан дойду 50 бастыҥ судаарыстыбаларын иһигэр киллэрбит. Президент быыбарыгар туруоммут биир сүрүн сыалын-соругун чиэстээхтик толорбут.

Кинини култуураҕа уонна духуобунаска чугас лидер быһыытынан үгүстэр сыаналыыллар. Политологтар Нурсултан Назарбаевы норуотун култууратыгар, духуобунаһыгар уонна төрөөбүт тылы сайыннарыыга ураты истиҥ сыһыаннааҕын бэлиэтииллэрэ. Ол курдук, кини аан дойду 100 бастыҥ учебнигын казах тылынан тылбаастыыр туһунан Ыйаах таһаарбыта. Итини экспердэр инновационнай бырайыак быһыытынан сыаналаабыттара. Манна Назарбаев судаарыстыбаннайа суох тылбаас Национальнай бюротун тэрийбитэ. Маны таһынан тюрк тыллаах Казахстан латиницаҕа көспүтэ.

Назарбаев биир улахан ситиһиитинэн дойдутугар омуктар икки ардыларыгар или, эйэни олохтообута буолар. Биллэрин курдук, Казахстаҥҥа 140 араас омук олорор. Ол курдук, кини конституционнай уорганы — Казахстан норуоттарын Ассамблеятын тэрийбитэ.

Нурсултан Назарбаев хас биирдии ылынар быһаарыныыта боростуой дьон дьылҕатыгар хайдах дьайыылаах буолуой диэн ыйытыыттан сирдэтиллэн тахсан, дириҥник толкуйданыллыбыт буоларын туһунан политологтар бэлиэтииллэрэ.

Казахстаҥҥа сылдьарбытыгар дойду Президенин быыбарыгар күүстээх бэлэм саҕаламмыта көстөрө. Кэлэр судаарыстыба аҕа баһылыгынан Назарбаев оннугар дойду Президенин быыбарыгар диэри үрдүк дуоһунаска хаалбыт парламент үрдүкү палаататын спикерэ Касым-Жомарт Токаевы үгүстэр көрөллөрө. Олохтоохтор да кини дойду аҕа баһылыга буоларыгар эрэнэллэрэ. Сол да курдук буолбута. Токаев Казахстаҥҥа Назарбаев кэнниттэн иккис нүөмэрдээх бөдөҥ политигынан буоларын бэлиэтиибин.

Оччолорго да Казахстан олохтоохторун ортолоругар лидедэрин астыммат дьон суох буолбатахтара, бааллара. Дьоҥҥо кэмигэр киһини, салайааччыны сыаналаабат буолуу диэн баар көстүү.

 

Киһи сөҕөр тутуулара

Нур-Султан — олус кэрэ куорат. Араас быһыылаах-таһаалаах аныгылыы тутуулар элбэхтэр. Холобурга аҕаллахха, «Хан-Шатыр» диэн эргиэн кииннэрэ хайдах эрэ ураһа моһуоннаах. Эксполара сир шарын курдук төгүрүк. Пирамида да курдук тутуулар эмиэ бааллар. Куорат киинэ Холбоһуктаах Арабскай Эмират киин куоратын Абу-Дабины санатар. Түүнүн кустук өҥүнүү араас уота-күөһэ, киһи эрэ сөҕүөн-махтайыан курдуга. Саҥардыыта туруоруллубут олус үрдүк, эмиэ араас уотунан күлүмүрдүүр «Колесо обозрениеҕа» олорсон, киэһээҥҥи куораты бүтүннүү хабан көрбүппүт. Фонтаннара эмиэ олус кэрэ көстүүлээхтэрэ.

Киин куорат хабыллар хаба ортотугар манна кэлбит ыалдьыт хайаан да таарыйан ааһар «Байтерек» монумена турар. Бу монумены Нурсултан Абишевич бэйэтин бырайыагынан туттарбыт диэн кэпсииллэр. Тутуу саамай чыпчаалыгар көрөр площадка баар. Манна Назарбаев көмүс курдук  кылабачыгас тимиргэ ытыһын суолун куппуттара баар. Дьон онно ытыстарын уура-уура хаартыскаҕа түһэллэр.

«Хан-Шатыр» эргиэн киин саамай үрдүкү этээһигэр аатырбыт-сураҕырбыт сабыылаах пляжтара баар. Кумаҕын Мальдивыттан аҕалбыттар. Пальмалар үүнэн тураллар. Тропик кыраадыһын тутан тураллар. Оннооҕор кэмиттэн-кэмигэр бассейнҥа муора долгунун курдугу түһэрэллэр. Дьэ онно үөрүү-көтүү саҕаланар. Онон сөтүөлүүргэ, бары өттүнэн табыгастаах. Кафе-бар, хачыал, сытар кириэһилэлэр сынньанарга усулуобуйа барыта баар.

Бу эргиэн киинигэр киинэ, кэнсиэр көрөр саалалардаах, араас аттракционнарлаах. Биир күҥҥүн бүтүннүүтүн итиннэ аныаххын сөптөөх.

Эксполара киһи сөҕүөн эрэ курдук. Олох атын үйэҕэ үктэммит курдук сананаҕын. Хас этээс ахсын тус-туһунан виртуальнай эйгэ. Уу да, тыал да, астрономия да, кинетика да, о.д.а. араас эйгэлэргэ киирэн тахсаҕын. Манна наһаа элбэх омук туристара баалларын бэлиэтии көрбүтүм. Итинтэн Казахстаҥҥа туризм тэтимнээхтик сайдан эрэрэ көстөрө. Арааһа, пандемия мэһэйдээбэтэҕэ буоллар, бу судаарыстыбаҕа туризм салаата тэтимнээхтик сайдыаҕа хааллаҕа. Бу Экспо таһыгар «Мега» диэн эргиэн киинэ баар. Манна били «Дубай-моллга» баар курдук каток кытта баар.

Өр сыллар усталара тутуллан, үрүҥ мечеттэрэ үлэҕэ киирбит этэ. Бу тутуу куорат биир кэрэ көстүүлээх архитектуратынан буолуон буолара. Авиапорт таһыгар баар эргэ мечеттэрэ эмиэ олус кыраһыабай көстүүлээҕэ.

Биллэрин курдук, Казахстаҥҥа сүүстэн тахса араас омук олорор. Нур-Султаҥҥа үс православнай таҥара дьиэтэ баарын бэлиэтиибин.

 

Туруктаахтык олороллоро көстөрө

Казахстаҥҥа уматык сыаната саамай чэпчэки. Биһиги сылдьарбытыгар лиитэрэ бензин 25 солк. эрэ этэ. Онон, биллэн турар, бородуукта сыаната олус чэпчэки этэ. Такси сыаната эмиэ удамыра. Манна «Яндекс» такси ордук тэнийбит этэ. «Индрайвер» эмиэ үлэлиирэ. Казахтар «Индрайверы» биир дойдулаахпыт төрүттээбитин истэннэр соһуйаллара.

Кафеларын, рестораннарын сыаналара эмиэ удамыра. Үрүҥ уонна эт астара олус минньигэстэрэ. Бешбармак, шурпа, куардык диэн национальнай бүлүүдэлэрин боруобалаабытым.

Биир да дьиэтэ-уота, үлэтэ-хамнаһа суох умнаһыт киһи (бомж) баарын көрбөтөҕүм. Онон киһи уулуссаҕа холкутук сылдьара, күүлэйдиирэ.

Казахтар бырааһынньыгы тэрийэллэрин сөбүлүүллэрин бэлиэтии көрбүтүм. Биһиги түспүт гостиницабытыгар рестораҥҥа субу-субу бырааһынньыктар буолаллара. Оннооҕор 1 сааһын туолбут оҕолоругар олох улахан бырааһынньыгы тэрийэллэр эбит этэ. Аҕам саастаахтарга эмиэ араас тэрээһиннэр буолаллара. Мантан да кинилэр туруктаахтык олороллоро көстөрө.

Казахстаҥҥа Кытай уонна Турция инвестордара олус элбэхтэрэ. Нур-Султаҥҥа кытайдар Дубайга курдук сир үрдүнэн сылдьар метро тутан эрэллэрэ.

 

Төрөөбүт тылга сыһыан

Биһигини казахтар диэннэр өрүү бэйэлэрин тылларынан кэпсэппитинэн бараллара. Онуоха нууччалыы саҥардахпытына, төрөөбүт тылларынан кэпсэппэттэр диэннэр, кыыһыраары гыналлара, сахаларбыт диэммит нэһиилэ уоскутарбыт. Итинтэн да төрөөбүт тылларын өрө туталлара көстөрө.

Телевидениелэригэр казах тылынан ханаал олус элбэҕэ. Куһаҕан, мөкү сонуну кэпсииллэрин, биэрэллэрин биирдэ да көрбөтөҕүм. Ордук ыччат өртө нууччалыы уонна английскайдыы олус үчүгэйдик билэллэрэ.

 

* * *

Төһө да аймалҕан, айдаан буоллар, Казахстан бастакы президенин Нурсултан Назарбаев дойдутугар, дьонугар-сэргэтигэр оҥорбут үтүөтүн-өҥөтүн хайдах даҕаны гынан туора сотон кэбиспэккин.  Оҥоһуллубуту кэм-кэрдии, история миэстэтигэр туруортуо буоллаҕа.

 

Людмила НОГОВИЦЫНА.

 

Добавить комментарий

Ваш адрес email не будет опубликован. Обязательные поля помечены *