Норуот эмтиэкэтэ  — норуот мындыр ньымата

Эбиэс туһата

Эбиэс киһи доруобуйатыгар олус туһалаах. Хаан састаабын тупсарар, тымырга  хаан бөлөнөҕө (тромб) үөскүүрүн тохтотор, ноор ыарыытыттан  (панкреатиттан ) эмтэнэргэ туттуллар. Ол эрэн, куртахха, оһоҕоско гааһы элбэхтик үөскэтэрин быһыытынан “ыарахан” аһылыкка киирсэр. Гааһы ордук элбэхтик эбиэстэн арыыта суох бэлэмнэммит ас үөскэтэр. Эбиэс бу дьайыытын уксуустаах, элбэх арыылаах уонна минньигэс аһылык, ону таһынан лимон, айва тохтотоллор.

Эбиэс буспут уутун туһата: 1 ыстакаан сууйуллубут эбиэс туорааҕар 1 л сылаас ууну кутан баран, 10 чаас устата туруоруҥ. Ол кэннэ кыра уокка 30 мүнүүтэ оргутуҥ. Эбии 12 чаас туруора түһүҥ, онтон сиидэлээҥ. Эбиэс бу уутугар 1 л тиийиэр диэри сөрүүн оргуйбут ууну кутуҥ уонна ыстакаан аҥаарынан күҥҥэ 3-4-тэ аһыах иннинэ иһиҥ. Эмтэнии уһуна биир ый.

Эбиэс буспут уута бүөр сүһүрүүтүттэн, диабеттан, энурезтан, подаграттан эмтэнэргэ көмөлөөх.

Чеснок туһата

Чеснок былыр-былыргыттан аан дойду үгүс норуоттарыгар эмп курдук туттуллар. Сүрэх-тымыр ыарыыларын биричиинэтинэн атеросклероз буолар. Холестерин тымыр истиэнкэлэригэр мунньуллан, тымырдары кыаратан, хаан эргиирэ бытаарар.  Сүрэх тымыра алдьанара — инфарк, мэйии тымыра моһуоктанара – инсульт диэн аатырар. Кардиологтар  этэллэринэн, чеснок атеросклероз ыарыыны бытаардар. Ол эрээри холестерин  таһыма чесногу  сиэбэтэххинэ да  үрдүүр. Онон аҥаардас чесногунан эрэ буолбакка, сыата-арыыта суох аһынан уонна элбэхтик хамсанан  сүрэх-тымыр ыарыыларын сэрэтиэххэ сөп.

Чеснок өссө киһи тымырыгар хаан бөлөнөҕө үөскүүрүн тохтотор. Састаабыгар баар аджеон диэн эттик ол тромбону суурайар, суох оҥорор. Чеснок рак искэҥэ үөскүүрүн  тохтотор. Маныаха сералаах аллицин  диэн эттигэ антиоксидант оруолун  толорор. Маны таһынан хабах, күөмэй, эмиий, простата рактара эмиэ биллэрдик аҕыйыыллар.

300 грамм чесногу 0,5 л бытыылкаҕа ук, үрдүгэр сабар гына испиири кут. Үс нэдиэлэ көөнньөрө туруор. Ити көөнньөһүктэн  20 хааппыланы ыстакаан  аҥаара үүккэ булкуйан ис. Бу састаап киһи доруобуйатын бөҕөргөтөргө, умнуган буолууттан туһалыыр.

Холецистит утары

— 500 гр эбиэскэ 1 л оргуйбут итии ууну кутан 40 мүнүүтэ туруоруллар. Күҥҥэ 3-тэ ыстакаан аҥаарынан ис.

— Сүбүөкүлэни ыраастаан, кырбаан баран хойдон сироп буолуор диэри өр оргут. Ыстакаан 1/4 күҥҥэ үстэ аһыах иннинэ ис.

— Ыстакаан аҥаара хаппыыста суогун күҥҥэ 2-3 төгүл сылытан баран ис.

— Аһыаҥ 30 мүнүүтэ иннинэ ыстакаан  ¼ рябина суогун күҥҥэ 2-3-тэ иһэр доруобуйаҕа олус туһалаах.

Оһоҕос үлэтин тупсарарга

— Сарсыардааҥҥы аһылыктан  эбиэккэ диэри 30 мүнүүтэ буола-буола  1 остолобуой ньуоска тымныы уута ис. Эбиэт кэннэ эмиэ итинник схеманан иһиэххэ сөп.

— 1 грамм моркуоп сиэмэтиттэн  оҥоһуллубут бороһуогу  күҥҥэ 3-тэ аһыаххыт 1 чаас иннинэ сиэҥ.

Ноору ыраастааһын

  • 2 кг петрушка хаппыт силиһин мясорубкаҕа эрий. 3,5 л үүккэ 1,5 чаас мөлтөх уокка оргут. Үс күн устата ити хааһыны сиэ. Кэнники 5 хонукка гааһа суох минеральнай  ууну ис  уонна вегетарианскай диетаны тутус.

Сүрэх былчыҥнарын ыраастааһын, бөҕөргөтүү

  • Сарсыарда, эбиэккэ уонна киэһэ 1 лимон суогун уонна 1 л сылаас уута ис. Дьэдьэн сэбирдэҕин чэй курдук көөнньөрөн  ис. 7 күн итинник эмтэн.
  • Сүрэҕиҥ эмискэ ыарыйдаҕына, 8 чайн.нь. лимоннай мята, мелисса оттор сибэккилэрин эбэтэр сэбирдэхтэрин 2 ыстакаан ууга 4 чаас устата сабан туруоран баран ыстакаан аҥаардыытынан күҥҥэ 4-тэ аһыаҥ иннинэ ис.

Ишемическэй сүрэх ыарыытыгар уонна атеросклерозтан

  • 1 ч.нь. хрен от сибиэһэй силиһин мүөккэ 1 остолобуой нь. буолуор диэри булкуй.Сарсыарда  аһыаҥ 1 чаас иннинэ сиэ. Аһылыккар соя, чеснок, балык, фрукта баара ордук.

Сирбит аһа эмтээх, бэйэбитигэр туһалаах

Дөлүһүөн

Эмкэ  күһүн тоҥоруу түһүөн иннинэ хомуллубут отонун туһаналлар. Хаппыт отоннору мэлийэллэр. 5 остолобуой ньуоска мэлиллибит отону 1 л тымныы ууга кутан, 10 мүнүүтэ оргутуллар. 8-10 чаас таҥаһынан суулаан сөҥөрдөллөр, онтон сиидэлииллэр.  Сарсыардаттан  1-дии ыстакаанынан  2-3 чаас буола-буола иһэллэр. Кыаллар буоллаҕына, бу күн аһаабат ордук. Айаххытын кичэйэн сайҕаныҥ. Тиискитин кислота буортулуон сөп. Дөлүһүөн утаҕын  ыалдьар кэмҥитигэр биир нэдиэлэни быһа сыыйа аччатан иһэргитигэр сүбэлиибит.

Уулаах отон

—        Грипптээтэххэ уулаах отонтон морс оҥостон иһэллэр. Оттон тымныйдахха уулаах отон  (1 нь.) 1 ыстакаан оргуйа турар ууга кутан, 30 мүнүүтэ  туруораллар, онтон сиидэлииллэр. Бу утаҕы 2-лии ньуосканан  күҥҥэ 4-5 иһэллэр.

—        1 остолобуой ньуоска уулаах отону  (угун уонна аһын), оччо дьэдьэни  (угун уонна аһын) 1 ыстакаан ууга кутан, оргуйуор диэри уокка уураллар. Оргуйбутун кэннэ мүөтү эбэллэр уонна 1-дии ыстакаанынан күҥҥэ 3-4-тэ иһэллэр.

Моонньоҕон

  • Моонньоҕону атырдьах ыйыгар аһа сиппитин кэннэ хомуйаллар. Отонун көөнньөрөн (3 ул.нь. отону ыстакаан ууга) анемияҕа, аппетиты көтөҕөргө, сөтөлгө, тымныйыыга ыстакаан аҥаардыытынан күҥҥэ үстэ иһэллэр.
  • Ону сэргэ моонньоҕон күөмэйи чөллөрүтэр, санааны сааһылыыр, куһаҕан санааны тэйитэр. Салгын кут араҥаларын ыраастыыр. Куту-сүрү бөҕөргөтөр.
  • Боҕоруоскай окко холбоон чэбдигирдэр чэй оҥостоллор.
  • Моонньоҕон лабаатын сэбирдэҕин оргутан, диатезтаах оҕону сууйар ууга куталлар.
  • Экземэни эмтииллэр.
  • Төбө күүскэ ыарыйдаҕына, саҥа лабаалары ууга оргутан, хаан баттааһына үрдээтэҕинэ тутталлар, оттон сэбирдэҕин —  сүһүөх ыарыытыгар.

 

Сүүтүк сүбэлэр

  • Бырдах, күлүмэн ытырдаҕына, тигээйи тиктэҕинэ,  петрушка сэбирдэҕин илдьи кырбаан баран, тикпит сиригэр сыһыары тутабыт-
  • 1 ост.нь. кырбаммыт оҕурсу отун 600 грамм ууга 5мүнүүтэ оргутан, 2чаас сойутан, сиидэлээн үс ыстакаан оҥороҕун. Күн аайы биирдии ыстакааны – 1 ост.нь. чаас аайы иһэҕин. Үс күн иһэн баран, биир ый тохтуугун, онтон эмиэ салгыыгын. Сыл устата истэххэ, матка искэҥигэр (фибромиома) олус туһалаах.
  • Хатыҥы сымныар диэри уматан баран, чоҕун  бороһуок буолуор диэри үлтү сынньан сүөгэйгэ  булкуйан биир кыра пиаланы  сиэтэххэ, үөһү оборон хойууну кытта таһаарар.
  • Чеснок хас өлүүтүн ныһыйан сибиинньэ сыатын кытта булкуйан чэри оһуор диэри күн аайы соттон  суох оҥоруохха сөп.
  • Хаппыыста сэбирдэҕин теркалаан тириигэ тахсыбыт ириҥэлээх бааһы эмтэнэр.Ити  сүһүөх ыарыытын эмиэ уҕарытыа.
  • Арбуз ииктэтэр дьайыылаах. Хаан аччааһыныгар, атеросклерозка ордук туһалаах. Арбуһу элбэхтик сиэҥ.
  • Кабачокка белога аҕыйах буолан, бүөр ыарыһах аһыгар элбэхтик туттуохха сөп.
  • Хахтары буспут хортуоппуй уутун иһэ сырыттахха, сүһүөх ыарыыта мүлүрүйэр. Тостубут уҥуохтар силимнэһиилэрэ  түргэтиир.
  • Петрушканы өрүү аскар туһанар буоллаххына, тииһиҥ маҥхайар.
  • Моркуоп суогун сарсыарда аччык искэр истэххинэ,хойууҥ хаайтарыыта суох тахсар.
  • Сүбүөкүлэни хааһы курдук оҥорон, ириҥэрбит бааһы соттоххо түргэнник оһор.
  • Сирэйгин күн аайы сибиэһэй петрушка сэбирдэҕин сүмэһининэн сотуннаххына, тирииҥ биллэ сырдыыр.
  • 5-6 чеснок өлүүскэтин теркаҕа аалан, ыстакаан үүккэ оргут. Сойбутун кэннэ, тымныйыыттан  кыра  ньуосканан  күҥҥэ хаста да ис.
  • Быарыҥ ыарыйдаҕына, аһыйбыт хаппыыста рассолугар томатнай суок тэҥ өлүүтүн булкуйан баран ис.
  • Араҕас акация уһун ньолбуһах астарынан ангинаны, тиис ыарыытын (флюс) эмтииллэр. Ыстакаан ууну акация отонугар куталлар уонна аҕыйах мүнүүтэ оргуталлар. Өр туталлар. Айаҕы элбэхтик сайҕыыллар. Флюс биир күн иһинэн тэстэр. Фолликулярнай ангина 2-3 күнүнэн ааһар.
  • Өскөтүн кыа угун (чернобыльник) настой оҥорон чэй курдук нэдиэлэни быһа истэххэ, герпес киһи уоһугар тахсыбат буолар.
  • Сирэйдэрин тириитэ куурар дьоҥҥо маннык крем олус туһалаах: 1 ч.нь. дэриэбинэ сүөгэйигэр  0,5  ч.нь.  үүнээйи арыытын булкуйаллар.Тымныы сиргэ уура сылдьан соттоллор.

 

Сүбэлэри хомуйда  Екатерина Бястинова.

Добавить комментарий

Ваш адрес email не будет опубликован. Обязательные поля помечены *