Сартаҥҥа “Кыайыы былааҕын” көрсүү долгутуулаах түгэнэ ааста

«Кыайыы Знамята» өрөспүүбүлүкэтээҕи историческай суолталаах эстафета Сартаҥ нэһилиэгэр ааста.


Сартаҥ нэһилиэгин «Кыһыл Өктөөбүр» холкуоһа 1941 сыллаахха уһансыбыт өҥөтө сөҕүмэр улахан суолталаах. Ол курдук, түүлээххэ былаанын 210% куоһаран, сэрии толоонугар 63259 солкуобайдаах көмөтүн киллэрсибитэ. Сартаҥтан үс киһи сэрии уоттаах хонуутугар кыттыбыта: Аммосов Николай Афанасьевич, Слепцов Василий Алексеевич, Аммосов Константин Афанасьевич. Москуба уобалаһыттан ыҥырыллыбыт Комиссаров Иван Трофимович сэрииттэн этэҥҥэ эргиллэн кэлэн, Сартаҥҥа олохсуйан, ыал буолан, көмүс уҥуоҕа манна кистэнэн сытар.

Улуу Кыайыы 75 сылын көрсө Кыайыы скверэ саҥардыллар. Икки стела эскииһэ оҥоһуллан бигэргэниэҕэ.

Кыттааччылар Албан аат уонна Дойдуга бэриниилээх  буолуу сылыгар тосхойбут улуукан түгэҥҥэ биир мүнүүтэҕэ иһийэн ыллылар. Кыһыл Знамяны күөрэччи тутан парааттаан киирбит оскуола уолаттара бу түгэҥҥэ ол ааспыт хаҕыс сыллар ыар тыыннарын буойун саллааттарын сырдык мөссүөннэрин санатан ылбыттара ураты долгутуулаах буолла.

Түөстэрин  толору уордьан уонна мэтээл иилиммит аастыйбыт баттахтаах ытык кырдьаҕастар  – сэрии сылларын оҕолоро  – Мария Григорьевна Стручкова, Семен Александрович Слепцов, Мария Ивановна Старостина, Мария Михайловна Слепцова үөрбүт, махтал кыымнаах олорон түспүт хаартыскалара үйэлэргэ ыччакка өйдөбүнньүк буолан хаалыаҕа.

Эҕэрдэ тылы арыйбыт бырабыыталыстыба отчуоттуур бөлөҕүн салайааччытыгар П.Н.Багынановка, Сартаҥ нэһилиэгин баһылыгар Н.В.Слепцоваҕа, оскуолатын оҕолоругар, оскуола дириэктэригэр В.В.Слепцовка, «Эрэл» эр дьон кэлэктиибин хоругар, бары кыттааччыларга уонна култуура үлэһиттэригэр барҕа махталбытын этэбит.


Сэрии ыар, аас-туор сылларыгар охтубут буойун саллааттар сырдык кэриэстэригэр анаммыт тэрээһин эҥкилэ суох барарын ситиспит уонна матырыйааллары бэлэмнээбит баһылык Н.В.Слепцоваҕа, Кыайыы 75 сылыгар аналлаах тэрээһиннэр олоххо киирэллэригэр төһүү күүс буолан көмөлөспүт, “Кустук” оҕо уһуйаанын сэбиэдиссэйигэр уонна олохтоох дьаһалта дьокутаатыгар Т.Е.Слепцоваҕа  туспа махталбын этэбин.

Ааптар: Галина Стручкова – Табайаана.

Сообщение Сартаҥҥа “Кыайыы былааҕын” көрсүү долгутуулаах түгэнэ ааста появились сначала на Ulus.Media — все главные новости из районов Якутии.

Комментарии закрыты.