Россия Спорка миниистирэ Павел Колобков Саха сиригэр кэллэ

Бүгүн, ахсынньы 5 күнүгэр Россия Спорка миниистирэ Павел Колобков Дьокуускайга кэллэ. Бу сырыытыгар кини Саха Республикатын Ил Дарханын кытта көрсөрө, Чурапчытааҕы физическэй култуура уонна спорт институтун үбүлүөйүгэр сылдьара уонна республика киин куоратын спортивнай обьектарын көрөрө былааннанар.

 

 

Павел Колобкову аэропорка СР Бырабыыталыстыбатын бэрэссэдээтэлин солбуйааччы Ольга Балабкина, СР Ил Дарханын уонна Бырабыыталыстыбатын дьаһалтатын салайааччыта Афанасий Владимиров, СР физическэй култуураҕа уонна спорка миниистирэ Иннокентий Григорьев көрүстүлэр.

Россия спорка миниистирэ Павел Колобков Дьокуускай куорат спортивнай обьектарыгар сылдьан, үлэни-хамнаһы билсиэҕэ. Ол курдук, СР физическэй култуураҕа уонна спорка министиэристибэтин Пресс-сулууспата биһиэхэ иһитиннэрбитинэн, бырагыраама быһыытынан, 16:00 чаастан “Дохсун” футболлуур манеһыгар сылдьан, спорт көрүҥнэринэн дьарыктары көрүөҕэ. Онтон “Модун” спортивнай комплекска кэлиэҕэ. Онно миниистири мас-рестлинг, хапсаҕай, сахалыы атах оонньууларын, хотугу многоборье уонна остуол оонньууларын саалаларынан кэрийэ сылдьан билиһиннэриэхтэрэ. Салгыы Павел Колобков “Триумф” Спорка бэлэмнэнии киинигэр барыаҕа. Манна кини тустуу уонна бокса саалаларын көрүөҕэ, спортивнай медицина киинигэр сылдьыаҕа.

Дьэ, ити сырыылар түмүктэринэн киэһээ 17:30 чааска “Триумф” актовай саалатыгар Саха сирин Ил Дархана Айсен Николаевы кытта суруналыыстары кытта көрсүөҕэ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *