Николай Лугинов: «Аллайыахаҕа махтана саныыбын!»

Атырдьах ыйын 7-12 күннэригэр Чокурдаахха Саха сирин норуодунай суруйааччыта, СӨ искусствотын үтүөлээх деятелэ Н.А.Лугинов сырытта. Манна кинини улуустааҕы киин бибилэтиэкэҕэ көрсүһүүгэ ыҥырдылар уонна Д.А.Лебедев аатынан туундара айылҕатын мусуойугар сырытыннардылар.


Николай Лугинов аан маҥнай Аллайыахаҕа 40 сыллааҕыта кэлбит. Бу сыллар устата уопсайа уончата дуу, өссө элбэхтэ дуу биһиги туундарабытыгар кэлэн сынньанан, айар кутугар күүс эбинэн барбыт. Бу сырыыга «Аленка» диэн балыктыыр учаастакка сылдьыбыт. Суруйааччы, хоту дойду күнэ-дьыла бэркэ туран биэрэн, Колымскай боротуокаҕа Станчик диэн сиргэ тиийбититтэн астынар. Станчик 1852 с. тутуллубут былыргы таҥара дьиэтэ баарынан биллэр.

Бибилэтиэкэҕэ Н.Лугинов баар кинигэлэриттэн «Айар илбис аргыстанан» диэн быыстапка оҥорон үөрдүбүттэр. Оттон суох кинигэлэри суруйааччы ыытар былааннаах. Билигин Н.А.Лугинов П.Ойуунускай аатынан Литературнай музей дириэктэринэн үлэлиир.

«Бу дойдуттан уонна Тиксииттэн олус элбэх санаа ылан 1979-85 сылларга суруйбут айымньыларым «Таас Тумус» кинигэҕэ киирбитэ. Онон «Кустук», «Таас Тумус», «Суор», «Сылкан оҕонньор» уонна да атын бастыҥ сэһэннэрим суруллубуттарын иһин Аллайыаханы иккис дойдум курдук махтана саныыбын. Бу айымньылар үгүс омук сиригэр тылбаастанан тахсыбыттара, ол иһин үгүс бириэмийэлэри ылбытым.
Махталы кытары Н.Лугинов. 12.08.2019 г. Чокурдаах«, — диэн бибилэтиэкэ дириэктэрэ М.И.Иванова көрдөһүүтүнэн уопсай тэтэрээккэ суруйан хаалларда.

Духуобунас, култуура, литература курдук тулхадыйбат өйдөбүллэр тула биллиилээх суруйааччыбыт, 1979 с. ССРС Суруйааччыларын сойууһун, Аан дойдутааҕы түүр академиятын дьиҥнээх чилиэнэ Николай Лугиновтыын сэһэргэһии Аллайыаха олохтоохторугар умнуллубат түгэннэри бэлэхтээтэ.

Ааптар: Клавдия ПОРТНЯГИНА

Сообщение Николай Лугинов: «Аллайыахаҕа махтана саныыбын!» появились сначала на Ulus.Media — все главные новости из районов Якутии.

Комментарии закрыты.