“Сахабэчээт” кэлэктиибэ Николай Николаевич Петрову үбүлүөйдээх күнүнэн эҕэрдэлиир

Күндү-мааны доҕорбут, коллегабыт, бэтэрээммит, ытыктабыллаах Николай Николаевич!

“Сахабэчээт” тэрилтэтин аатыттан олоххор кэрэ-бэлиэ 70 сааскын туолар өрөгөйдөөх үбүлүөйгүнэн итиитик-истиҥник эҕэрдэлиибит!

Эн дьон-сэргэ социальнай өттүнэн көмүскэллээх буоларын туһугар туруулаһан Саха сиригэр биир улахан, тарбахха баттанар бастыҥ суруналыыс быһыытынан  “Забота-Арчы” хаһыат кылаабынай эрэдээктэрин солбуйааччытынан таһаарыылаахтык үлэлээбитиҥ. Үлэлээбит сылларыҥ усталаах-туоратыгар төһөлөөх үгүс Саха сирин олохтооҕо эһиги суруйууларгытын ааҕан билиитин-көрүүтүн хаҥаппыта, эһиги сүбэҕитин-амаҕытын суолдьут сулус оҥостон олоҕун уһаппыта буолуой. Эн социальнай эйгэ бары араҥатын хабар кырдьыктаах суруйууларгын, сытыытык туруорбут боппуруостаргын үгүс кыһалҕа быһаарылларыгар төһүү буолбуттара саарбаҕа суох.

Биһиги, “Сахабэчээт” кэлэктиибэ, эйигинниин ыкса доҕордоспутуттан, үлэлээбиппититтэн киэн туттабыт. Убаастабыллаах Николай Николаевич, Эйиэхэ мэлдьи ситиһии эрэ эҥэрдэстин, куруук дьол-соргу эрэ тосхойдун! Алгыс баһа сыаланнын!

Бу үбүлүөйдээх күҥҥэр баҕарабыт: олоххо дьулууруҥ, үтүөҕэ тардыһыыҥ хаһан да уҕараабатын, аймах-билэ дьонуҥ айхалларынан алгыстаах олохтон, үөлээннээхтэриҥ үтүөтүнэн үөрэ-көтө сырыт, чэгиэн-чэбдик буол! Эппит алгыс тылларбыт, олоҕуҥ устатын тухары өрүү араҥаччылыы сырыттыннар диэн баҕа санаабытын тиэрдэбит!

“Сахабэчээт” ГАУ генеральнай директора Ньургуйаана Михайловна Стручкова

Добавить комментарий

Ваш адрес email не будет опубликован. Обязательные поля помечены *