Ребровтар

Хаартыскаҕа урукку Элгэс улууһун Бастакы Байды, билиҥҥи Абый улууһун Муҥурдаах нэһилиэгиттэн төрүттээх түөрт бииргэ төрөөбүттэри (хаҥастан) Петр Семенович, Николай Семенович, Мария Семеновна, Павел Семенович Ребровтары көрөҕүт.

Олорбут, үлэлээбит кэмнэригэр, эйгэлэригэр төрдүөн улуустарыгар, өрөспүүбүлүкэҕэ биллэр, чиэскэ-бочуокка тиксибит, ытыктабылы, үрдүк сыанабылы ылбыт дьон этилэр.

Кинилэр хоту сиргэ саҥа былаас олохтонон, сүһүөҕэр туран эрэр кэмигэр сэниэ бааһынай дьиэ кэргэнигэр күн сирин көрбүттэрэ. Аҕалара нууччалыы сэбэрэлээх, сырдык хааннаах, үрдүк уҥуохтаах, бөдөҥ-садаҥ, үлэһит, олоҕун-дьаһаҕын үчүгэйдик тэриммит, байанайдаах булчут, балыксыт, дьоҕурдаах мас, тимир ууһа, урукку былааска нэһилиэгэр кинээстээбит Семен Игнатьевич Ребров былаас уларыйыытыгар 30-с сыллар саҥаларыгар кулаактааһыҥҥа буруйданан, тутуллан Дьокуускайга ыытыллыбыта, сууттанан 2 сыл Уус Алдан Хомустааҕар бырааба быһыллан көскө олорбута.

Ийэлэрэ сытыы-хотуу, дьиэ бары ис-тас үлэлэригэр дьоҕурдаах Реброва (Ильяхова) Мотрена Николаевна түөрт кыра саастаах оҕолорунаан, маллара-саллара, сүөһүлэрэ, сирдэрэ-уоттара былдьанан, биир ыанар ынахтаах хаалбыттара. Онон кулаак кэргэнэ, оҕолоро буолуу бары ыарахаттарын, атаҕастабылын билбиттэрэ.

Олох сыыйа уларыйан, сыһыан сымнаан испитэ, былаас, аймах-билэ дьоннорун көмөлөрүнэн түөрт бииргэ төрөөбүттэр тус бэйэлэрин дьулуурдарынан, дьаныардарынан, кыра саастарыттан үлэҕэ моһуллубуттарынан, эрэйи, кыһалҕаны эттэринэн-хааннарынан билэн үөрэхтээх, үлэһит дьон буолар суолга турбуттара.

Ийэтигэр, балтыгар, бырааттарыгар, халыҥ аймахха бүттүүнүгэр тирэх, төһүү киһинэн ыал улахан оҕото, убайдара, мин аҕам Николай Семенович Ребров буолбута. Кини кулаак уола буолан үөрэҕинэн хабыллыбатаҕа, ликбезкэ үөрэнэн ааҕар, суоттуур буолбута. Салгыы бары кэрдиис кэмнэргэ бэйэ үөрэхтээһининэн утумнаахтык дьарыктанан, үлэлиир эйгэтигэр билиилээх, тылы-өһү баһылаабыт дьоҕурдаах тэрийээччи, салайааччы буолбута.

Аҕам 40-ча сыл тохтоло суох холкуос бэрэссэдээтэлинэн, отделение управляющайынан ситиһиилээхтик үлэлээбитэ. Салайар холкуоһа, отделениета, нэһилиэгэ өрөспүүбүлүкэҕэ аатырбыттара, бэйэтэ да биллэр-көстөр салайааччы буола үүммүтэ. Эһиил 2021 с. аҕам 100 сааһыгар анал кинигэ суруйар былааннаахпын. Аҕам Үлэ Кыһыл Знамята орденынан, ССРС элбэх мэтээллэринэн, РСФСР Үрдүкү Сэбиэтин Президиумун Бочуотунай грамотатынан, Саха АССР Үрдүкү Сэбиэтин Президиумун Бочуотунай грамотатынан 5(!) төгүл наҕараадаламмыта.

Балта Мария Семеновна олоҕун устата эргиэҥҥэ үлэлээбитэ. Кыра лааппы атыылааччытыттан эргиэн отделениетын салайааччытыгар тиийэ үүммүтэ. Нэһилиэккэ атыы-эргиэн сайдыыта кини аатын кытта быстыспат сибээстээх, бу эйгэ сайдыытыгар улахан кылаатын киллэрбитэ. Мария Семеновнаҕа “РСФСР эргиэнин туйгуна” үрдүк аат иҥэриллибитэ, эмиэ Үлэ Кыһыл Знамята орденынан наҕараадаламмыта. Абыйга эргиэн эйгэтигэр кини курдук маннык үрдүк наҕараадаҕа тиксибит киһи суох. Элбэх оҕолоох ийэ сааһыран баран киэһээҥҥи оскуола 8-с кылааһын бүтэрбитэ, нэһилиэгэ ыытыллар бары тэрээһиннэргэ көхтөөхтүк кыттара.

Бырааттара Петр Семенович Ребров 1955 с. Дьокуускайдааҕы пединституту бүтэрбитэ, нэһилиэгиттэн биир бастакы үрдүк үөрэхтээх учуутал буолбута. Үөрэнэр кэмигэр факультет комсомольскай тэрилтэтин сэкирэтээринэн, комсомол Дьокуускайдааҕы комитетын чилиэнинэн быыбарданан үлэлээбитэ. Саха комсомолун чаҕылхай салайааччыта буолбут Егор Кычкиныын үчүгэйдик билсэллэрэ. Кини Муҥурдаах сэттэ кылаастаах, Дружина орто оскуолаларыгар дириэктэрдээбитэ, олоҕун, үлэтин улахан кэрдиис кэмин советскай-партийнай үлэҕэ анаабыта, ол иһигэр 24 сыл оройуоннааҕы «Хотугу кыым» хаһыакка редактордаабыта. Оройуоҥҥа Петр Семенович курдук оройуон үрдүкү салайар органнарыгар уһуннук үлэлээбит салайааччы суох. ССРС Суруналыыстарын союһун чилиэнэ, Абый оройуонун бочуоттаах гражданина П.С. Ребров ССРС хас да мэтээллэринэн, Саха АССР Үрдүкү Сэбиэтин Президиумун бочуотунай грамотатынан, анал бэлиэлэринэн наҕараадаламмыта.

Бырааттара Павел Семенович Ребров 1959 сыллаахха Ленинградтааҕы тыа хаһаайыстыбатын институтун бүтэрбитэ. Өр сылларга идэтинэн араас таһымнаах салайар дуоһунастарга үлэлээбитэ. Эдьигээҥҥэ саҥа тэриллибит Приморскай тыа хаһаайыстыбатын управлениетыгар кылаабынай зоотехнигынан – начальнигы солбуйааччынан үлэлээбитэ, Дьокуускайга хотугу сопхуостар управлениеларыгар кылаабынай зоотехниктаабыта.

Өр сылларга Тыа хаһаайыстыбатын министерствотыгар кылаабынай зоотехнигынан, министри солбуйааччынан, министри бастакы солбуйааччынан үлэлээбитэ. Салгыы Булт хаһаайыстыбатын управлениетыгар начальниктаабыта, идэлээх сойуустары салайар дуоһунастарга үлэлээбитэ. РФ суолталаах пенсияҕа тахсыбыта уонна 1998 с. Москва анныгар Королев куоракка олохсуйбута. Быйыл, 2020 сыл олунньу 8 күнүгэр, 90 сааһыгар олохтон туораата.

Павел Семенович «Бочуот знага» орденынан, ССРС алта, НХБСБ боруонса мэтээллэринэн, Саха АССР Үрдүкү Сэбиэтин Президиумун бочуотунай грамотатынан, идэлээх сойуустар анал бэлиэлэринэн наҕараадаламмыта, Абый улууһун бочуоттаах гражданина буолбута.

Ити курдук, түөрт бииргэ төрөөбүт Ребровтар олоххо, үлэҕэ дириҥ ыллыгы хаалларбыттара. Билигин кинилэр олохторун Абыйга, Дьокуускайга, атын сирдэргэ олорор оҕолоро, сиэннэрэ, хос сиэннэрэ дьоһуннаахтык салгыыллар.

Николай РЕБРОВ, СР культуратын үтүөлээх үлэһитэ, Н.С. Ребров уола.

 

Добавить комментарий

Ваш адрес email не будет опубликован. Обязательные поля помечены *