Саха волейболун Россияҕа бастакы хараҥаччыта

 

Павел Обутов дойду чемпионатыгар кыттар кыахтанна

Бу күннэргэ, саха спордугар өссө биир бэлиэ түгэн буолла. Биир дойдулаахпыт Павел Обутов Соҕуруу Сахалин “Элвари-Сахалин” волейболга кулуубун кытта дуогабар түһэристэ. Онон кини сахалартан спорт историятыгар волейболга Россия чемпионатыгар оонньуур бастакы кыттааччынан буолла.

“Элвари-Сахалин” кулууп Россия волейболга чемпионатын үрдүкү лигатын “Б” бөлөҕөр, “Восток” зонаҕа 2011 сылтан оонньуур. Былырыыҥҥы сезон түмүгүнэн бу кулууп бэйэтин бөлөҕөр Россияҕа үһүс бириистээх миэстэҕэ тахсыбыта. Итини тэҥэ Дальнай Восток федеральнай уокурук чемпионатын хас да төгүллээх призера, Сибиир уонна Дальнай Восток кубогын икки төгүллээх кыайыылааҕа. Кулууп сүрүн соруга – Россия үрдүкү лигатыгар киирии буолар.

-Павел Кэбээйи улууһун Кэбээйи дэриэбинэтиттэн сылдьар, — диир, Намнааҕы оҕо спортивнай оскуолатын итиэннэ республика улахан дьоҥҥо уонна оҕолорго волейболга ыстаарсай тренерэ Айсен Ельфидифорович Жерготов. – Аҕата Павел Обутов волейбол тренерэ буолан, кыра эрдэҕиттэн спорт бу көрүҥэр уолун эрчийбитэ. Ол түмүгэр Павел – Саха сирин волейболга чемпиона (2019), Дальнай Восток федеральнай уокурук чемпионатын призера (2019), Монголияҕа уонна Бурятияҕа ыытыллыбыт норуоттар икки ардыларынааҕы турнирдар призердара (2018), “Азия оҕолоро” норуоттар икки ардыларынааҕы спортивнай оонньуу призера (2012) буола үүннэ. Итини таһынан, кини – Саха сирин уонна Дальнай Восток уокурук чөмпүйэнээттэрин “Бастыҥ туруорааччыта”, “Бастыҥ сибээстээччитэ” анал бириистэринэн наҕараадаламмыта.

 

 

 

Быйыл ыам ыйыгар ыытыллыбыт Дальнай Восток федеральнай уокурук чемпионатын түмүгүнэн, биһиги республикабыт хамаандата иккис буолбута. Онно Павел ситиһиилээх оонньуутун көрөн, Соҕуруу Сахалин “Элвари-Сахалин” диэн волейболга кулуубун дириэктэрэ Сергей Кирсанов биһиги биир дойдулаахпытын бэйэтин хамаандатыгар ыҥырбыта.

Павел эдэр, билигин сааһа 22-тэ. Үрдүгэ 188 см. Кини хантыраак быһыытынан, билиҥҥитэ “Элвари-Сахалиҥҥа” биир сезон (2019-2020) оонньуурга дуогабардаста.

Бу күннэргэ уолбут саҥа хамаандатын кытта бастаан Сахалиҥҥа, оттон билигин Москваҕа икки нэдиэлэлээх үөрэтэр-эрчийэр түмсүүгэ сылдьар. Онон биир дойдулаахпыт үчүгэй бэлэмнэнэр усулуобуйаҕа түбэһэн, сотору кэминэн, “Элвари-Сахалин” кулууп састаабыгар киирэн, хонтуруоллуур матчтарга оонньуура былааннанар. Бастакы матч сарсын, балаҕан ыйын 10 күнүгэр Москва “Динамо” кулуубун кытта буолара былааннанар. Павел сүрүн састаапка баар.

Оттон “Элвари Сахалин” кулууп Арассыыйа чөмпүйэнээтигэр оонньуур лигатыгар күрэхтэһиитэ алтынньы ыйтан саҕаланар.

Павелы волейболист быһыытынан сыаналаатахха, кини 188 см үрдүктээх, волейболга итинник үрдүк уҥуохтаах оонньууну сибээстээччи сэдэх буолааччы, аан дойду бастыҥнара 190 см үрдүк буолаллар. Анаан волейбол оонньууга ананан төрөөбүт курдук. Павел түргэн, кыайыыга дьулуурдаах, спорт бу көрүҥүн техникатын толору баһылаабыт оонньооччу. Кини оонньуута бэйэм санаабар, азиаттар оонньууларыгар маарынныыр диэн этиэхпин баҕарабын.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *