ОЛЕГ СИДОРОВ: НУУЧЧА ТЫЛА БАРЫБЫТЫН СОМО5ОЛУУР, БИИР ТЫЫННЫЫР МУОСТА КУРДУК

От ыйын 1 күнүгэр буолуохтаах, Конституцияҕа уларытыылары киллэрэр куоластааһын туһунан дьон-сэргэ бэйэтин санаатын үллэстэр.

Олег Гаврильевич Сидоров, СӨ суруйааччыларын ассоциациятын бэрэссэдээтэлэ, ХИФУ суруналыыстыкаҕа кафедратын сэбиэдиссэйэ, СӨ култууратын үтүөлээх үлэһитэ:

— Арассыыйа Төрүт Сокуонугар киирбит уларытыылары, эбиилэри кытта киһи сөбүлэспэт буолара табыллыбат курдук. Ол курдук, урут-уруккуттан олохсуйан кэлбит биир судаарыстыба сомоҕолоһуута, норуоттар тэҥ бырааптаах буолуулара, өрөспүүбүлүкэлэр судаарыстыбаннай тылларын туһунан, ону кытта Арассыыйа Федерацията бары норуоттарга кинилэр төрөөбүт төрүт тылларын сайдарыгар уонна салгыы үөрэтиллэригэр бары усу­луобуйаны олохтуурун, бары норуоттар төрүт ураты үгэстэрин көмүскээһин, этнокултуура уонна тыл эгэлгэтин харыстааһын курдук этиилэр бааллар. Манна киирбит уларытыыга хайдах даҕаны соҕотох нуучча эрэ тыла хааларын курдук этиллибэтэх. Онон сыыһа өйдөөмүөххэ наада. Арассыыйа судаарыстыбата уруккуттан да манна олорор но­­руоттарын төрүт үгэстэринэн, кинилэр култуураларын арааһынан күүстээх этэ. Дэлэҕэ даҕаны, «Улуу Арассыыйа» дэниэ дуо. Нуучча тылын биһиги норуоттар бэйэлэрин икки ардыларыгар кэпсэтэр тылларын курдук ылыммыппыт ыраатта. Нуучча литературатын көмөтүнэн араас тыллаах норуоттар биир култуурунай эйгэҕэ холбоспуттара, бэйэбитин да оннук бииргэ сананабыт. Дьиктитэ диэн, саха литературата Лев Толстой, Николай Гоголь ааттарыттан саҕаламмыта уонна Максим Горькайынан салгыы барбыта. Ол курдук, 1907–1914 сылларга сахалыы хаһыаттарга уонна сурунаалларга «Власть тьмы», «Женитьба» уонна да атын айымньылар тылбаастанан тахсыбыттара. Бу киирии айымньылары тылбаастааһын умсугутуулаах үлэтэ саха үөрэхтээх дьонугар олус үчүгэйдик дьайбыта, култуура өттүнэн байыппыта. Саха норуотун литературатын, култууратын, уопсастыбаннай олоҕун уһулуччулаах диэйэтэллэрэ Өксөкүлээх Өлөксөй, Алампа Софронов, Николай Неустроев, Баһылай Никифоров-Күлүмнүүр, Сэмэн Новгородов, Былатыан Ойуунускай, Гаврил Ксенофонтов нуучча тылын үчүгэйдик эрэ билэр буолбакка, бу тылынан бэйэлэрин улахан үлэлэрин суруйбуттара. Күн бүгүҥҥэ диэри саха литературатын улахан, сүдү айымньылара нууччалыы тылбаастанан, билигин аан дойду дьоно билсэр кыахтанар. Бу үтүө үгэс салҕанан бара туруон наада.

Айтана Аммосова

© edersaas.ru сайтан:  http://edersaas.ru/olegsidorov/

Добавить комментарий

Ваш адрес email не будет опубликован. Обязательные поля помечены *