ОЙУУНУСКАЙ ААТЫНАН ЛИТЕРАТУРА МУЗЕЙА ТӨРҮТТЭММИТЭ 50 СЫЛА

Алтынньы 27 күнүгэр Былатыан Ойуунускай аатынан Литература судаарыстыбаннай музейа төрүттэммитэ 50 сылыгар аналлаах үөрүүлээх мунньах, дьаҥ турбутунан сибээстээн, интернет ситимин нөҥүө буолан ааста.

Үбүлүөйдээх тэрээһини Литература судаарыстыбаннай музейын дириэктэрэ, Россия Суруйааччыларын сойууһун хос бэрэссэдээтэлэ, СӨ Духуобунаска академиятын вице-президенэ, норуот суруйааччы Николай Лугинов иилээн-саҕалаан ыытта. Мунньах интернет куйаарыгар буолан, Саха сирин уопсастыбаннаһа уонна Россия суруйааччылара кыттыыны ыллылар. Ол иһигэр өрөспүүбүлүкэ салайааччылара – Ил Дархан уонна бырабыыталыстыба дьаһалтатын салайааччы Афанасий Владимиров, судаарыстыбаннай сүбэһит, Духуобунас академиятын президенэ Андрей Борисов, Культура уонна духуобунай сайдыы миниистирэ Юрий Куприянов, Ил Дархан көмөлөһөөччүтэ Афанасий Ноев эҕэрдэ тылларыгар Литература музейа улахан научнай-сырдатар үлэни ыытарын уонна саха норуотун кута-сүрэ, өйө-санаата буоларын чорботон бэлиэтээтилэр. Россия Суруйааччыларын сойууһун бырабылыанньатын бэрэссэдээтэлэ Николай Иванов коллективы, саха суруйааччыларын, өрөспүүбүлүкэ уопсастыбаннаһын видео нөҥүө төлөннөөхтүк эҕэрдэлээтэ уонна П.А. Ойуунускай аатынан Литература судаарыстыбаннай музейа айар холбоһук үрдүкү наҕараадатынан – Михаил Шолохов аатынан кыһыл көмүс мэтээлинэн бэлиэтэммитин иһитиннэрдэ.

– Маннык саамай үрдүкү мэтээлгэ тиксэммит соһуйдубут, үөрдүбүт. Бу – 1970 сылтан саҕалаан музейы тэрийсибит үлэһиттэр, саха суруйааччыларын, өрөспүүбүлүкэ литературнай уопсастыбаннаһын сыралаах үлэтин үрдүктүк сыаналааһын түмүгэ буолар.

Россияҕа да улаханнык тарҕана илик онлайн платформаҕа элбэх киһи холбонуута уустук эбит. Эфиргэ тахсыан баҕалаах биһиги суоттаммыппытынааҕар элбэх буолан биэрдэ. Үгүс кыттааччыларбыт, кыайан холбоммокко, эҕэрдэ тыл эппэккэ хааллылар. Хотугу улуустартан саҕалаан Россия Суруйааччыларын сойууһуттан салайааччыларыгар тиийэ элбэх эҕэрдэ видеонан киирдэ. Барытын кыайан ситэн көрдөрбөтүбүт. Ол эрээри бу эҕэрдэлэр таах хаалыахтара суоҕа – музей ютуб канаалыгар уонна сайтыгар тахсыахтара.

Музей коллектива түгэнинэн туһанан өрөспүүбүлүкэ үрдүк салалтатыгар, Ил Түмэҥҥэ, архиепископ Ромаҥҥа, суруйааччыларга, Саха сирин бары музейдарыгар, библиотекаларга, архыыптарга, айар түмсүүлэргэ уонна музейбытыгар сылдьыбыт дьоҥҥо барыларыгар барҕа махталбытын тиэрдэбит, – диэн үбүлүөйдээх тэрээһини сүрүннэспит Былатыан Ойуунускай аатынан Литература судаарыстыбаннай музейын научнай үлэһитэ Ефросинья Ноговицына санаатын үллэһиннэ.

Иван ОСИПОВ

Добавить комментарий

Ваш адрес email не будет опубликован. Обязательные поля помечены *