ӨРӨСПҮҮБҮЛҮКЭ 100 СЫЛЫГАР – 100 ИНТЕРВЬЮ

Муус устар 29 күнүгэр өрөспүүбүлүкэтээҕи медиа-кииҥҥэ «Саха сирин инникитин туһунан 100 интервью» диэн сонун бырайыак сүрэхтэниитэ буолан ааста.

Саха Өрөспүүбүлүкэтэ төрүттэммитэ 100 сылыгар анаммыт бырайыагы билиһиннэриигэ киирии тылы этэригэр Ил Түмэн Судаарыстыбаннай Мунньах бэрэссэдээтэлэ Петр Гоголев бу бырайыак саха норуотун чулуу уола Былатыан Ойуунускай «Сүүс сыллаах улуу былааныгар» тирэҕирэн оҥоһуллубутун бэлитээн эттэ. Идеяны аан бастакынан СӨ Национальнай библиотеката көтөхпүт. Ону өрөспүүбүлүкэ таһымыгар өйөөн, үлэ көхтөөхтүк саҕаламмыт.

«Саха суруйааччылара» ассоциация бэрэссэдээтэлэ Олег Сидоров бырайыак өрөспүүбүлүкэ духуобунай култуурата сайдыытыгар суолталааҕын бэлиэтээтэ. «Полярная звезда» сурунаал сүрүн эрэдээктэрэ Владислав Доллонов уонна философия наукатын кандидата Алексей Пудов дириҥ ис хоһоонноох бырайыактан элбэҕи эрэнэ кэтэһэллэрин биллэрдилэр, кэлэр көлүөнэ аны сүүс сылынан туһанарыгар анаан билиҥҥи көлүөнэ дьоно санааларын этэн хаалларалларыгар ыҥырдылар.

«Саха сирин инникитин туһунан 100 интервью» бырайыак айар кэлэктиибин салайааччыта Галина Кутугутова үлэ тэтимнээхтик бара турарын, сайт оҥоһуллубутун туһунан иһитиннэрдэ. Видеоинтервьюлар 100интервью.рф сайтка тылынан тахсыахтара, ким баҕалаах киирэн көрүөн сөп. Маны таһынан 2022 сылга электроннай кинигэ тахсара былааннанар.

  

Иван ОСИПОВ

Добавить комментарий

Ваш адрес email не будет опубликован. Обязательные поля помечены *