Саахымат чемпионата соһуччу түмүктээх буолла

Дьэ, уон күнү быһа ыытыллыбыт республика саахымакка үрдүкү лигатын 78-c чемпионата соһуччу түмүктээх буолла. Ол курдук, чемпионат аҥаарыгар диэри үрдүк көрдөрүүнү ситиһэн, өссө “Бастыҥ саҕалааһын” диэн анал бирииһинэн бэлиэтэммит спорт маастара Руслан Пахомов бастаан испитэ. Оттон салгыы туурдартан опыттаах маастар Дмитрий Егоров чорбос гыммыта. Бу кэмҥэ, эдэр оонньооччу Денис Назаров маастардартан хаалсыбакка, тилэх баттаһан, чемпионат саҕаланыаҕыттан үһүс-төрдүс миэстэлэргэ сылдьыбыта.

 

Ол гынан баран, ким ханнык миэстэни ыларын бүтэһик туур быһаарда. Онуоха 14 саастаах маастарга кандидат Денис Назаров олус наадалаах кыайыыны ситиһэн, онтон Егоровтаах, Пахомов тоҕоостоох түгэҥҥэ сыппаан биэрэн, эдэркээн уол чемпион аатын ылыыта элбэх киһиэхэ соһуччу буолла. Арааската бу, саахымат историятыгар хаһан даҕаны буолбатах түгэн буолуохтаах.

Бүтэһик тууру статистиканан кэпсээтэххэ, маныаха диэри бастаан испит Дмитрий Егоров – Владимир Шалагиҥҥа хотторуута соһуччу буолла. Денис Назаров – Николай Бурнашеву хотто. Оттон Руслан Пахомов – Никита Пестряковтуун тэҥнэһэн кэбистэ.

Инньэ гынан, судьуйалар быһаарыыларынан эттэххэ, Денис Назаров уонна Дмитрий Егоров түмүккэ 8,5-дыы очукуону ыллылар. Ол эрээри, Денис аҕыс, оттон Дмитрий сэттэ кыайыылаах буоланнар, хаачыстыбанан көрүүгэ эдэр уол элбэх кыайыылааҕынан, балаһыанньа быһыытынан бастакы миэстэҕэ таҕыста. Оттон үһүс бириистээх миэстэни 7,5 очукуолаах Руслан Пахомов эрэллээхтик ылла.

Салгыы миэстэлэри спорт маастара Гумар Моисеев (6,5), спорт маастара Василий Васильев (6), Никита Пестряков (5,5), Нариман Мустафин (5,5), Николай Бурнашев (5), Владимир Шалагин (4,5), Арсений Чумаевскай (4,5), Вячеслав Гаврильев (2,5), Петр Саввин (1,5) ыллылар. Онон алта бастакы көрдөрүүлээх саахыматчыттар эһиилги чемпионакка кыттар быраабы ыллылар.

Эдэр чемпион Денис Назаров – В.Гаврильевы, А.Чумаевскайы, В.Шалагины кыайталаан баран, Д.Егоровтыын тэҥнэстэ. Онтон маастар Г.Моисеевы хотон баран, Н.Мустафиҥҥа сабырыттаран кэбистэ. Салгыы П.Саввины кыайар уонна  Н.Пестряковка хотторор, онтон маастардар В.Васильевы, Р.Пахомовы уонна бүтэһиккэ Н.Бурнашеву кыайталаата.

Дьахталларга алта кыттааччыттан, кыайыылааҕынан 5 очукуолаах Айыына Егорова буолла. Оттон Олеся Моисеева уонна Кристина Станиславская 3,5-дыы очукуону ылан, ким иккис миэстэни буоларын эбии оонньууга быһаарыстылар. Онуоха 2:1 ахсаанынан Олеся Моисеева кыайыыны ситистэ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *