Нерюнгрига – Дальнай Восток тустууга чемпионата 

Бу өрөбүл күннэргэ – олунньу 15-16 күннэригэр Нерюнгри куорат “Шахтер” спортивнай комплексыгар дьахталларга уонна эр дьоҥҥо Дальнай Восток федеральнай уокуругун көҥүл тустууга чемпионата ыытыллар. Чемпионат сүрүн соругунан, Россия чемпионатыгар кыттар быраабы ылыы буолар. Ол курдук, дойду эр дьоҥҥо чемпионата муус устар ыйга Бурятия буолаары турар.

 

Бу эппиэттээх күрэхтэһиигэ бэлэмнэнэн, Саха Республикатын көҥүл тустууга сүүмэрдэммит хамаандата “Триумф” Спорка бэлэмнэнии киинигэр анал үөрэтэр-эрчийэр түмсүүнү ааста. Биһигиттэн Нерюнгрига 60-ча бөҕөс кыттара күүтүллэр.

Биллэрин курдук, инники күрэхтэһиилэр түмүктэринэн, Саха сириттэн – Арыйаан Тютрин, Виктор Рассадин, Петр Константинов уонна Михаил Иванов инники ситиһиилэринэн номнуо Россия чемпионатыгар кыттар кыахтаахтар. Онон, кинилэртэн ураты күүстээх тустууктарбыт бары Нерюнгри көбүөрүгэр тахсыахтара.

СР көҥүл тустууга сүүмэрдэммит хамаандатын кылаабынай тренерин эбээһинэһин толорооччу Александр Оконешников иһитиннэрбитинэн, ыйааһын ахсын үс бастакы миэстэни ылбыттар (чемпион, иккис миэстэлээх, икки үһүс миэстэлээх), Россия чемпионатыгар кыттар кыахтаныахтара. Санатан эттэххэ, быйылгыттан Дальнай Восток федеральнай уокуругун чемпионатыгар уруккуттан тустууга үтүө үгэстээх Бурятия Республиката уонна Забайкальскай кыраай хамаандалара киирэн биэрдилэр. Онон илин былдьаһыы сытыырхайда диэххэ сөп.

Чемпионат бырагыраамата:

Олунньу 14 күнэ, бээтинсэ

10:00-16:00 – Мандатнай хамыыһыйа үлэтэ.

16:00-17:00 – Хамаандалар бэрэстэбиитэллэрэ кыттыылаах судьуйалыыр коллегия сүбэ мунньаҕа.

17:00-17:30 – Чемпионат кыттыылаахтарын сэрэбиэйдэрэ, дьахталлар – 50, 53, 55, 57, 59, 62, 65, 68, 72, 76 кг, эр дьон – 57, 61, 65, 70, 74, 79, 86, 92, 97, 125 кг.

Олунньу 15 күнэ, субуота

08:00-08:30 – Кыттааччылары медицинскэй көрүү уонна ыйааһыннааһын.

10:00-15:00 – Барыллааһын хапсыһыылар.

11:00-11:30 – Чемпионаты үөрүүлээхтик аһыы.

15:00-16:00 – Тохтобул.

16:00-18:00 – Финал аҥарынааҕы тустуулар.

Олунньу 16 күнэ, баскыһыанньа

08:00-08:15 – Кыттааччылары ыйааһыннааһын.

10:00-12:00 – “Уоскутар” бөлөх тустуулара.

12:00-13:00 – Тохтобул.

13:00-15:00 – Финаллар. Кыайыылаахтары наҕараадалааһын.

“Дьулурҕан”.

 

Добавить комментарий

Ваш адрес email не будет опубликован. Обязательные поля помечены *