Ньургун Александров Тахти кубогын кыайыылааҕа!

Иран Керманшах куоратыгар олимпийскай чемпион Голамреза Тахти кэриэһигэр үгэс быһыытынан сылын аайы көҥүл тустууга улахан таһымнаах норуоттар икки ардыларынааҕы турнир ыытыллар. Быйылгы түһүлгэҕэ биир талааннаах тустуукпут, норуоттар икки ардыларынааҕы кылаастаах спорт маастара Ньургун Александров Россияттан соҕотоҕун тиийэн, кыайыы көтөллөннө. Уолбут, аан дойдуга күүстээҕинэн аатырар Иран дойдутун үс тустуугун эрэллээхтик кыайда. 

 

Тустууну интернетинэн быһа көрө олорон, хайдах баһыылаахтык барбытын билиһиннэрдэххэ, биһиги уолбут кыһыл муннуктан туһунна. Бастакы үс мүнүүтэлээх түһүмэх этэргэ дылы, утарсааччыны чуҥнаан көрүү тактиканан барда. Онуоха маҥнайгынан сэрэтиини биһиги бөҕөспүтүгэр биэрдилэр. Онон бастакы түһүмэх итинник түмүктэннэ. Онтон иккискэ киирэн биир түгэҥҥэ киһитин туора садьыйаат, кэннигэр баар буола түстэ уонна умса баттыы сылдьан “кириэс” диэн албаска хаста да эргитэн ахсааны 7:1 оҥордо.

Ньургун тренерэ Гаврил Игнатьев ол аайы, хаһан баҕарар буоларыныы, биир сиргэ таба олорбокко, уолугар сүбэлээн-амалаан аххан биэрдэ. Салгыы тустууга Ньургун киһитин үөһэттэн хам кууһан ылан халбарыйан бырахпытын, судьуйалар түөрт баалынан сыаналаатылар. Ураа! Хапсыһыы болдьоҕун иннинэ кыайыы, 11:1!

Итинэн Ньургун Александров – Тахти кубогар сахалартан үһүс киһинэн кыайыылааҕынан буолла. Ол курдук, иллэрээ сыл Ньургун Скрябин бастаабыта. Былырыын Михаил Иванов кыайбыта. Аны билигин – Ньургун Александров.

Үөрүүлээҕэ баар, Ньургун – 1974 сыллаахха Ираҥҥа оччолорго “Арьямехр кубога” диэн турнирга кыайыы көтөллөнөн, “Улуу пехлеван” аатын ылбыт Александр Николаевич Иванов төрөөбүт күнүгэр саха тустуутугар үчүгэй бэлэҕи оҥордо. Манна даҕатан эттэххэ, тустууну таҥара оҥостубут Иран дойдутун көҥүл тустууга саамай улахан түһүлгэтигэр бу иннинэ сахалартан Роман Дмитриев (1976), Александр Иванов (1974), Василий Гоголев (1982) уонна үөһээ ахтыллыбыт Ньургун Скрябин (2018), Михаил Иванов (2019) бастыы сылдьыбыттара.

Манан буоллаҕына, тренер Гаврил Игнатьев икки иитиллээччитэ: Скрябин уонна Александров – Тахти кубогын кыайыылаахтарынан буоллулар. Эҕэрдэ!

Петр ПАВЛОВ. 

Добавить комментарий

Ваш адрес email не будет опубликован. Обязательные поля помечены *