Олимпиада-2020 боксаҕа сүүмэрдиир күрэхтэһиилэрин болдьоҕо билиннэ

Норуоттар икки ардыларынааҕы Олимпийскай кэмитиэт (МОК) боксаҕа үлэлэһэр анал бөлөҕө Токиотааҕы XXXII сайыҥҥы Олимпийскай оонньуу боксаҕа күрэхтэһиитигэр кыттыахтаах спортсменнары сүүмэрдиир континеннар уонна аан дойдутааҕы турнирдар ыытыллар сирдэрин уонна болдьохторун быһаарда.

Ол курдук, Азия уонна Океания регионун холбоһуктаах сүүмэрдиир (квалификационнай) турнира 2020 сыл олунньу 3-14 күннэригэр Кытай Ухань куоратыгар ыытыллыа. Африка континенын турнира Сенегал – Дакар куоратыгар олунньу 20-29 күннэригэр буолуоҕа. Оттон Европа дойдуларын сүүмэрдиир күрэхтэһиитэ кулун тутар 13-23 күннэригэр Лондоҥҥа тэриллиэҕэ. Ити курдук, Америка континенын турнира кулун тутар 26 — муус устар 3 күннэригэр Буэнос-Айреска (Аргентина) ыытыллыаҕа.

Итини таһынан, ыам ыйын 13-24 күннэригэр Франция киин куоратыгар Парижка – аан дойдутааҕы сүүмэрдиир турнир буолуоҕа. Онно, инники сүүмэрдиир күрэхтэһиилэр түмүктэринэн, Олимпиадаҕа кыттар быраабы ылбатах боксердар киирсиэхтэрэ.

Билиҥҥитэ чопчу ити турнирдарга хастыы путевка оонньоноро биллибэт гынан баран,  olympic.org сайтка суруйалларынан, эр дьоҥҥо – 52, 57, 63, 69, 75, 81, 91 уонна 91-тэн үөһэ кг ыйааһыннарга барыта 186 боксер кыттыахтаах. Оттон континеннарынан ылан көрдөххө, холобура, 52 киилэҕэ диэри – Африкаттан 3, Америкаттан 5, Азиялаах Океанияттан 6, Европаттан 8 уонна аан дойдутааҕы турниртан 4 боксер сүүмэрдэниэхтээх, онон барыта бу ыйааһыҥҥа 28 кыттааччы буолуохтаах эбит.

Биллэринэн, былырыын күһүн МОК, боксаны 2020 сыллааҕы Олимпиадаҕа көрүҥ быһыытынан киллэрэртэн туттуммута. Бокса норуоттар икки ардыларынааҕы ассоциациятын (АИБА) иһигэр тахсыбыт бөрүкүтэ суох айдааны быһаарсыы кэнниттэн, быйыл ыам ыйыгар МОК спорт бу көрүҥүн, ханныгын да иһин Олимпиада-2020 бырагырааматыгар киллэрбитэ. Ол гынан баран, бокс норуоттар икки ардыларынааҕы ассоциацията – МОК ирдэбиллэрин (үбүлээһин, салайыы, судьуйалааһын уонна этика боппуруостарыгар сыһыаннаах) толорботоҕун иһин, туоратыллыбыта.

Бокс – спорт көрүҥүн быһыытынан олимпийскай дьылҕата билигин ыарахан балаһыанньаҕа сылдьар диэххэ сөп. АИБА үлэлээбэт, онон билиҥҥитэ спорт бу көрүҥүн МОК сүрүннүүр буолла.

Токиотааҕы Олимпиада боксаҕа күрэхтэһиитигэр 186 эр киһи уонна 100 дьахтар кыттара былааннанар. Санатан эттэххэ, сайыҥҥы Олимпийскай оонньууларга бокс 25 от ыйын — атырдьах ыйын 9 күннэригэр ыытыллыаҕа.

Петр ПАВЛОВ.

http://dzulurgan.ru/?p=4787

 

Добавить комментарий

Ваш адрес email не будет опубликован. Обязательные поля помечены *