Роман Дмитриев сырдык уобараһа – биһиги сүрэхпитигэр

Бүгүн, кулун тутар 7 күнүгэр – саханы саха дэппит, аан дойдуга саха диэн омук баарын дорҕоонноохтук ааттаппыт, биллэрбит албан аатырбыт бөҕөспүт – Олимпиада, аан дойду, Европа, Сэбиэскэй Сойуус чемпиона, ССРС спордун үтүөлээх маастара уонна үтүөлээх тренерэ Роман Михайлович Дмитриев тыыннааҕа эбитэ буоллар, 71 сааһын үөрүүлээхтик бэлиэтиэ этэ.

Күн-дьыл ааһара түргэнин!.. Роман Дмитриев сирдээҕи олохтон туораабыта номнуо онус сыла буола оҕуста.

 

2010 сыл олунньу 11 күнүгэр сэбиэскэй уонна российскай спорт номоххо киирбит спортсмена, 1972 сыллааҕы Мюнхеннааҕы ХХ Олимпиада көҥүл тустууга чөмпүйүөнэ, 1976 сыллааҕы Монреаллааҕы XXI Олимпийскай оонньуу үрүҥ көмүс призера, аан дойду уонна Европа чөмпүйүөнэ, ССРС түһүлгэтин алта төгүллээх кыайыылааҕа Роман Дмитриев биһиги кэккэбититтэн өлөн туораабыта.

Ол да буоллар, Роман Дмитриев аата саха баарын тухары умнуллуо суоҕа. Кини курдук дьоннор өлбөттөр, норуот өйүгэр-санаатыгар өрүү тыыннаахтар. “Маҥнайгы чөмпүйүөн, ааны аспыт ким этэй?” – диэн хайаан да ыйытыллыаҕа, онуоха бастакынан Роман Михайлович  аата ааттаныаҕа. Кини эмискэ халлааны сырдатан уоттаах сулус суулларын кэриэтэ кылгас, чаҕылхай олоҕу олорон ааста. Саамай муударай айар-тутар сааһыгар тиийэн баран олохтон туораабыта хомолтолоох, аһыылаах.

Биһиги бары кинини, албан аатырбыт киһини – өлбөт үөстээх дии саныырбыт уонна бастаан утаа кини суох буолбутугар олох итэҕэйбэтэхпит.

Бу көрдөххө, кини олоҕо бэйэтэ сулус курдук. Саха сирин биир түгэх улууһуттан сириэдийэн тахсан, олимпийскай чөмпүйүөн, аан дойдуга тиийэ биллэр киһи буола үүммүтэ. Роман Михайлович тустууга киллэрбит кылаата муҥура суох. Элбэх ахсааннаах эдэр уолаттар кини курдук буолуохтарын баҕаран, спорт саалаларыгар, дыбарыастарыгар кэлбиттэрэ, тустуук аатын сүкпүттэрэ. Онон улахан көбүөргэ батыһыннарааччы, суолу тэлээччи кини буолбута.

Роман Дмитриев улахан таһымнаах тустуугун тэҥэ, айымньылаах үлэлээх тренер этэ. Сэбиэскэй Сойуус, Россия, Саха сирин элбэх талааннаах тустууктарын иитэн-такайан таһаарбыт үтүөлээх. Олоххо бэйэтин сыһыанынан эдэр ыччакка холобур буолбута.

Аҥаардас спордунан эрэ үлүһүйбэтэҕэ. Саха Республикатын култууратын үтүөлээх үлэһитин, норуот депутатын быһыытынан олоҕун бүтэһик күннэригэр диэри төрөөбүт республикатын туһугар үлэлээбитэ-хамсаабыта. Роман Михайлович спорка кыайыылара, олоххо ситиһиилэрэ историяҕа умнуллубаттык хаалан, биир дойдулаахтарын саҥа кыайыыларга сирдии турарыгар эрэл улахан.

Кырдьык, кини бэйэтин төрөөбүт дойдутун дьиҥнээх патриота. Бүтүн олоҕун саха норуота аан дойдуга аатырарын туһугар анаабыта диэтэххэ омуннааһын буолбата буолуо. Олимпийскай оонньуулар, аан дойду чемпионаттарын көбүөрдэригэр тахсарыгар Роман Дмитриев хаһан баҕарар спорка хорсун быһыыны көрдөрөрө, эдэр спортсменнарга үтүө холобур буолара. Кини сырдык уобараһа куруук биһиги сүрэхпитигэр хаалыаҕа уонна спорка саҥа кыайыыларга ыҥыра, угуйа туруоҕа.

Саха сирин уһулуччулаах уолун сырдык аатын үйэтитии салҕанан бара турар. Дьокуускай куорат 385 сылын көрсө “Туймаада” стадион таһыгар олимпийскай чөмпүйүөн Роман Дмитриев аатынан сквер тутуллан дьэндэйбитэ. Сквергэ Роман Дмитриев пааматынньыга туруоруллубута. Иллэрээ сыл, Роман Дмитриев аата – Тустуу аан дойдутааҕы түмсүүтүн (UWW) Албан аат саалатыгар киллэриллибитэ. А.Г. Далакырова хомуйан оҥоруутугар, Д.П. Андреева редакциялааһынынан “Олимпка Бэстээхтэн силис тардан” кинигэ бэчээттэнэн таҕыста. Онтон даҕаны атын биһиги бастакы олимпийскай чемпиоммут аатын үйэтитии дьаһаллара тиһигин быспакка ыытыллаллар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *