Сергей Николаев: “Сурдлимпиадаҕа өссө төгүл кыттар улахан баҕалаахпын”

Эрдэ иһитиннэрбиппит курдук, дьүлэй спортсменнар Европаҕа бастыыр иһин күрэхтэһиилэригэр Россия хамаандатын састаабыттан быйыл икки бөҕөспүт кытынна. Ол курдук, Саранскайга буолбут Россия күрэхтэһиитин кыайыылааҕа, дьүлэй оҕолор республикатааҕы анал интернат-оскуолаларын 10-с кылааһын үөрэнээччитэ Тимофей Стручков гректии-римнии тустууга кадеттарга үрүҥ көмүс мэтээл хаһаайынынан буолла. Оттон Россия, Европа, Сурдлимпиада чемпиона, спорт үтүөлээх маастара Сергей Николаев көҥүл тустууга эр дьоҥҥо Европа икки төгүллээх чемпионун аатын ылла.

 

Бүгүн, сэтинньи 8 күнүгэр, “Триумф” Спорка бэлэмнэнии киинигэр, олохсуйбут үгэс быһыытынан, кыайыылаахтары кытта көрсөр пресс-конференция тэрилиннэ. Тустууктары уонна кинилэр тренердэрин Саха Республикатын спорка уонна физическэй култуураҕа миниистирэ Иннокентий Григорьев, СР Сүүмэрдэммит хамаандаларын спорка бэлэмнэниилэрин киинин дириэктэрэ Леонид Спиридонов эҕэрдэлээтилэр.

Бу үөрүүлээх түгэнинэн – дьүлэй оҕолор республикатааҕы анал интернат-оскуолалара (дириэктэр О. А. Винокурова), СР адаптивнай спорка киинэ (дириэктэр А.Михайлова), СР спорка бэлэмнэнии киинэ (дириэктэр Л.Н. Спиридонов) бииргэ үлэлээһиннэрин түмүгэр маннык ситиһии кэлбитин бэлиэтиир тоҕоостоох. Сурдлимпийскай бырагырааманан быйыл Европа чемпионата буолла, эһиил аан дойду чемпионата ыытыллыа уонна 2021 сылга – Сурдлимпиада.

Биһиги спортсменнарбыт иннигэр элбэхтик, дьаныардаахтык эрчиллэн кыайыыны ситиһии сыала-соруга турар. Билэргит курдук, Саха сирин дьүлэй спортсменнарын ситиһиилэрэ үтүө үгэскэ кубулуйда. Бу бэлиэ түгэнинэн биһиги Юрий Копытов, Прокопий Николаев, Владимир Бородин улахан таһымнаах күрэхтэһиилэргэ кыайыыларын-хотууларын өссө төгүл санаан кэлэбит. Спорт үтүөлээх маастара Прокопий Николаев Сурдлимпиада икки төгүллээх призера, кэнники улахан көрдөрүүтүн 40 сааһыгар ситиспитэ! Онон холобурдаан көрдөххө, 36 саастаах Сергей Николаев билигин да спорка өрөгөйдүүр кыахтаах. Ол инниттэн бэйэтин кыаҕар, улахан сыалы-соругу ситиһэр баҕата уостубатыгар баҕарыллар.

Ылан көрдөххө, Сергей Николаев өссө 2010 сыллаахха Европа чемпионунан буолан турар. Тоҕус сыл буолан баран, ол көрдөрүүтүн хатылаата. Тоҕо ити икки арда наһаа уһунуй диир буоллахха, Сергей улахан эчэйии ылан, күрэхтэһэрин тохтото сылдьыбыта. Онтон бэйэтин кыаҕар эрэнэн, тренер Василий Стручков салалтатынан сыал-сорук туруорунан көбүөргэ төннөн, эдэрдии эрчимин билигин даҕаны ыһыкта илигин көрдөрөрө хайҕаллаах.

Манна, үгүс киһи, “оттон Сурдимпиада чемпиона Василий Стрекаловскай тоҕо тустубата?” диэн ыйытар. Онуоха хоруйдаатахха, Сурдлимпиецтарга сылга биир-икки эрэ күрэхтэһиилээхтэр. Холобур, бастакыта – Россия чемпионата. Онно кыайбыт, бастаабыт эрэ киһи, дойду сүүмэрдэммит хамаандатыгар киирэр. Оттон Василий Стрекаловскай быйыл саас Россия чемпионатыгар бэйэтин ыйааһыныгар үһүс миэстэни ылан, хамаандаҕа киирбэтэҕэ. Кини ыйааһыныгар бастаабыт бөҕөс Европа чемпионатыгар тиийэн иккис миэстэлэннэ. Онон, Василий туох баар сыала-соруга – эһиилги Россия чемпионатыгар ситиһиилээхтик кыттыы. Билигин, сурдлимпиец-тустууктарбыт күүстээхтэр. Сергей Николаев, Егор Скрябин, Валерий Чемпосов, Владимир Бородин, Василий Стрекаловскай уонна Тимофей Стручков курдук талааннаах ыччаттар элбэхтэр. Онон, спорт бу көрүҥэр эрэл баар диэххэ сөп.

Спорт үтүөлээх маастара Сергей Николаев: “Сурдлимпиадаҕа өссө төгүл кыттар улахан баҕалаахпын. Сүрүн утарсааччыларым – Турция, Иран, Монголия тустууктара. Билигин киилэҕэ тустар инниттэн сүрүннээн үс киилэни түһэриниэбин. Бу ситиһиим элбэх үлэттэн кэллэ. Онуоха өйөөбүт, күүс-көмө буолбут бары тэрилтэлэргэ, салайааччыларга, тус тренербэр улахан махталбын этэбин” – диэн эттэ.

Пресс-конференция түмүгэр, Иннокентий Григорьев – Европа чемпионатын кыайыылааҕа Сергей Николаевка, үрүҥ көмүс призер Тимофей Стручковка уонна кинилэр тус тренердэрэ: РФ уонна СР үтүөлээх тренерэ Василий Егорович Стручковка, СР үтүөлээх тренерэ Эрчимэн Григорьевич Макаровка министиэристибэ аатыттан грамоталары туттарда.

Петр ПАВЛОВ.         

Ааптар хаартыскаҕа түһэриитэ.   

Добавить комментарий

Ваш адрес email не будет опубликован. Обязательные поля помечены *