Оҕом тикпит таҥаспар олус үөрэр

Кыыс-аймах оҕо күүтэр кэрэ кэмигэр кистэнэ сыппыт талаана арыллар, сайдар дииллэр. Ол туһунан “Хоппуйа: иис” ыалдьыта Екатерина Афанасьева маннык кэпсиир:

– Оҕо эрдэхпинэ таҥаспын эдьиийим тигэрэ, ол иһин куруук ураты, оригинальнай буоларым. Иистэнэргэ аан бастаан оскуолаҕа сылдьан холоммутум, бэлэм тигиллибит таҥаһы уларытар, тупсарар идэлэммитим. Кэлин устудьуоннуу сылдьан куруһубаттан маайка тикпиппин өйдүүбүн. “Дьиҥнээхтии” иистэнэр туһунан санаа кыыс  оҕону күүтэр кэммэр кэлбитэ. Кыысчааммар остуоруйаттан түспүт принцесса былаачыйатын тигиэхпин олуһун баҕарбытым. Ол кэмҥэ ийэм, сэрэйбит курдук, иистэнэр массыына бэлэхтээбитигэр «Бурда» сурунаал көмөтүнэн боростуой киэптээх куоптаны, былаачыйалары тигэн саҕалаабытым. Миэхэ сөптөөх маастар-кылааһы балай да өр көрдөөбүтүм, дьолбор «Ирина Сарта иистэниэн баҕалаахтары түмэр үһү» диэни истэммин киниэхэ суруйтарбытым. Бу маастар-кылааска иис сүрүн кистэлэҥин билбитим, баһылаабытым. Билигин үлэбиттэн ордубат буолан үксүн бэйэбэр уонна оҕобор тигэбин. Кыыс оҕо киэргэнэрин-симэнэрин оҕо эрдэҕиттэн таптыыр, онон кыыһым хас биирдии тикпит таҥаспар олус үөрэр.

Хаартыскаҕа көстөр курдук сирень өҥнөөх былаачыйаны 5-6 саастаах оҕоҕо тигэргэ наада:

1-1,5 миэтэрэ атлас;

40 см. куруһуба (оҕо кээмэйэ атын-атын буолар, ол иһин санныттан биилигэр диэри кээмэйдээ);

Бастакы араҥаһа 1,5 миэтэрэ фатин, өскөтүн көпсөркөй былаачыйаны баҕарар буоллаххына икки слой оҥоруоххун сөп (3 миэтэрэ).

Хаартыскаҕа:

  1. Былаачыйа илин өттө – 2 устуука (илин өттө уонна биэтэһэ), 1 устуука куруһуба
  2. Көхсө – 2 устуука атластан, 2 куруһубаттан
  3. Сиэх байбарыта – 2 устуука куруһубаттан
  4. «Күн курдук» быһыылаах дьууппа
  5. Фатинтан дьууппа

 

 

 

Добавить комментарий

Ваш адрес email не будет опубликован. Обязательные поля помечены *