Саһыл Сыһыыга хамыһыйа тахсан үлэлээтэ

Амма улууһугар гражданскай сэрии бүтэһиктээх кыргыһыыта буолбут сирэ –Саһыл Сыһыы алаас. 2022 сылга диэри манна оччотооҕу кэми санатар чөлүгэр түһэрии үлэлэрэ ыытыллыахтара. 


Аммаҕа Саха сиригэр Гражданскай сэрии историятын кэпсиир түмэл баара мээнэҕэ буолбатах. Ол курдук Саха сиригэр эрэ буолбакка, Россияҕа кытта хаан тохтуулаах, бииргэ төрөөбүттэри, аҕаны уолун утары киирсиһиннэрбит  гражданскай сэрии бүтэһиктээх туочуката Амма сиригэр турбута диэн историктар бэлиэтииллэр. Ол туочука турбут сиринэнэ Абаҕа сиригэр өрүс уҥуор баар Саһыл Сыһыы алаас буолар.

2022 сылга Саха АССР тэриллибитэ 100 сылын туолар. Ону кытта Саһылы Сыһыыга гражданскай сэрии бүтэһик кыргыһыыта түмүктэммитэ эмиэ 100 сылын бэлиэтиэхпит. Бу икки даталар бэйэ бэйэлэрин кытта ыкса сибээстээхтэр. Үбүлүөйү көрсө Саһыл Сыһыыны ол кэминээҕитин курдук чөлүгэр түһэриэххэ диэн былааннаан үлэ ыытан, хамыһыйа тахсан көрдө. Бырайыак эрдэ баара гынан баран, олус сыаналаах диэн, арыый уларытан оҥоруохтаахпыт. Саха сирин норуоттарын Спортивнай Оонньууларын иннилэринэ Ил Дархан Айсен Сергеевич Николаев тахса сылдьан Саһыл Сыһыы боппуруоһун көрөргө диэн анаан сорудах биэрэн турар. Бырайыак быһыытынан манна 1922 сыллаахха алаас хайдах этэй, онно ханнык тутуулар турбуттарын барытын чөлүгэр түһэрэн ол кэминээҕи хартыынаны оҥоруохтаахпыт уонна инникитин манна туристическай маршрут баар буолуо. Кэлэр кэнэҕэски ыччаппыт ааспыт историяны билиэхтээх уонна ону харыстыахтаах“, — диэн этэр Абаҕа нэһилиэгин баһылыга Макар Тимофеев.



Икки сыл устатыгар ханнык-туох үлэлэр ыытыллыахтарын сөбүн көрө, сүбэлэһэ улуус баһылыга Николай Архипов, тутууга солбуйааччыта Дмитрий Иванов, Дьокуускай куораттан РФ суруналыыстарын Союһун чилиэнэ, КГБ бэтэрээнэ Калистрат Кириллин, Бүтүн Россиятааҕы култуура историятын пааматынньыктарын харыстыыр уопсастыба өрөспүүбүлүкэтээҕи салаатын бэрэссэдээтэлэ Руслан Васильев, КПРФ ПП Саха сиринээҕи салаатын рескомун сэкэрэтээрэ Вячеслав Куличкин тахса сырыттылар. Манна сирдьит быһыытынан Саһыл Сыһыыга төрдүлэрэ олорбут Алексей Карманов сылдьан, барытын көрдөрөн, ханна туох турбутун кэпсээтэ.

Бу сырыы туһунан сиһилии „Амма олоҕор“ ааҕаарын.

Ааптар: Наталья Бубякина

Сообщение Саһыл Сыһыыга хамыһыйа тахсан үлэлээтэ появились сначала на Ulus.Media — все главные новости из районов Якутии.

Комментарии закрыты.