Саҥа кэрдиискэ үктэнэр кэм

«Ыал буолуу диэн үгүс мөккүөрү үөскэтэр киэҥ кэпсэтии» , – диэн суруйааччы Роберт Стивенсон этэн турардаах.  Бу метафора эр киһи уонна дьахтар сыһыаныгар үөскүүр «кризиһи», уустук кэрдиис кэми ойуулуур. Маннык кэми хас биирдии ыал хаһан баҕар көрсүбүт буолуохтаах. Бу ыал олоҕор баар уустуктары тумнуохха сөп дуо? Маннык кэм кэллэҕинэ хайдах быһыыланабыт? Бу туһунан уйулҕа үөрэхтээҕэ Юлия Семенова кэпсиир.    

– Дьиэ кэргэн иһигэр үөскүүр «кризис» диэн тугуй?

Хайа баҕар «кризис» олоххо баар сыаннастары, сыһыаны саҥалыы сыаналааһынтан үөскүүр. Бу аата саҥа кэрдиискэ үктэнэр уларыйыы кэмэ. Манна урукку курдук олорор табыллыбат, оттон саҥалыы хайдах буолара биллибэт, сээбэҥниир кэм. Сорох дьон, дьиэ кэргэн бу кэми олус судургутук туорууллар. Маннык дьиэ кэргэн ахсааныгар, быраабыла быһыытынан, бэйэ-бэйэлэрин өйдөһөр, өйөһөр, тугу саныылларын аһаҕастык этэр дьон киирсэллэр.

  –  «Кризистары» болдьохтууллар дии, холобур, биир ый, биир сыл, үс сыл уо.д.а. Тоҕо «кризис» чуолаан бу кэмҥэ үөскүүрүй?

Эрдэ эппитим курдук, бу саҥа кэрдиискэ үктэнэр кэм. Киһи олус дьикти оҥоһуулаах: туох да буола илигиттэн эрдэтинэ билэн, бэлэмнэнэрин сөбүлүүр. Көстө илик кыһалҕаны хайдах быһаарар туһунан эрдэттэн былаанныыр. Маннык гынар ардыгар сыыһа. Тоҕо диэтэххэ, суох кыһалҕаны була сатаан, оҥоро сатаан үөскэтиэххин сөп. Маннык уустук кэм, холобурдаан эттэххэ, үс сыл иннинэ да кэлиэн сөп, ону эн билбэккэ хаалаҕын, тоҕо диэтэххэ бу кэмҥэ «кризис» үөскүүрүн билбэккин. Онтон үс сыл буолла да бэлэмҥнин, уустук кэм үүммүтүн эндэппэккэ билэҕин. Тапталлааҕыҥ, оҕолоруҥ хайдах тутта-хапта сылдьалларыттан уустук кэм үүнэн эрэр биричиинэтин курдук көрөр буолаҕын.

Кырдьыгынан эттэххэ, биир ыйдаах кризис туһунан бастакыбын истэбин. Мин сабаҕалыырбынан, биир ыйдаах «кризиһи»  бииргэ олоруу бастакы күннэригэр көрсүллэр күчүмэҕэйдэри кытта сыһыаннаан толкуйдаабыт буолуохтарын сөп. Саҥа билсэр кэмҥэр тапталлааҕыҥ иннигэр олус тупсан көстө сатыыгын. Аҕыйах кэминэн, киһи маннык «кубулунууттан» сылайар уонна тапталлааҕын иннигэр хайдах баарынан көстөр. Оччоҕуна, бу киһини ылынаргын, эбэтэр урукку олоххор төннөргүн толкуйдуур кэмин буолуон сөп.

– Бу кэми хайдах гынан тумнуохха сөбүй?

«Кризиһы» хайдах да тумнубаккын. Бу кэмтэн куотуна сатааҥ, төттөрүтүн соччото суох балаһыанньаны үөскэтиэххин сөп. Ол оннугар бу кэми хайдах гынан судургутук, түргэнник аһарынар туһунан толкуйдаа.

Үөһэ эппитим курдук, сорох дьон бу кэми судургутук аһарыналлар, ардыгар билбэккэ да хаалаллар. Ыал дьон хайаан да бэйэ-бэйэлэрин өйөһүөхтээхтэр, оччоҕуна эрэ бу кэми этэҥҥэ туорууллар. Аһаҕастык кэпсэтэ үөрэниҥ, баар кыһалҕаны быһаарсыҥ, оччоҕуна эрэ дьиэ кэргэн чөл туруктаах буолар.

Бэйэ-бэйэҕитин, оҕолоргутун, дьиэ кэргэҥҥитин таптаан, сыаналаан. Ситэ эппэт буолууну суох оҥорун, элбэхтэ кэпсэтиҥ. Үчүгэйэ суох кэпсэтиигэ бэлэм буол. Ону таһынан анал үөрэхтээхтэртэн көмөтө көрдөө.

 

 

 

 

 

 

 

 

 

 

 

 

 

 

 

 

 

 

 

Добавить комментарий

Ваш адрес email не будет опубликован. Обязательные поля помечены *