“Сахабэчээт” үлэһиттэрэ Халаны кытта көрүстүлэр

Киһи олоҕун устата билиигэ-көрүүгэ тардыһар. Элбэҕи ааҕа, билэ сатыыр. “Күөх экраны” көрө, эбэтэр кинигэ ааҕа олорон, устуоруйа биир түгэнин, эбэтэр биллиилээх киһи олоҕун чахчыларын эбии билэ охсуоххун баҕардаххына, тута интэриниэккэ киирэн Википедияны хаһыспытынан барарыҥ баар суол. Онтон наадалааххын булан ылан үөрэҕин, астынаҕын. Википедия диэн, аныгы кэмҥэ норуот энциклопедията, быһата дьон-сэргэ билиитин көрүүтүн, устуоруйа чахчыларын биир сиргэ мунньар сирэ, ыйынньыга диэххэ сөп.


Бүгүн, “Сахабэчээт” тэрилтэҕэ Сахалыы Бикипиэдьийэ сүрүн дьаһайааччыта уонна көҕүлээччитэ Николай Павлов – Халан бэйэтин үлэтинэн көрсүһүү тэрийдэ. Кини бэчээт үлэһиттэригэр анаан, билиҥҥи кэмҥэ Бикипиэдьийэ суолтатын, инники соруктарын туһунан сиһилии билиһиннэрдэ.

Ол быһыытынан, билигин аан дойдуга киэҥник тарҕаммыт бу ыйынньыкка биһиги Сахабыт сирин туһунан сырдатыы олох аҕыйаҕа этилиннэ. Үс тыһыынча эрэ. Ону даҕаны сүрүннээн, өрөспүүбүлүкэ тас өртүгэр олорор дьон суруйбуттар эбит. Холобурдаан эттэххэ, 12 сыллааҕыта тэриллибит Сахалыы Бикипиэдьийэҕэ 12 тыһыынча эрэ сырдатыы оҥоһуллубут. Олохпут кэккэ эйгэлэрин, холобур, саха спордун туһунан суруйуулар олох сэдэхтэрэ ыйылынна.

Көрсүһүү түмүгүнэн “Сахабэчээт” тэрилтэ генеральнай дириэктэрин эбээһинэһин толорооччу Владимир Сыромятников, Халан ыытар ыытар үлэтин биһириирин уонна тэрилтэ Бикипиэдьийэҕэ кыттыһан, тустаах суруйуулары таһаарарга, уопсайынан “Сахабэчээт” Сахалыы Бикипиэдьийэни кытта бииргэ үлэлииргэ бэлэмин туһунан иһитиннэрдэ.

Ити курдук, аныгы түргэн тэтимнээх, сайдыылаах кэмҥэ барыны билэ-көрө сатыыр, олоҕу кытта тэҥҥэ хардыылыыр киһи – ситиһиилээх буоларын умнумаҥ. Сахалыы Бикипиэдьийэҕэ киириҥ, Сахалыы Бикипиэдьийэни кытта үлэлэһиҥ, Сахалыы Бикипиэдьийэни сайыннара туруҥ!

Ааптар: Петр ПАВЛОВ.

Сообщение “Сахабэчээт” үлэһиттэрэ Халаны кытта көрүстүлэр появились сначала на Ulus.Media – все главные новости из районов Якутии.

Комментарии закрыты.