Саха балетын бастакы артыыһа И.Д. Христофоров төрөөбүтэ 100 сыла

Бүгүн саха аар битииһитэ диэн сүрэхтэммит Иннокентий Христофоров төрөөбүтэ 100 сылын туолла!

Саха балетын бастакы көлүөнэ артыыстарыттан биирдэстэрэ, сахалартан бастакы солиһа, балеты туруорааччы, хореограф, тыыл бэтэрээнэ Иннокентий Дмитриевич Христофоров 1919 сыллаахха сэтинньи 12 күнүгэр уруккута Байаҕантай улууһун киинин Баайаҕа Томторуттан соҕуруу балтараа көстөөх Арахсыылаах нэһилиэгэр (билиҥҥинэн Таатта улууһун Баайаҕа нэһилиэгэ) төрөөбүтэ.

Оскуолаҕа үөрэнэр кэмнэриттэн имигэс-хомугас, үҥкүүһүт уол 1940 сыллаахха саҥа тэриллибит Саха музыкальнай-вокальнай коллективыгар үҥкүү отделениетыгар үөрэнээччинэн киирбитэ. 22 саастаах киһиэхэ хореография маҥнайгы кылааһын программатынан үөрэнэригэр ыарахан этэ. Ол эрээри сотору кини үҥкүүгэ дьоҕурдааҕа, айылҕаттан талааннааҕа биллибитэ. Итиниэхэ кини үҥкүү искусствотын баһылыырга баҕа санаата, дьулуура көмөлөспүттэрэ.

Иннокентий Дмитриевич И.А. Каренин, Н.М. Ходырев, О.Т. Зимина, С.В. Владимиров-Климов курдук балет искусствотын толору баһылаабыт уопуттаах педагогтарга үөрэнэн, талаана толору арыллыбыта, идэтигэр күүһүн-кыаҕын ууран туран үлэлээбитэ. Ол түмүгэр «Сир Симэҕэ» балекка Харахсын Бэргэни, «Бахчисарай фонтаныгар» Гирей ханы толоруута күн бүгүнүгэр диэри уос номоҕор сылдьар. Үөрэппит учууталларыгар махтанан Иннокентий Дмитриевич 1969 с. суруйбут ыстатыйата «Хотугу сулус» 12 №-гэр тахсыбыта. Иннокентий Дмитриевич артыыс быһыытынан эрэ буолбакка, педагог быһыытынан эмиэ үлэлээбитэ. Үөрэппит оҕолоруттан Cаха ACCP народнай артыыһа буолбут Лаврентий Мекюрдяновы, Cаха ACCP үтүөлээх артыыһа буолбут Михаил Местниковы уо.д.а. киэн тутта ааттыыра.

Хомойуох иһин, Иннокентий Дмитриевич доруобуйатын туругунан таптыыр идэтин быраҕарга күһэллибитэ уонна 1954 с. дойдутугар төннүбүтэ. Онно тиийэн өр сылларга киномеханигынан үлэлээбитэ, нэһилиэк, улуус общественнай, культурнай олоҕор көхтөөхтүк кыттара, бэтэрээннэр сэбиэттэрин салайбыта. Иннокентий Дмитриевич ыал буолан, 5 кыыстанан, оҕолорун үөрэхтээх, үлэһит дьон оҥортоон дьоһуннаах олоҕу олорбута. Улахан кыыһа Наталья Инноккентьевна Христофорова аҕатын туйаҕын хатаран балерина, Саха АССР, РСФСР үтүөлээх артыыһа, Ойуунускай аатынан государственнай бириэмийэ лауреата. Мотрена Иннокентьевна Седельникова Саха театрын артыыһа, Саха Республикатын культуратын туйгуна.

Ахсынньы 2-3 күннэригэр Иннокентий Дмитриевич 100 сааһын дойдутугар Таатта улууһугар Ытык-Күөлгэ уонна Баайаҕаҕа бэлиэтиэхтэрэ.

Добавить комментарий

Ваш адрес email не будет опубликован. Обязательные поля помечены *